బుక్‌ మై షో సీఈవోకు మరోసారి సమన్లు

టికెట్ల వ్యవహారంపై వివరణ కోరుతూ ముంబై పోలీసు ఎనకామిక్‌ అఫెన్సెస్‌ వింగ్‌ శనివారం అశీష్‌తో పాటు కంపెనీ టెక్నికల్‌ హెడ్‌కు సమన్లు పంపారు. ఈ వ్యవహారంపై స్పష్టత ఇవ్వాలని కోరారు. అయితే, తాజాగా మరోసారి సమన్లు పంపారు. విచారణ అధికారి ఎదుట హాజరు కావాలని అందులో పేర్కొన్నారు. అయితే వీరిద్దరూ పోలీసులతో టచ్‌లో లేరని సమాచారం.

కాగా, వచ్చే ఏడాది జవవరి 19 నుంచి 21 వరకు నవీ ముంబైలోని డీవై పాటిల్‌ స్టేడియంలో కోల్డ్‌ ప్లే కార్యక్రమం జరగనుంది. బ్రిటిష్‌ రాక్‌బ్యాండ్‌ ఆధ్వర్యంలో నిర్వహించే ఈ కన్సర్ట్‌కు అనూహ్య స్పందన వస్తోంది. దీంతో బ్లాక్‌లో ఈ ప్రోగ్రామ్‌ టికెట్ల విక్రయం జరిగినట్లు ఆరోపణలు వెల్లువెత్తాయి. న్యాయవాది అమిత్‌ వ్యాస్‌ పోలీసులకు ఫిర్యాదు చేశారు. 

రూ.2,500 ఉండే కోల్డ్‌ప్లే టికెట్‌ ధరను థర్డ్‌ పార్టీ ద్వారా ఏకంగా రూ.3 లక్షలకు విక్రయిస్తున్నారని ఫిర్యాదులో పేర్కొన్నారు. అభిమానులను మోసం చేస్తున్నారంటూ ఆగ్రహం వ్యక్తం చేశారు. న్యాయవాది ఫిర్యాదు మేరకు కేసు నమోదు చేసుకున్న పోలీసులు విచారణ ప్రారంభించారు. ఇందులో భాగంగానే బుక్‌మైషో కంపెనీ సీఈవోతోపాటు కంపెనీ టెక్నికల్‌ హెడ్‌కు సమన్లు పంపారు.

మరోవైపు ఈ ఆరోపణలపై బుక్‌మై షో అనధికారికంగా టికెట్లు విక్రయించిన వారితో తమకు సంబంధం లేదని స్పష్టం చేసింది. కోల్ట్‌ ప్లే కన్సర్ట కోసం సెప్టెంబర్‌ 22న బుక్‌మైషోలో టికెట్‌ విక్రయాలు ప్రారంభమైనట్లు తెలిపింది. ఈ సంగీత కచేరీకి అనూహ్య స్పందన వచ్చినట్లు పేర్కొంది.  బుకింగ్స్‌ ప్రారంభమైన రోజే ఏకంగా 1.2 మిలియన్ల మంది టికెట్‌ బుకింగ్‌ కోసం లాగిన్‌ అయినట్లు వివరించింది. దీంతో ప్రతి అభిమానికీ టికెట్లు అందాలనే ఉద్దేశంతో ఒక్కో వినియోగదారుడు 4 టికెట్లు మాత్రమే కొనుగోలు చేసేందుకు పరిమితి విధించినట్లు వివరణ ఇచ్చింది.