ఎస్సీ వర్గీకరణ కోసం త్వరలో కమిటీ వేస్తాం

బీఆర్ఎస్ ప్రభుత్వం మాదిగలకు అన్యాయం చేస్తుందని ప్రధాని మోదీ ఆరోపించారు. దళిత నేతను సీఎం చేస్తానని చెప్పిన కేసీఆర్ మాటతప్పారని గుర్తు చేశారు. దళితులకు మూడెకరాల భూమి ఇస్తామన్నారని, ఆ హామీని నెరవేర్చలేదని విమర్శించారు. అలాగే రైతులకు రుణమాఫీ చేస్తామని మోసం చేశారని ధ్వజమెత్తారు. 

దళిత బంధు పథకం కేవలం బీఆర్ఎస్ నేతలకు మాత్రమే ఇస్తున్నారని  మోదీ ఆరోపించారు. కేసీఆర్ తెలంగాణ అస్థిత్వాన్ని కాపాడలేకపోయారని మండిపడ్డారు. దళిత బంధు పథంతో బీఆర్ఎస్ నేతలకే మేలు జరిగిందని చెబుతూ  బీఆర్ఎస్, కాంగ్రెస్ రెండూ అవినీతి పార్టీలేనని విమర్శించారు. తెలంగాణ ఎన్నికల్లో బీఆర్ఎస్, కాంగ్రెస్‌ ఒకరితో ఒకరు పోటీపడుతున్నట్టు నటిస్తున్నారని మోదీ విమర్శించారు. కాంగ్రెస్ దళిత నేతల్ని అవమానించిందని దుయ్యబట్టారు.

“పేదరిక నిర్మూలనే మా ప్రధమ ప్రాధాన్యం. న్యాయం చేస్తామని చెప్పి అనేక పార్టీలు మిమ్మల్ని వాడుకున్నాయి. పార్టీలు చేసిన పాపాలకు ప్రాయశ్చిత్తం చేసేందుకు వచ్చా. ఇకపై మీరు ఏదీ అడగాల్సిన అవసరం లేదు. సామాజిక న్యాయం దిశగా అడుగులు వేస్తున్నాం.” అని మోదీ చెప్పారు.

కేంద్ర మంత్రి జి. కిషన్‌రెడ్డి, బిజెపి నేతలు ఈటల రాజేందర్, బండి సంజయ్‌, డా. కె. లక్ష్మణ్‌, మందకృష్ణ మాదిగ హాజరయ్యారు. మహాసభ వేదికపై మందకృష్ణ మాదిగ కంటతడి పెట్టగా మందకృష్ణ మాదిగను ప్రధాని మోదీ భుజం తట్టి ఓదార్చారు.

విశ్వరూప మహాసభకు వచ్చిన మోదీకి మందకృష్ణ మాదిగ ధన్యవాదాలు తెలిపారు. “ఈ సభకు ప్రధాని మోదీ వస్తారని మేం ఊహించలేదు. ఈ సమాజం మమ్మల్ని మనుషులుగా చూడలేదు. ఈ సమాజం మమ్మల్ని పశువుల కంటే హీనంగా చూసింది.” అంటూ మందకృష్ణ భావోద్వేగంతో చెప్పారు.

‘ఈ సమాజం మమ్మల్ని పశువుల కంటే హీనంగా చూసింది. పూరి గుడిసెల్లో నివసించాం. వర్షం కురిస్తే తడుస్తూ, వణుకుతూ ఓ మూలన నక్కి తల దాచుకున్నాం. ఓ పూట తింటే, ఓ పూట పస్తులుండి కష్టాలు పడ్డాం. చెప్పులు కుట్టుకొని బతికాం. మా లాంటి వాళ్లకు అండగా ఉండేందుకు వచ్చిన మీకు (ప్రధాని మోదీ) ధన్యవాదాలు’ అని మందకృష్ణ చెప్పారు.