క‌రీనా కపూర్‌, అమృతా అరోరాలకు క‌రోనా

బాలీవుడ్ న‌టులు క‌రీనా క‌పూర్ ఖాన్‌, అమృతా అరోరాకు క‌రోనా వైర‌స్ సంక్ర‌మించింది. కరోనా ప‌రీక్ష‌లో వాళ్లు పాజిటివ్‌గా తేలారు. ఇద్ద‌రూ కరోనా ప్ర‌వ‌ర్త‌నా నియ‌మావ‌ళిని ఉల్లంఘించిన‌ట్లు బృహ‌న్‌ముంబై మున్సిప‌ల్ కార్పొరేష‌న్ తెలిపింది. 

ఆ ఇద్ద‌రూ ప‌లు పార్టీల‌కు హాజ‌ర‌య్యారు. ఈ ఇద్ద‌రు న‌టుల‌తో కాంటాక్ట్‌లోకి వ‌చ్చిన వాళ్లంద‌రూ క‌రోనా ప‌రీక్ష‌లు చేయించుకోవాల‌ని బీఎంసీ సూచించింది. అంద‌రూ ఆర్టీ-పీసీఆర్ ప‌రీక్ష‌లు చేయించుకోవాల‌ని మున్సిప‌ల్ కార్పొరేష‌న్ కోరింది. అయితే క‌రీనా, అమృతాకు సోకింది ఒమిక్రాన్ వేరియంట్ అవునా కాదా అన్న విష‌యం ఇంకా తెలియ‌దు.

కాగా,  ఇప్పటి వరకూ దేశంలో నమోదైన ఒమిక్రాన్ కేసుల్లో అధిక భాగం మహారాష్ట్రలోనే వెలుగు చూశాయి. ఈ క్రమంలో ఇక్కడ తాజాగా మరో రెండు ఒమిక్రాన్ కేసులు నమోదైనట్లు ఆరోగ్యశాఖ అధికారులు వెల్లడించారు. ఈమేరకు సోమవారం నాడు ఒక ప్రకటన చేశారు. తాజా కేసులతో మహారాష్ట్రలో ఇప్పటి వరకూ నమోదైన ఒమిక్రాన్ కేసుల సంఖ్య 20కి చేరింది.