పరువు నష్టం కేసులో రాహుల్ గాంధీకి ఎదురుదెబ్బ

2019లో కర్ణాటకలో లోక్‍సభ ఎన్నికల ప్రచారం సందర్భంగా ప్రధాని నరేంద్ర మోదీని విమర్శించే క్రమంలో నీరవ్ మోదీ, లలిత్ మోదీలను ప్రస్తావిస్తూ ‘మోదీ ఇంటిపేరు’పై రాహుల్ గాంధీ కామెంట్ చేశారు. “దొంగలందరి ఇంటి పేరు మోదీ అని ఎందుకు ఉంది?” అని ప్రశ్నించారు.

మోదీ వర్గాన్ని రాహుల్ అవమానించారంటూ సూరత్ జిల్లా కోర్టులో బీజేపీ ఎమ్మెల్యే పుర్ణేశ్ మోదీ పరువు నష్టం కేసు వేశారు. దీనిపై ఈ ఏడాది మార్చిలో సూరత్ జిల్లా కోర్టు తీర్పు ఇచ్చింది. రాహుల్‍ను దోషిగా నిర్ధారించి, రెండేళ్ల జైలు శిక్ష విధించింది. దీంతో నిబంధనల ప్రకారం రాహుల్ గాంధీపై లోక్‍సభ అనర్హత వేటు వేసింది. దీంతో ఎంపీ పదవి కోల్పోయారు రాహుల్ గాంధీ.

రెండేళ్లు, అంతకంటే ఎక్కువ జైలు శిక్ష పడిన వారు పార్లమెంటు సభ్యులుగా ఉండేందుకు అర్హత లేదనే చట్టం ఉంది. అలాగే వారు తదుపరి ఎనిమిదేళ్లు ఎన్నికల్లో పోటీ చేసేందుకు వీలుండదు. ఈ నిబంధనల కింద పరువు నష్టం కేసులో దోషిగా తేలి, రెండేళ్ల జైలు శిక్ష పడిన రాహుల్ గాంధీపై లోక్‍సభ అనర్హత వేటు వేసింది.

దీంతో రాహుల్ ఎంపీ పదవిని కోల్పోయారు. ఒకవేళ సూరత్ సెషన్స్ కోర్టు దోష నిర్ధారణపై స్టే విధించి ఉంటే ఆయనకు మళ్లీ ఎంపీ పదవి దక్కేది. అయితే సూరత్ సెషన్ కోర్టు రాహుల్ అప్పీలును తిరస్కరించింది. దీంతో పైకోర్టులను రాహుల్ గాంధీ ఆశ్రయించాలి.

దోష నిర్ధారణను పైకోర్టులు కొట్టేసినా, శిక్షను నిలుదల చేసినా, శిక్షను రెండేళ్ల కంటే తగ్గించినా రాహుల్ గాంధీ మళ్లీ ఎంపీ పదవిని పొందవచ్చు. ఒకవేళ ఉన్నత న్యాయస్థానాలు కూడా రాహుల్ గాంధీ దోష నిర్ధారణను, శిక్ష అలాగే కొనసాగిస్తే ఆయన ఎంపీ పదవిని మళ్లీ పొందలేకపోవడమే కాక, తదుపరి 8 సంవత్సరాలు ఎన్నికల్లో పోటీ చేసే అవకాశం ఉండదు.