అజిత్ పవార్ బిజెపి వైపు అడుగులు వేస్తున్నారా!

గత 20 ఏళ్లుగా ఎన్సీపీకి డిప్యూటీ సీఎం పదవి మాత్రమే దక్కడంపై అజిత్‌ పవర్‌ను మీడియా ప్రశ్నించింది. దీనికి ఆయన సమాధానమిస్తూ 2004లో సీఎం పదవిని ఎన్సీపీ చేపట్టాల్సి ఉందని చెప్పారు. నాడు ఎన్సీపీ, కాంగ్రెస్ కలిసి అసెంబ్లీ ఎన్నికల్లో పోటీ చేశాయని చెప్పారు. ఎన్సీపీ 71 స్థానాల్లో, కాంగ్రెస్‌ 69 స్థానాల్లో గెలిచాయని గుర్తు చేశారు.

దీంతో సీఎం పదవిని ఎన్సీపీ నేత చేపడతారని కాంగ్రెస్‌తో సహా అంతా భావించారని తెలిపారు. తన సహోద్యోగి దివంగత ఆర్‌ఆర్‌ పాటిల్‌ ముఖ్యమంత్రి అయ్యేవారని పేర్కొన్నారు. అయితే ఎన్సీపీకి డిప్యూటీ సీఎం పదవి దక్కుతుందని ఢిల్లీ నుంచి సందేశం వచ్చిందని  అంటూ పరోక్షంగా కాంగ్రెస్ పై మండిపడ్డారు.

ఆ తర్వాత జరిగిన అసెంబ్లీ ఎన్నికల్లో కాంగ్రెస్‌ పార్టీ అధిక సీట్లు గెలిచిందని, దీంతో సీఎం పదవి ఆ పార్టీ వద్దే ఉందని తెలిపారు. కాంగ్రెస్‌ మాజీ సీఎం పృథ్వీరాజ్ చవాన్‌తో కంటే శివసేన (యూబీటీ) నేత ఉద్ధవ్‌ ఠాక్రే ప్రభుత్వంతో కలిసి సంతోషంగా పని చేసినట్లు చెప్పారు. మరోవైపు 2022 జూన్‌లో శివసేన నాయకత్వంపై తిరుగుబాటుకు ముందు ప్రస్తుత సీఎం ఏక్‌నాథ్ షిండే అసంతృప్తిగా ఉన్నారని అజిత్‌ పవార్‌ తెలిపారు. ఆయన మనస్సులో ఏదో జరుగుతోందన్న సంగతి తనకు కూడా తెలుసని చెప్పారు.

డిప్యూటీ సీఎం, బీజేపీ నేత దేవేంద్ర ఫడ్నవీస్‌తో అజిత్‌ పవార్‌కు ఉన్న అనుబంధం గురించి కూడా మీడియా ప్రశ్నించగా  జూలై 22న పుట్టడమే తమ ఇద్దరి మధ్య ఉన్న కామన్‌నెస్‌ అని పేర్కొన్నారు. రాజకీయ, సైద్ధాంతిక పరంగా తమ మధ్య విభేదాలు ఉన్నప్పటికీ తాము శత్రువులం కాదని స్పష్టం చేశారు. ఎన్సీపీ చీఫ్‌ శరద్ పవార్, శివసేన వ్యవస్థాపకుడు దివంగత బాల్ ఠాక్రే తమ తమ ప్రసంగాలలో ఒకరిపై ఒకరు విమర్శించుకున్నప్పటికీ మంచి స్నేహితులని గుర్తు చేశారు.