బీజేపీతో పొత్తుకు సిద్ధమైన చరణ్ సింగ్ మనవడు

ఇప్పటికే జయంత్ చౌదరీని తమ వైపు తిప్పుకోవాలని భావిస్తున్న బీజేపీ తాజాగా చరణ్ సింగ్‌కు భారతరత్న ఇవ్వడంతో ఆర్ఎల్‌డీ పార్టీ ఎప్పటి నుంచో చేస్తున్న డిమాండ్ నెరవేరింది. ఈ క్రమంలోనే సార్వత్రిక ఎన్నికలకు ముందు బీజేపీతో కలిసి ఎన్డీఏలో చేరేందుకు జయంత్ చౌదరీ రంగం సిద్ధం చేసుకున్నట్లు పార్టీ వర్గాల్లో గుసగుసలు వినిపిస్తున్నాయి.

తమ పార్టీ ఎన్డీఏలో చేరడంపై ఆర్ఎల్‌డీ చీఫ్ జయంత్ చౌదరీ పరోక్ష సంకేతాలు ఇచ్చారు. కేంద్రం తీసుకున్న నిర్ణయంపై జయంత్‌ చౌదరి సంతోషం వ్యక్తం చేశారు. తన తాత చరణ్ సింగ్‌కు భారతరత్న రావాలనే తన చిరకాల స్వప్నం నెరవేరిందని వెల్లడించారు. అయితే చరణ్ సింగ్‌కు కేంద్రం భారతరత్న ప్రకటించిన నేపథ్యంలో ఎన్డీఏలో చేరాలని బీజేపీ ఇచ్చిన ఆఫర్‌పై మీడియా ఆయనను ప్రశ్నించగా ఆ ప్రశ్నకు సమాధానం ఇచ్చిన జయంత్ చౌదరీ.. ప్రస్తుత సందర్భంలో ఓట్లు, సీట్ల అంశం అంత ముఖ్యమైంది కాదని వ్యాఖ్యానించారు.