తెలంగాణపై ప్రధాని కన్ను … మూడు రోజుల పర్యటన!

వచ్చే లోక్‌సభ ఎన్నికల్లో తెలంగాణలో అత్యధిక స్థానాల్లో గెలుపే లక్ష్యంగా భారతీయ జనతా పార్టీ ప్రచారం ముమ్మరం చేసింది. ఇప్పటికే బీజేపీ అగ్రనేతలు రాష్ట్రంలో పర్యటించగా, తాజాగా, ప్రధాని నరేంద్ర మోదీ మరోసారి తెలంగాణ రాష్ట్రంలో పర్యటించనున్నారు. మార్చి 16,17,18 వ తేదీల్లో తెలంగాణకు ఆయన రానున్నారు.

మూడు రోజుల పర్యటనలో భాగంగా ఆయన జగిత్యాల, నాగర్ కర్నూల్, మల్కాజ్‌గిరిలో బహిరంగ సభల్లో పాల్గొనే అవకాశముందని బీజేపీ రాష్ట్ర నాయకత్వం వెల్లడించింది. అంతేగాక, మూడు లోక్‌సభ స్థానాలు కవర్ చేసే విధంగా ఒక్కో సభ పెట్టాలని బీజేపీ యోచిస్తోంది. ఇప్పటికే ఇటీవల ప్రధాని మోదీ రెండు రోజుల పర్యటనతో బిజెపి శ్రేణుల్లో ఉత్సాహం నెలకొంది.

 అయితే, ఎన్నికల షెడ్యూల్ ప్రకటన తర్వాత ఆయన పర్యటనకు సంబంధించిన షెడ్యూల్ ఖరారు కానుంది. ఏయే తేదీల్లో పర్యటించాలనే అంశంపై కసరత్తు జరుగుతోంది. మోదీ  పర్యటనల్లో భాగంగా చివరి దశలో హైదరాబాద్, సికింద్రాబాద్ పార్లమెంట్ల పరిధిలో భారీ రోడ్ షో నిర్వహించే అవకాశం ఉన్నట్లు తెలుస్తోంది. ఈ రెండు పార్లమెంట్ (హైదరాబాద్, సికింద్రాబాద్) స్థానాల పరిధిలో ఓటర్లను బీజేపీ వైపునకు తిప్పుకోవడంపై బీజేపీ దృష్టి సారిస్తోంది.

కాగా, మరోవైపు మంగళవారం కేంద్రమంత్రి అమిత్ షా తెలంగాణకు వస్తున్నారు. ఆయన ముందుగా సోషల్ మీడియా వారియర్స్‌తో సమావేశం కానున్నారు.