మోదీ ఎనిమిదేళ్ల పాలనపై నేటి నుండి బిజెపి విస్తృత ప్రచారం

మే 30 నుండి జూన్ 14 వరకు, సేవ, సుపరిపాలన, పేదల సంక్షేమ పక్షం దేశవ్యాప్తంగా ప్రధాన మంత్రి మోదీ నేతృత్వంలోని ప్రభుత్వం చేపట్టిన కార్యక్రమాల ప్రాధాన్యతలను ఈ పక్షం రోజులలో పార్టీ ప్రజలకు చేరవేస్తుందని బిజెపి జాతీయ ప్రధాన కార్యదర్శి అరుణ్ సింగ్ తెలిపారు. 

“మోదీ ప్రభుత్వం సబ్‌కా సాథ్, సబ్‌కా వికాస్, సబ్‌కా విశ్వాస్‌ల సూత్రంపై పనిచేస్తోంది. అందువల్ల, ప్రజా ప్రయోజనాల కోసం మా పథకాలలో ప్రజల మధ్య వివక్ష లేదు” అని ఆయన స్పష్టం చేశారు. ఈ ప్రచారంలో భాగంగా, బూత్ నుండి జాతీయ స్థాయి వరకు 75 గంటల ప్రజా సంబంధాల ప్రచారాన్ని కూడా నిర్వహిస్తామని, ఇందులో కేంద్ర, రాష్ట్ర మంత్రులు, పార్టీకి చెందిన ప్రజా ప్రతినిధులందరూ గ్రామాలను సందర్శిస్తారని సింగ్ చెప్పారు.

కేంద్ర మంత్రులు దేశవ్యాప్తంగా 140కి పైగా పార్లమెంటరీ నియోజకవర్గాలను సందర్శించి పార్టీ కార్యకర్తలు, వివిధ సంక్షేమ పథకాల లబ్ధిదారులతో సంభాషించనున్నారు.

కాగా,  ధర్మేంద్ర ప్రధాన్, స్మృతి ఇరానీ, జ్యోతిరాదిత్య సింధియాతో సహా అరడజను మంది కేంద్ర మంత్రులు పశ్చిమ బెంగాల్‌ను సందర్శిస్తారని పార్టీ వర్గాలు తెలిపాయి. ఆరోగ్య మంత్రి మన్సుఖ్ మాండవియా మరికొందరు కేంద్ర మంత్రులతో కలిసి పంజాబ్‌లో పర్యటించనున్నారు.

కేంద్ర మంత్రులు తమకు కేటాయించిన రాష్ట్రాల్లో రెండు, మూడు రోజులు గడపనున్నారు. వారు పార్టీ కార్యకర్తలు, ప్రభుత్వ పథకాల లబ్ధిదారులతో సంభాషిస్తారు. మీడియా  సమావేశాలు నిర్వహిస్తారు.