తెలంగాణ అమర వీరుల ఆకాంక్షలు బీజేపీ ఆధ్వర్యంలోని కాషాయ జెండాతోనే నేరవేరతాయని ఆ పార్టీ రాష్ట్ర అధ్యక్షులు, ఎంపీ బండి సంజయ్ కుమార్ స్పష్టం చేశారు. కేసీఆర్ కుటుంబ పాలనలో తెలంగాణ ఛిన్నాభిన్నమైందని ఆవేదన వ్యక్తం చేశారు. అంబేద్కర్ స్పూర్తితో ప్రజాస్వామ్యబద్దంగా తెలంగాణ అమరు వీరుల ఆకాంక్ష కోసం బీజేపీ సాగిస్తున్న పోరాటానికి ప్రతి ఒక్కరూ అండగా నిలవాలని ఆయన కోరారు.
తెలంగాణ రాష్ట్ర ఆవిర్భావ దినోత్సవాన్ని పురస్కరించుకుని గురువారం పార్టీ రాష్ట్ర కార్యాలయంలో బండి సంజయ్ జాతీయ పతాకాన్ని ఆవిష్కరిస్తూ తెలంగాణ అమర వీరులను స్మరించుకున్నారు. తెలంగాణ కోసం ఉద్యమించిన వారందరికీ అభినందనలు తెలిపారు. తెలంగాణ రాష్ట్ర ఆవిర్భావం కేవలం ఒక్క కుటుంబం వల్లే వచ్చిందనే ధుష్ప్రచారం జరుగుతోందని మండిపడ్డారు.
తెలంగాణ రాష్ట్ర సాధన కోసం బీజేపీ చేసిన పోరాటాలను స్మరించుకొంటూ తెలంగాణలో యువకుల బలిదానాలను ఆపేందుకు బీజేపీ నాయకురాలు సుష్మాస్వరాజ్ చేసిన క్రుషిని కొనియాడారు. పార్లమెంట్ లో తెలంగాణ బిల్లుకు బీజేపీ మద్దతివ్వకపోతే తెలంగాణ రాష్ట్రం ఆవిర్భవించేదే కాదని ఆయన తేల్చి చెప్పారు.
బీజేపీ ఏనాడూ పేరు కోసం పనిచేయలేదని, తెలంగాణ ప్రజల ఆకాంక్ష, అమరవీరుల ఆశయ సాధన కోసమే ఉద్యమించిందని సంజయ్ గుర్తు చేశారు. త్యాగాలతో సాధించుకున్న తెలంగాణలో ప్రజల ఆకాంక్షలకు భిన్నంగా పాలన సాగుతోందని ధ్వజమెత్తారు.
కేవలం ఒక్క కుటుంబం చేతిలో తెలంగాణ ప్రజల ఆకాంక్షలు చిన్నాభిన్నమయ్యాయని ఆవేదన వ్యక్తం చేశారు. తెలంగాణ ప్రజల ఆకాంక్షలు కాషాయ జెండాతోనే సాధ్యమని పేర్కొంటూ ఈ విషయాన్ని గమనించే ఉద్యమకారులంతా బీజేపీలో చేరుతున్నారని తెలిపారు.
మాజీ మంత్రి, బిజెపి తమిళనాడు సహా ఇన్ ఛార్జ్ పొంగులేటి సుధాకర్ రెడ్డి మాట్లాడుతూ ప్రగతి భవన్ కేవలం ఒక కుటుంబం ప్రగతికే పరిమితమైందని దయ్యబట్టారు. చివరకు అంబేద్కర్ రాజ్యాంగాన్ని కూడా పరిహసిస్తూ కల్వకుంట్ల రాజ్యాంగాన్ని అమలు చేస్తూ ప్రజలను ఇబ్బంది పెడుతున్నారని మండిపడ్డారు.
కళ్లుండి, చెవులుండి చూడలేని కల్వకుంట్ల ప్రభుత్వ కళ్లు తెరిపించేందుకు… ప్రభుత్వ అరాచకాలను పాతరేసేందుకు బండి సంజయ్ సారథ్యంలో బీజేపీ అలుపెరగని పోరాటాలను యావత్ దేశం చూస్తోందని తెలిపారు.
మోదీ పాలనా విజయాల ప్రత్యేక వెబ్ సైట్
కాగా, 8 ఏళ్ల సేవా సుపరిపాలన గరీబ్ కళ్యాణ్ పేరిట నరేంద్ర మోదీ ప్రభుత్వ 8 ఏళ్ల పాలనా విజయాలకు సంబంధించి ప్రత్యేక వెబ్ సైట్ ను బండి సంజయ్ కుమార్ విడుదల చేశారు. మోదీ ప్రభుత్వ 8 ఏళ్ల పాలనలో జరిగిన అభివ్రుద్ధి, సంక్షేమ ఫలాలకు సంబంధించి ప్రత్యేక గీతాన్ని కూడా విడుదల చేశారు.
మోదీ 8 ఏళ్ల పాలనా విజయాలకు సంబంధించి పాకెట్ డైరీ, కరపత్రాలను ఆయన ఆవిష్కరించారు. వివిధ రంగాల్లో నైపుణ్యం కనబరిచిన పద్మశ్రీ గోవర్దన్, చింతకింద మల్లేశం దుశ్చర్ల సత్యనారాయణ, శశాంక్ రెడ్డి సహా పలువురికి మెమొంటోలను అందజేసి ఘనంగా సన్మానించారు.
More Stories
విద్యా భారతి విజ్ఞాన కేంద్రంకు డా. భగవత్ తో ప్రారంభోత్సవం
బిజెపి అభ్యర్థి సుజనా చౌదరికి అమరావతి రైతుల మద్దతు
2 పేజీలతో వైసీపీ మేనిఫెస్టో విడుదల