300 కిలోమీటర్ల మైలురాయి దాటిన సంజయ్ యాత్ర

జడ్చర్ల సమీపంలోని గంగాపురం వద్దకు చేరుకునే సరికి 300 కిలోమీటర్లు పూర్తవడంతో బీజేపీ, బీజేవైఎం కార్యకర్తలు సంబరాలు నిర్వహించారు.  సంజయ్‌తో 300 కిలోల కేక్‌ కోయించారు. ప్రజల ఆశీర్వాదంతోనే మండుటెండలో సైతం యాత్ర చేయగలిగానని సంజయ్‌ చెప్పారు.

ఆదివారం మహబూబ్‌నగర్‌ జిల్లా జడ్చర్ల మండలంలో కొనసాగింది. కోడ్గల్‌ గ్రామంలో రాత్రి రచ్చబండ నిర్వహించిన కార్యక్రమంలో సంజయ్‌ మాట్లాడారు.  ప్రధాని మోదీ పేదలకు ఉచితంగా బియ్యం ఇస్తున్నారని, దీంతోపాటు గ్రామ పంచాయతీలకు, డబుల్‌ బెడ్‌రూం ఇళ్ల నిర్మాణానికి నిధులు ఇస్తున్నారని తెలిపారు. అయితే,  ఆ నిధులను ముఖ్యమంత్రి కేసీఆర్‌ ఆయన  ఖాతాలో జమచేసుకుంటున్నారని ఆరోపించారు.

మోదీ నిధులు ఇచ్చినా, పంచేవాడు మనవాడు కాకుంటే లబ్ధిదారులకు అవి ఎలా చేరతాయని ఆయన ప్రశ్నించారు.

ఈ ప్రాంతంలో సెజ్ సహా అనేక ఫ్యాక్టరీలున్నప్పటికీ ఇక్కడి స్థానికులకు మాత్రం ఉద్యోగాలివ్వకపోవడం అన్యాయమని విమర్శించారు. కేసీఆర్ పాలనలో డబుల్ బెడ్రూం ఇండ్లు టీఆర్ఎస్ లీడర్లకే కేటాయిస్తున్నారని, జడ్చర్ల మండలంలోని కోడుగల్ లో ఒక్క టీఆర్ఎస్ లీడర్ ఇంటికే ఏకంగా 10 డబుల్ బెడ్రూం ఇండ్లు మంజూరయ్యాయని ధ్వజమెత్తారు.

పేదల రాజ్యం రావాలి. గడీల రాజ్యాన్ని బద్దలు కొట్టాలని చెబుతూ పేదల రాజ్య స్థాపన కోసమే పాదయాత్ర చేస్తున్నానని తెలిపారు.  దళితులు, పేదలుసహా అన్ని వర్గాల ప్రజలకు న్యాయం జరగాలంటే బీజేపీ అధికారంలోకి రావాలని స్పష్టం చేశారు.  ఇప్పటి వరకు అన్ని పార్టీలకు అవకాశమిచ్చారు. టీఆర్ఎస్ కు రెండుసార్లు అధికారం ఇచ్చారు. ఒక్కసారి బీజేపీకి అవకాశం ఇవ్వండి. ప్రజలకు సేవ చేసే అవకాశం ఇవ్వండని సంజయ్ కోరారు.