మాఫియా డాన్‌లు, పేరొందిన నేరస్థుల పట్ల కఠినంగా వ్యవహరిస్తున్న ఉత్తర ప్రదేశ్ ముఖ్యమంత్రి యోగి ఆదిత్యనాథ్ ఇప్పుడు శాసనసభ సమావేశాల తీరుపై దృష్టి సారించారు. శాసన సభలో సభ్యులు పత్రాలను చింపుతూ, గందరగోళం సృష్టిస్తూ పత్రికలు, మీడియాలో పతాక శీర్షికలకు ఎక్కుతున్న విషయాన్ని గమనించారు.
ఇకపై శాసనసభ హుందాగా, ప్రశాంతంగా కనిపించేలా చేయడానికి ఆయన నడుం బిగించారు. త్వరలోనే సభ్యులకు నూతన ప్రవర్తనా నియమావళిని అమలులోకి తీసుకొచ్చి, హుందాగా సభా వ్యవహారాలలో పాల్గొనే విధంగా చేసేందుకు సంకల్పించారు. త్వరలో ఆమోదం పొందబోతున్న ఉత్తర ప్రదేశ్ శాసన సభ కార్యకలాపాల నిర్వహణ, విధానపరమైన నిబంధనలు, 2023 ప్రకారం, సభ్యులు తమతోపాటు మొబైల్ ఫోన్లను శాసన సభలోకి తీసుకెళ్లకూడదు.
శాసన సభలో పత్రాలను చింపడం, అనవసరంగా సభాపతికి తమ వెనుక భాగం కనిపించేలా నిల్చోవడం లేదా కూర్చోవడం వంటివి చేయకూడదు. సభలో మాట్లాడుతున్నపుడు గ్యాలరీలో ఉన్నవారిలో ఎవరివైపూ వేలెత్తి చూపించకూడదు, ప్రశంసించకూడదు. సభలోకి ఆయుధాలను తీసుకెళ్లకూడదు, ప్రదర్శించకూడదు.
లాబీల్లో ధూమపానం చేయరాదు, గట్టిగా నవ్వకూడదు. సభ్యులు సభాపతి స్థానం వైపు చూస్తూ వంగి గౌరవం ప్రదర్శించాలి. సభలోకి ప్రవేశించేటపుడు లేదా సభ నుంచి వెళ్లిపోయేటపుడు లేదా కూర్చునేటపుడు లేదా తమ స్థానాల నుంచి లేచి నిల్చునేటపుడు తమ వీపు భాగం సభాపతి స్థానం వైపు పెట్టకూడదు.
ఉత్తర ప్రదేశ్ శాసనసభ కార్యకలాపాల నిర్వహణ, విధానపరమైన నిబంధనలు, 1958ని సవరిస్తూ ఈ నిబంధనలను ఆమోదించబోతున్నారు. శాసన సభను సమావేశపరచడానికి సమన్లు జారీ చేసే సమయాన్ని 14 రోజుల నుంచి ఏడు రోజులకు తగ్గించారు.
ప్రొసీడింగ్స్‌కు సంబంధంలేని పుస్తకాలు, సాహిత్యం, ప్రశ్నావళి, ప్రెస్ కామెంట్స్, చీటీలు వంటివాటిని సభలోకి తీసుకురాకూడదు, వాటిని సభ్యులకు పంపిణీ చేయకూడదు. ప్రతి రోజూ నిర్వహించే కార్యకలాపాల వివరాలను ఎమ్మెల్యేలకు ఆన్‌లైన్లో లేదా ఆఫ్‌లైన్లో ఓ జాబితాను శాసన సభ ప్రిన్సిపల్ సెక్రటరీ తరపున పంపిస్తారు.
శాసన సభాధిపతి సతీశ్ మహంగ్ తెలిపిన వివరాల ప్రకారం, ఉత్తర ప్రదేశ్ శాసనసభ కార్యకలాపాల నిర్వహణ, విధానపరమైన నిబంధనలు, 2023ను సోమవారం శాసనసభలో ప్రవేశపెట్టారు. దీనిపై చర్చ బుధవారం జరుగుతుంది. దీనికి ఆమోదం లభించబోతోంది.
గత ఏడాది డిసెంబరు 6న సమాజ్‌వాదీ పార్టీ ఎమ్మెల్యే అతుల్ ప్రధాన్ శాసన సభ సమావేశాలను తన ఫేస్‌బుక్‌లో లైవ్ స్ట్రీమింగ్ చేస్తూ పట్టుబడ్డారు. రామ్‌పూర్ ఉప ఎన్నికలపై నిరసన తెలుపుతూ ఆయన ఈ చర్యకు పాల్పడ్డారు. దీంతో సభాపతి ఆయనపై ఆగ్రహం వ్యక్తం చేసి, సభ నుంచి వెళ్లిపోవాలని ఆదేశించారు.
More Stories
వ‌య‌నాడ్‌లో ఓట‌మి భ‌యంతో రాయ్‌బ‌రేలి బ‌రిలో
రాజ్యాంగం మారుస్తామని కాంగ్రెస్ అసత్య ప్రచారం
రాయ్‌బరేలీ కాంగ్రెస్ అభ్యర్థిగా రాహుల్‌ గాంధీ