ఎథిక్స్ కమిటీ సమావేశంలో గందరగోళం.. ప్రతిపక్ష ఎంపీలు వాకౌట్

ఇదే సమయంలో మహువా మోయిత్రా కూడా ఈ సమావేశంపై నిప్పులు చెరిగారు. అసలు ఇదేం మీటింగ్? కమిటీ సభ్యులు నీచమైన ప్రశ్నలు అడుగుతున్నారు. వ్యక్తిగత విషయాలపై కూడా ప్రశ్నలు వేస్తున్నారు. విచారణ సమయంలో నా కళ్లల్లో నీళ్లు వచ్చాయని తెలిపారు. 

“నా నీళ్లల్లో నీళ్లు మీకు కనిపిస్తున్నాయా’’ అంటూ మీడియాతో మాట్లాడుతూ మోయిత్రా తారాస్థాయిలో విరుచుకుపడ్డారు. అంతకుముందు కూడా, వ్యక్తిగత ప్రశ్నలు అడిగినప్పుడు మోయిత్రా వాటికి జవాబు చెప్పేందుకు నిరాకరించినట్టు తెలుస్తోంది. తన వ్యక్తిగత విషయాల్ని ఇక్కడ చర్చించాల్సిన అవసరం లేదని ఆమె పదేపదే పునరుద్ఘాటించారని తెలిసింది. 

అయినా తన స్నేహితుడి వద్ద నుంచి బహుమతి లభిస్తే, ఈ విషయాన్ని ఎథిక్స్ కమిటీ ముందు ఎలా తీసుకొస్తారని మోయిత్రా ప్రశ్నించారు. అయితే, ఎథిక్స్ కమిటీ సభ్యుల వాదన మాత్రం మరోలా ఉంది. క్రాస్ ఎగ్జామినేషన్ చేస్తున్న సమయంలో మహువా మోయిత్రా ఏమాత్రం సహకరించలేదని ఎథిక్స్ కమిటీ ఛైర్మన్ వినోద్ సోంకార్ తెలిపారు. 

తమ ప్రశ్నలకు సమాధానం ఇవ్వకుండా ఆమె తమ మీద కోపం ప్రదర్శించిందని పేర్కొన్నారు. అన్‌పార్లమెంటరీ భాషను కూడా ఉపయోగించిందని తెలిపారు. తాము సంధించిన ప్రశ్నలను దాటవేసేందుకు మోయిత్రాతో పాటు ప్రతిపక్ష ఎంపీలు తమపై నిందలు మోపుతూ సమావేశం నుంచి వాకౌట్ చేశారని సోంకార్ చెప్పుకొచ్చారు.

పార్లమెంట్ ఎథిక్స్ కమిటీ సమావేశం అనంతరం బీజేపీ ఎంపీ అపరాజిత సారంగి మాట్లాడుతూ సమావేశంలో మహువా మోయిత్రా వ్యవహరించిన తీరు ఖండించతగిందని,  చైర్మన్‌తో పాటు కమిటీ సభ్యులందరినీ ఉద్దేశించి అన్‌పార్లమెంటరీ పదాలు వాడారని తెలిపారు. కమిటీ చైర్మన్‌ హీరానందానీ అఫిడవిట్‌లోని విషయాలపై ప్రశ్నలు అడిగితే వాటికి సమాధానం చెప్పేందుకు ఇష్టపడలేదని, ఆ తర్వాత రచ్చ సృష్టించారని అంటూ ఆమె అభ్యంతరం వ్యక్తం చేశారు.

మరోవంక, ఎథిక్స్ కమిటీ చైర్మన్ వినోద్ సోంకర్ తక్కువ కులానికి చెందినవారని, అందుకే వాళ్లు వ్యతిరేకత వ్యక్తం చేస్తున్నారని ఈ విచారణకు కారణమైన అసలు ఫిర్యాదుదారుడు బీజేపీ ఎంపీ నిషికాంత్ దూబే సంచలన వ్యాఖ్యలు చేశారు. డబ్బుల కోసం మోయిత్రా తన మనస్సాక్షిని అమ్ముకున్నారని ఆరోపించారు. తమతో పాటు ఇతరులు అందించిన అన్ని సాక్ష్యాధారాలను పరిశీలించిన తర్వాత మహువా మొయిత్రాను ఏ శక్తీ రక్షించలేదని స్పష్టం చేశారు.