అయోధ్య రామయ్యకు 21.6 అడుగుల భారీ వేణువు

రామ్‌లల్లా ప్రాణ ప్రతిష్ఠ నేపథ్యంలో ఎవరికి ఎవరు తమకు తోచిన కానుకలను అయోధ్య నగరానికి పంపుతున్నారు. ఈ క్రమంలోనే 21.6 అడుగుల పొడువున్న వేణువును ఫిలిబిత్‌కు చెందిన ఓ ముస్లిం కుటుంబం కానుకగా ఇవ్వనున్నది. ఈ భారీ వేణువును ఫిలిబిత్‌ నుంచి అయోధ్యకు తరలించనున్నారు.

ఈ వేణువును ఫిలిబిత్‌కు చెందిన ప్రముఖ హస్తకళాకారుడు నవాబ్‌ అహ్మద్‌ భార్య హీనా ఫర్వీన్‌, అతని కొడుకు అర్మాన్‌ నబీ, అతని స్నేహితులతో కలిసి తయారు చేయగా.. రాష్ట్రీయ స్వయంసేవక్ సంఘ్‌కు చెందిన హరీశ్‌ రౌతేలా ఆ వేణువుకు పూజలు చేశారు. ఈ నెల 26న అయోధ్య ధామ్‌కు పంపనున్నారు. 

2021లో 16 అడుగుల పొడవైన వేణువును తయారు చేయగా ఈ వేణువు గిన్నిస్ బుక్ ఆఫ్ వరల్డ్ రికార్డ్స్‌లో చోటు దక్కించుకున్నది. తాజాగా 21.6 అడుగుల వేణువును తయారు చేశాడు. ఇదే ప్రపంచంలోనే అత్యంత పొడవైన వేణువుగా నిలువనున్నది. అర్మాన్‌ కుటుంబం వేణువులను తయారు చేస్తూ ఉంటుంది. 

ఈ వేణువును అసోంకు చెందిన వెదురుకర్రతో తయారుచేసినట్లు చెప్పారు. 20 సంవత్సరాల కిందట ఈ వెదురుకర్రను సేకరించిన పెట్టామని, అయోధ్య రామయ్యకు కానుకగా ఉపయోగపడుతుందని అనుకోలేదని సదరు కుటుంబం తెలిపింది. ఈ వెదురు ప్రత్యేకత ఏమిటంటే వేణువు వ్యాసం 3.5 అంగుళాలు ఉంటుంది. 

గుండ్రని వెదురు ప్రస్తుతం అందుబాటులో లేదు. వేణువు తయారు చేయడానికి పది రోజులు సమయం పట్టింది. ప్రత్యేకత ఏమిటంటే దాన్ని రెండు వైపులా ఈ వేణువుతో గానం చేయవచ్చు. ఈ భారీ వేణువు తయారీకి దాదాపు రూ.70-80 వేలు ఖర్చయింది. ప్రస్తుతం ఈ వేణువు సోషల్‌ మీడియాలో వైరల్‌గా మారింది. ప్రత్యేకంగా ట్రక్కులో అయోధ్య ధామ్‌కు తరలించనుండగా, మ్యూజియంలో భద్రపరచనున్నారు.