జార్ఖండ్‌కు అతిపెద్ద శత్రువులు జేఎంఎం, కాంగ్రెస్‌, ఆర్జేడీ

అటవీ భూములను ఆక్రమించుకున్న వారితో జేఎంఎం చేతులు కలిపిందని విమర్శించారు. జార్ఖండ్ ఎదుర్కొంటున్న ప్రధాన సమస్యల్లో అక్రమ చొరబాట్లు ఒకటని, రాష్ట్రంలోని సంతాల్ పరిగణ, కొల్హన్ ప్రాంతాల్లో ఈ సమస్య మరింత తీవ్రంగా ఉందని ప్రధాని తెలిపారు. కానీ దీనిని ఒప్పుకునే పరిస్థితిలో అధికార పార్టీ మాత్రం లేదని ధ్వజమెత్తారు. 

బంగ్లాదేశీ, రోహింగ్యాలతో జేఎంఎం కుమ్మక్కైందని దుయ్యబట్టారు. కాంగ్రెస్‌ అడుగుజాడల్లో జేఎంఎం నడుస్తూ బుజ్జగింపు రాజకీయాలను ఒంటబట్టించుకుందని దుయ్యబట్టారు.  కాంగ్రెస్‌ బాటలో నడిస్తే బుజ్జగింపు రాజకీయాలు అలవాటవుతాయని, దీంతో దళితులు, గిరిజనులు, బీసీలకు తీరని నష్టం వాటిల్లుతుందని ప్రధాని మోదీ ఆందోళన వ్యక్తం చేశారు. 

రాంచీలో ఆదివారం మోదీ పలు ప్రాజెక్టులకు వర్చువల్‌గా శంకుస్ధాపనలు, ప్రారంభోత్సవాలు చేశారు. కాంగ్రెస్‌ బాటలోనే పాలక జేఎంఎం అవినీతిలో కూరుకుపోయిందని ఆరోపించారు. జేఎంఎం ఐదేండ్ల పాలనలో జార్ఖండ్‌ను లూటీ చేయడమే పనిగా పెట్టుకున్నారని విమర్శించారు. ఏ రంగాన్నీ వదలకుండా స్కామ్‌లతో రాష్ట్రాన్ని దోచేశారని మండిపడ్డారు. నీరు, అటవీ సంపద, భూములు ఇలా ప్రతిచోటా వనరులను దోచేశారని దుయ్యబట్టారు. 

జార్ఖండ్‌లో బీజేపీ ప్రభుత్వం కొలువుతీరగానే అవినీతి, కుంభకోణాలను వెలుగులోకి తెస్తామని ప్రధాని స్పష్టం చేశారు. విచారణ చేపట్టి ప్రజలకు న్యాయం జరిగేలా చూస్తామని మోదీ భరోసా ఇచ్చారు. 70 ఏండ్లు పైబడిన సీనియర్‌ సిటిజన్లందరికీ ఉచిత చికిత్స అందిస్తామని గ్యారంటీ ఇచ్చారు.