మంత్రి పువ్వాడపై హత్యకేసు నమోదు చేయాలి 

మంత్రి పువ్వాడ అజయ్ కుమార్, పోలీసుల వేధింపులు భరించలేక ఖమ్మంలో బిజెపి కార్యకర్త సాయి గణేశ్ ఆత్మహత్య చేసుకోవడం పట్ల కాంగ్రెస్ ఎమ్యెల్యే జగ్గారెడ్డి తీవ్ర ఆవేదన వ్యక్తం చేశారు. పువ్వాడను మంత్రివర్గం నుంచి బర్తరఫ్ చేయాలని డిమాండ్ చేశారు. మంత్రిపై ఉన్న ఫిర్యాదులపై విచారణ జరిపించాలని కోరారు. 

బాధితుని వాంగ్మూలం తీసుకొని ఎమ్మారో, ఆర్డీఓ, సీఐ, డీఎస్పీని సస్పెండ్ చేయాలని జగ్గారెడ్డి సూచించారు. ప్రతిపక్ష పార్టీల కార్యకర్తలపై పీడీ యాక్టు కేసులు పెట్టిన పోలీసులపై చర్యలు తీసుకోవాలని ఆయన స్పష్టం చేశారు.  మంత్రి పువ్వాడ ఓ సైకో అని మండిపడుతూ, ఖమ్మం జిల్లాలో మూడేళ్ల నుంచి మంత్రి పువ్వాడ అజయ్, పోలీసుల వేధింపులు ఎక్కువయ్యాయని జగ్గారెడ్డి ఆరోపించారు. ఈ విషయంపై డీజీపీని కలిసి ఫిర్యాదు చేసినా పట్టించుకోలేదని వాపోయారు.

కేసీఆర్, కేటీఆర్ దగ్గర మార్కులు కొట్టేయడానికి పువ్వాడ అజయ్ ఓవర్ యాక్షన్ చేస్తున్నారన్న జగ్గారెడ్డి ఆయనకు కొందరు పోలీసులు చెంచాగిరి చేస్తున్నారని విమర్శించారు. పువ్వాడపై చర్యలు తీసుకోవడంలో కేసీఆర్ ఆలస్యం చేస్తే ప్రభుత్వానికే నష్టమని జగ్గారెడ్డి కేసీఆర్ ప్రభుత్వంను హెచ్చరించారు. పోలీసులపై విశ్వాసం పోకుండా చూడాల్సిన బాధ్యత ప్రభుత్వానికి ఉందని స్పష్టం చేశారు.