అర్ధరాత్రి ప్రజ్వల్​ రేవణ్ణ అరెస్ట్

గతంలో రెండు సార్లు విమానం టికెట్లను రద్దు చేసుకున్న ప్రజ్వల్​ రేవణ్ణ చివరికి గురువారం అర్థరాత్రి లుఫ్తాన్సా ఫ్లైట్​ ఎల్​హెచ్​ 0764లో జర్మనీ నుంచి ఇండియాకు తిరిగొచ్చారు. ప్రజ్వల్​  రేవణ్ణ దాఖలు చేసిన ముందస్తు బెయిల్​ పిటిషన్​ని బెంగళూరులోని ఓ స్పెషల్​ కోర్టు గురువారం కొట్టివేసింది. ఫలితంగా ఆయన అరెస్ట్​ నుంచి తప్పించుకోలేకపోయారు.

హసన్​ ఎంపీ ప్రజ్వల్​ రేవణ్ణ మాజీ ప్రధానమంత్రి హెచ్​డీ దేవెగౌడ మనవడు. జేడీఎస్​ ప్రముఖ రాజకీయ నేత హెచ్​డీ రేవణ్ణ కుమారుడు. కర్ణాటక మాజీ ముఖ్యమంత్రి హెచ్​డీ కుమారస్వామి సోదరుడి కుమారుడు. 2019లో హసన్​ సీటు గెలిచిన ప్రజ్వల్​ 2024  లోక్ సభ ఎన్నికల్లోనూ బీజేపీ- జేడీఎస్​ పొత్తులో భాగంగా అక్కడి నుంచే పోటీ చేశారు.

కాగా, ఎందరో మహిళలను లైంగికంగా వేధించినట్టు ప్రజ్వల్​ రేవణ్ణపై ఆరోపణలు ఉన్నాయి. 2024 లోక్​సభ ఎన్నికల్లో హసన్​ నియోజకవర్గానికి ఏప్రిల్​ చివర్లో పోలింగ్​ జరగ్గా అందుకు ఒక రోజు ముందు ప్రజ్వల్​ రేవణ్ణ సెక్స్​ కుంభకోణానికి సంబంధించిన వీడియోలతో కూడిన అనేక పెన్​డ్రైవ్​లు హసన్​లో కలకలం సృష్టించాయి. 

పోలింగ్​ జరిగిన వెంటనే డిప్లొమాటిక్​ పస్​పోర్ట్​ మీద భారత్ ను విడిచిపెట్టి వెళ్లిపోయారు ప్రజ్వల్​ రేవణ్ణ. ఈ వ్యవహారం దేశవ్యాప్తంగా సంచలనం సృష్టించింది. అనంతరం ప్రజ్వల్​ రేవణ్ణ సెక్స్ కుంభకోణం కేసు అనేక మలుపులు తిరిగింది. ఇక తాను భారత్ కు వస్తానని, మే 31న సిట్​ బృందం దర్యాప్తులో పాల్గొంటానని, అధికారులకు అన్ని విధాలుగా సహకారం అందిస్తానని కొన్ని రోజుల క్రితం ట్వీట్​ చేశారు ప్రజ్వల్.

చివరికి బెంగళూరు విమానాశ్రయంలో ప్రజ్వల్​ రేవణ్ణను పోలీసులు అరెస్ట్​ చేశారు. గురువారం అర్ధరాత్రి ప్రజ్వల్​ రేవణ్ణను విమానాశ్రయం సిబ్బంది పోలీసులకు అప్పగించినట్టు తెలుస్తోంది. అక్కడి నుంచి ప్రజ్వల్​ రేవణ్ణను సీఐడీ (క్రైమ్​ ఇన్​వెస్టిగేషన్​ డిపార్ట్​మెంట్​) కార్యాలయంకు తీసుకెళ్లినట్టు సమాచారం. ఆయన రాత్రంతా సిట్​ బృందం కస్టడీలో ఉన్నట్టు తెలుస్తోంది.

ఇంకొన్ని గంటల్లో ప్రజ్వల్​ రేవన్నకు వైద్య పరీక్షలు నిర్వహిస్తారు. కాగా అరెస్ట్​ చేసిన 24 గంటల్లో ఆయన్ని మెజిస్ట్రేట్​ ముందు హాజరుపరచాల్సి ఉంటుంది. ప్రజ్వల్​  దాఖలు చేసిన రెగ్యులర్​ బెయిల్​ పిటిషన్​పై శుక్రవారం విచారణ జరగనుంది. అంతేకాదు ప్రజ్వల్​ రేవణ్ణ  తల్లి భవానీ రేవణ్ణ  దాఖలు చేసిన ముందస్తు బెయిల్​ పిటిషన్​ తీర్పు కూడా నేడు వెలువడనుంది.