రెండు న్యూస్ ఛానళ్లలో చర్చల పట్ల హైకోర్టు ఆగ్రహం

అవినాష్ రెడ్డి బెయిల్ వ్యవహారంలో న్యాయస్థానానికి దురుద్దేశాలు ఆపాదించేలా, దాని స్వతంత్రతను ప్రశ్నించేలా కొన్ని ఛానళ్లలో జరుగుతున్న ప్రయత్నాలను అవినాష్ రెడ్డి బెయిల్ పిటిషన్‌ తీర్పులో జస్టిస్ లక్ష్మణ్ ప్రస్తావించారు. టీవీల్లో చర్చల సందర్భంగా కొంతమందిని ఎంపిక చేసుకుని వారి ద్వారా న్యాయవ్యవస్థపై దుష్ప్రచారం చేయిస్తున్నారని అభిప్రాయపడ్డారు.

తద్వారా న్యాయమూర్తిపై వ్యక్తిగత విమర్శలు చేయడంతో పాటు దురుద్దేశాలను ఆపాదిస్తున్నారని పేర్కొన్నారు. ప్రజాస్వామ్య పరిరక్షణకు మూలస్తంభంగా నిలవాల్సిన పత్రికవ్యవస్థపై తనకు ఎనలేని గౌరవం ఉందని తెలిపారు. అయితే, తమ అభిప్రాయాలను ఆలోచనలను వ్యక్తీకరించే స్వేచ్ఛ ప్రతి ఒక్కరికి ఉందని అది ప్రజాస్వామ్యబద్దంగా ఉండాలని అభిప్రాయపడ్డారు.

కొందరి వ్యవహార శైలి వల్ల న్యాయవ్యవస్థ ప్రతిష్ట మసకబారే పరిస్థితి వచ్చిందని పేర్కొన్నారు. జడ్జిగా పనిచేస్తూ విధుల నుంచి సస్పెన్షన్‌కు గురై విధుల నుంచి తొలగించిన జడ్జి తనపై నేరుగా ఆరోపణలు చేశారని, “నగదు మూటలు అందుకున్నానని” ఆరోపించారని, ఆ చర్చలో పాల్గొన్న మరొకరు “చెయ్యండ్రా” అంటూ సంజ్ఞల ద్వారా వ్యాఖ్యలు చేశారని వివరించారు.

అందుబాటులో ఉన్న ఫుటేజీల ద్వారా ఆ చర్చలో చేసిన వ్యాఖ్యలు తాను పరిశీలించానని తెలిపారు. అయితే, తన నిబద్దత, నిజాయితీపై చేసిన వ్యాఖ్యలు తనపై ఎలాంటి ప్రభావం చూపవని పేర్కొంటూ, వాటి వల్ల తన వ్యక్తిత్వానికి వచ్చిన నష్టం లేదని స్పష్టం చేశారు. అదే సమయంలో కొన్ని మీడియా సంస్థలు ఉద్దేశపూర్వకంగా చేస్తున్న దాడులతో న్యాయవ్యవస్థ పనితీరును రక్షించుకోవాల్సి ఉందని తెలిపారు.

కొన్ని మీడియా సంస్థల నుంచి న్యాయవ్యవస్థను కాపాడుకోవాల్సిన అవసరం ఉందని పేర్కొంటూ  న్యాయవ్యవస్థను కించపరుస్తూ చేసిన వ్యాఖ్యలు ఖచ్చితంగా కోర్టు ధిక్కరణ కిందకు వస్తాయని, ఇలాంటి చర్యలపై చర్యలు తీసుకునే నిర్ణయాన్ని తెలంగాణ హైకోర్టు ప్రధాన న్యాయమూర్తికి విడిచిపెడుతున్నట్లు చెప్పారు.