అయోధ్య విమానాశ్రయం, రైల్వే స్టేషన్​ ప్రారంభించిన మోదీ

ఈ ఎయిర్​పోర్ట్​ని రూ. 1,450 కోట్ల ఖర్చుతో రూపొందించారు. ఎయిర్​పోర్ట్​ టర్మినల్​ని 6,500 చదరపు మీటర్ల స్థంలో నిర్మించారు. సంవ‌త్స‌రానికి దాదాపు 10 ల‌క్ష‌ల మంది విమాన ప్ర‌యాణం చేసే విధంగా ఎయిర్‌పోర్టును నిర్మించారు.  ఇక విమానాశ్ర‌యంలో రామాయ‌ణ ఇతివృత్తం ద‌ర్శ‌న‌మిచ్చేలా పేయింటింగ్స్ వేశారు. వాల్మీకి రాసిని రామాయ‌ణం ఆధారంగా ఆ క‌ల‌ర్‌ఫుల్ మ్యూర‌ల్స్ వేశారు. రామయణం, రాముడి జీవితానికి సంబంధించిన అనేక దృశ్య కావ్యాలను విమానాశ్రయం గోడలపై ముద్రించారు.

విమానాశ్రయాన్ని ప్రధాని ప్రారంభించగానే ఢిల్లీ నుంచి అయోధ్య‌కు ఇవాళ మ‌ధ్యాహ్నం ఇండిగో విమానం బ‌య‌లుదేరింది. ఆ విమాన కెప్టెన్ అశుతోష్ శేఖ‌ర్ అయోధ్య ప్ర‌యాణికుల‌కు స్వాగతం చెప్పారు. జై శ్రీరామ్ అంటూ ప్ర‌యాణికులు నినాదాలు చేశారు. అయితే, అయోధ్య  విమానాశ్రయం కార్యకలాపాలు జనవరి 6న అధికారికంగా మొదలవుతాయి. ఢిల్లీ, ముంబై, కోల్​కతా, హైదరాబాద్​, బెంగళూరు, చెన్నై, అహ్మదాబాద్​ నుంచి ప్రతి రోజు విమాన సేవలు అందుబాటులో ఉండనున్నాయి. ఇక విమానాశ్రయ ప్రారంభోత్సవం తర్వాత రాష్ట్రంలో రూ. 15వేల కోట్లు విలువ చేసే అభివృద్ధి కార్యక్రమాలకు శంకుస్థాపన చేశారు.

మహిళ ఇంట్లో టీ తాగిన మోదీ

 కాగా వీటి మధ్యలో ఓ ఆసక్తికర సంఘటన జరిగింది.  పీఎం ఉజ్వల పథకం లబ్దిదారుల్లో ఒకరైన మీరా అనే ఓ మహిళ ఇంటికి ప్రధాని మోదీ అకస్మాత్తుగా వెళ్లారు. మహిళ యోగక్షేమాలను అడిగి తెలుసుకున్నారు. ఆమె భర్త సూరజ్, పిల్లలతో మోదీ ముచ్చటించారు. పిల్లలతో మోదీ కాసేపు సరదాగా మాట్లాడారు. అనంతరం ఇంట్లో టీ తాగారు.

ఆ తర్వాత ప్రధాని వారి జీవన విధానం గురించి అడిగి తెలుసుకున్నారు. ఏం పని చేస్తారని ప్రశ్నించగా అయోధ్యలో తాను పూల వ్యాపారం చేస్తున్నట్టు మీరా తెలియేసింది. అది విన్న ప్రధాని మోదీ గుడి నిర్మాణంతో పూల వ్యాపారం మెరుగవుతుందని ఆశాభావం వ్యక్తం చేశారు.  అనంతరం విమానాశ్రయానికి వెళుతున్న మార్గంలో లతా మంగేష్కర్​ చౌక్​ వద్ద ఆగారు ప్రధాని. అక్కడి నుంచి ప్రజలకు అభివాదం చేశారు.