2008 అహ్మదాబాద్ వరుస పేలుళ్ల కేసులో దోషుల్లో ఒకరి తండ్రికి ఆ పార్టీతో సంబంధాలు ఉన్నాయని ఆరోపిస్తూ, ఉగ్రవాదుల పట్ల సమాజ్ వాదీ పార్టీ సానుభూతితో వ్యవహరిస్తోందని ఉత్తర్ ప్రదేశ్  ముఖ్యమంత్రి యోగి ఆదిత్యనాథ్ ఆరోపించారు.

ఏడు దశల రాష్ట్ర అసెంబ్లీ ఎన్నికల్లో నాలుగో విడత పోలింగ్‌కు వెళ్లే లఖింపూర్ కెహ్రీలో జరిగిన ఎన్నికల ర్యాలీలో ముఖ్యమంత్రి ప్రసంగిస్తూ  “ఈ ఉగ్రవాదుల పట్ల ఎస్పీకి ఎందుకు సానుభూతి ఉంది? దేశ భద్రతతో ఆడుకునే వారిని ప్రజలు ఆదరిస్తారా?” అని ప్రశ్నించారు.

 రాష్ట్రంలో అల్లర్లు లేకుండా ఉండాలంటే బీజేపీకి ఓటు వేయాలని ప్రజలను కోరుతూ ముఖ్యమంత్రి కోరారు. 2008 నగరంలో జరిగిన వరుస పేలుళ్లపై అహ్మదాబాద్‌లోని ఉగ్రవాద వ్యతిరేక కోర్టు తీర్పును ప్రస్తావిస్తూ, ఉగ్రదాడి కేసులో దోషుల్లో ఒకరు అజంగఢ్ జిల్లాలోని సంజర్‌పూర్ ప్రాంతానికి చెందినవారని ఆదిత్యనాథ్ ఈ జంట ప్రశ్నను పోస్ట్ చేశారు.

“కోర్టు చారిత్రాత్మకమైన తీర్పును వెలువరించింది.  38 మంది దోషులకు మరణశిక్ష విధించింది. ఉగ్రవాదుల్లో ఒకరు అజంగఢ్‌లోని సంజర్‌పూర్ ప్రాంతానికి చెందినవారు” అని ఆదిత్యనాథ్ ర్యాలీలో పేర్కొన్నారు. తీవ్రవాదులలో ఒకరి తండ్రికి సమాజ్‌వాదీ పార్టీతో సంబంధాలు ఉన్నాయని,  అతను ఆ పార్టీ  కోసం ప్రచారం చేస్తున్నాడని తెలిపారు.

న్యూఢిల్లీలోని బీజేపీ ప్రధాన కార్యాలయంలో విలేకరుల సమావేశంలో ప్రసంగించిన కేంద్ర మంత్రి అనురాగ్ ఠాకూర్ శనివారం అహ్మదాబాద్ పేలుళ్ల దోషుల్లో ఒకరి తండ్రి ఎస్పీ అధినేత అఖిలేష్ యాదవ్‌తో కలిసి నిలబడి ఉన్న ఫోటోను విడుదల చేశారు  అహ్మదాబాద్ పేలుళ్ల నిందితులతో ఆ పార్టీకి సంబంధాలు ఉన్నట్లు ఆరోపించారు.

సమాజ్‌వాదీ పార్టీ ప్రభుత్వ హయాంలో సైఫాయ్ (అఖిలేష్ యాదవ్ స్వస్థలం) మహోత్సవ్ మాత్రమే నిర్వహించేవారు. “ఈ మహోత్సవంలో భాష లేదా భావాలు లేవు కాబట్టి నిర్వాహకులకు మహోత్సవం ప్రాముఖ్యత తెలియదు. బిజెపి ప్రభుత్వం అయోధ్యలో దీపోత్సవ్, మధురలో రంగోత్సవ్, కాశీలో దేవ్ దీపావళిని నిర్వహించింది.  మా విశ్వాసం వీటితో ముడిపడి ఉంది”  అని తెలిపారు.

కరోనా వ్యాక్సిన్‌పై “తప్పుడు” ప్రచారం చేసారంటూ  అఖిలేష్ యాదవ్‌పై ఆదిత్యనాథ్ మండిపడ్డారు.  మహమ్మారి సమయంలో బిజెపి ఎంపీలు, ఎమ్మెల్యేలు, పార్టీ కార్యకర్తలు ప్రజలకు సహాయం చేశారని చెబుతూ ఆ సమయంలో అఖిలేష్ ఎక్కడున్నారని ప్రశ్నించారు.

అఖిలేశ్ ‘నేటి ఔరంగజేబు’

సమాజ్‌వాదీ పార్టీ అధినేత  అఖిలేశ్ యాదవ్‌ను ఆధునిక ఔరంగజేబు అని మధ్యప్రదేశ్ ముఖ్యమంత్రి శివరాజ్ సింగ్ చౌహాన్ విమర్శించారు. “ అఖిలేశ్ నేటి ఔరంగజేబు. ఆయన తన తండ్రికే విశ్వాసపాత్రుడిగా ఉండలేదు, ఇక మీకు ఎలా విశ్వాసపాత్రుడిగా ఉండగలడు?” అని ఉత్తరప్రదేశ్‌లోని డియోరియా జిల్లాలో ఎన్నికల ప్రచారం చేస్తూ ప్రశ్నించారు.

“ ఔరంగజేబు తన తండ్రినే కారాగారంలో పడేశాడు. సోదరులను చంపేశాడు. అఖిలేశ్ తనని అగౌరవపరిచినంతగా మరెవరూ తనని అగౌరవ పరచలేదని ఒకప్పుడు ములాయం సింగే  అన్నారు” అని ధ్వజమెత్తారు.  అఖిలేశ్‌ను మొగల్ చక్రవర్తి ఔరంగజేబుతో పోల్చడం ఇదే తొలిసారి కాదు. 2019 లోక్‌సభ ఎన్నికలప్పుడు కూడా ఉత్తరప్రదేశ్ ముఖ్యమంత్రి యోగి ఆదిత్యనాథ్ ఆయన్ని ఔరంగజేబుతో పోల్చారు.

 “ఔరంగజేబు తన తండ్రి షా జహాన్‌ను జైలులో వేసి అధికారాన్ని హస్తగతం చేసుకున్నాడు” అని పేర్కొన్నారు. “ఔరంగజేబులా తన తండ్రినే పదవీచ్యుతుడిని చేసిన వ్యక్తి, బద్ధ శత్రువుతో చేతులు కలిపాడు. మే 23 తర్వాత మళ్లీ వారు ఒకరినొకరు దూషించుకుంటారు. ఈ కలగూరగంప మనుషులు (మహామిలావటి పీపుల్) వరదలప్పుడు కలుసుకునే తేళ్లు, కప్పలు, పాముల వలే ప్రవర్తిస్తున్నారు” అని యోగి మూడేళ్ల కిందటే ట్వీట్ చేశారు.

 అఖిలేశ్ యాదవ్‌ను ఔరంగజేబుతో పోల్చడం అన్నది 2016లో మొదలయింది. సమాజ్‌వాదీ పార్టీపై నియంత్రణ సాధించేందుకు అఖిలేశ్ యాదవ్ తన పిన్నాన్న శివపాల్ యాదవ్‌తో నాడు తీవ్రంగా విభేదించారు.