మల్లన్నసాగర్ నిర్వాసితుల గోడు కేసీఆర్ స‌ర్కార్‌కు పట్టదా?

ముంపు గ్రామాల నుంచి నిర్వాసితులను తరలించేటప్పుడు వారి ఆప్షన్ల మేరకు కొందరికి డబుల్ బెడ్ రూమ్ ఇండ్లను కేటాయించగా మరికొందరికి ఓపెన్ ప్లాట్లను ఇవ్వడానికి హామీ ఇచ్చారు.  దాదాపు ఏడాది కావస్తున్నా… 3500 కుటుంబాలకు అటు డబుల్ బెడ్ రూమ్ ఇండ్లను గానీ, ఇటు ఓపెన్ ప్లాట్లను గానీ ఇవ్వలేదని విజయశాంతి ధ్వజమెత్తారు.

నిర్వాసితులు ప్లాట్ల కోసం ఎదురుచూస్తూ, ఆవేదనతో ప్రాణాలు కోల్పోతున్నారని ఆమె చెప్పారు. ఇద్దరు ఆడ పిల్లలున్న రాజబాబు అనే నిర్వాసితుడు ఏడాది క్రితం ప్యాకేజీ అందక ఆవేదనకు లోనై గుండెపోటుతో మ‌ర‌ణించగా, .ఆరు నెలల క్రితం బానోతు హన్మంతు అనే నిర్వాసితుడు చనిపోగా, ఒంటరి మహిళల ప్యాకేజీ అందక వేములఘాట్ గ్రామానికి చెందిన ఎన‌బై ఏళ్ల వృద్ధురాలు బాలవ్వ ఆత్మహత్య చేసుకుందని ఆమె వివరించారు.

భవిష్యత్తు ఆశలపై నీళ్లు జల్లిన ఈ పాలక రాబందుల కారణంగా ఊరికాని ఊరిలో తనువు చాలించిన అభాగ్యుల‌ ఉసురు ఊరికనే పోదు. ప్లాట్ల దందాల కోసం నిర్వాసితులకు వారి గ్రామాలతో శాశ్వతంగా బంధాల్ని తెంచేస్తున్న దౌర్భాగ్యులకు పుట్టగతులు ఉండవని ఆమె పేర్కొన్నారు. “అమ్మలారా, అక్కలారా… మీరెవరూ ఆత్మ‌హత్య‌లు చేసుకోకండి. మీకు అండాగా బీజేపీ ఉంటుంది. మ‌నకు దక్కాల్సిన హక్కులను కొట్లాడి సాధించుకుందాం…. కేసీఆర్ను గద్దె దించుదాం”  అని విజయశాంతి విజ్ఞప్తి చేశారు.