ఏపీ ఆర్ధిక వ్యవహారాల అరాచకంకు కేంద్రం కట్టడి

కొత్తగా విడుదల చేసిన మార్గదర్శక సూత్రాల ప్రకారం కేంద్ర నిధులను వేరే ఖాతాలకు, పిడి ఖాతాలకు మళ్లిస్తూ దుర్వినియోగం చేస్తున్న ఏపీ ప్రభుత్వ వ్యవహారాలను కట్టడి చేయడం ప్రారంభించింది. ఇక నుండి కేంద్రం ఏ పథకాలకు నిధులు ఇస్తే వాటికే ఖర్చుచేయాల్సి ఉంటుంది. కేంద్రం ఇచ్చిన వాటా నిధులు ఖర్చుచేసి ఆ పథకంలో రాష్ట్ర వాటా తర్వాత చెల్లిస్తామన్నా అవకాశం ఉండదు. కేంద్రం నిధుల వినియోగానికి సంబంధించిన విధానాన్ని మార్చేసింది. కొత్త మార్గదర్శకాలతో రాష్ట్ర ప్రభుత్వాలతో చర్చించాక ఖరారు చేసింది.

ఇలా ఉండగా, అప్పుల కుప్పగా ఆంధ్రప్రదేశ్ మారిందిని పేర్కొంటూ ఏపీ ఆర్ధిక వ్యవహారాల తీరుపై పార్లమెంట్ వేదికగా కేంద్రం తన అసంతృప్తిని బహిరంగ పరచింది. ఆదాయానికి మించి అప్పులు చేయడంలో ఏపీ అగ్రభాగాన ఉందని కేంద్రం పేర్కొంది.

రాజ్యసభలో టీడీపీ ఎంపీ కనకమేడల రవీంద్ర కుమార్ అడిగిన ప్రశ్నలకు కేంద్ర ఆర్ధిక శాఖ సహాయ మంత్రి పంకజ్‌ చౌదరి లిఖిత పూర్వకంగా ఇచ్చిన సమాధానంలో పార్లమెంటు సాక్షిగా ఏపీకి కేంద్ర ఆర్థికశాఖ అక్షింతలు వేసింది.  2020-21 సంవత్సరానికి రు.54,369.18 కోట్ల ఆర్థిక లోటు ఉందని రాష్ట్ర ప్రభుత్వమే ఒప్పుకుందని కేంద్రం తెలియజేసింది. 15వ ఆర్ధిక సంఘం అనుమతి మేరకు 2020-21 ఆర్ధిక సంవత్సరానికి రూ. 30,305 కోట్ల అప్పునకు అనుమతి కోరిందని కేంద్రం పేర్కొంది.

కొవిడ్‌ కారణంగా మరో రూ.19,192 కోట్ల అప్పునకు అనుమతిచ్చినట్లు కేంద్ర ఆర్థికశాఖ తెలిపింది. 2020-21 ఆర్థిక సంవత్సరానికి రూ. 49,497 కోట్ల అప్పులు తెచ్చుకునేందుకు అనుమతులు ఇచ్చామని పేర్కొంది. పరిమితికి మించి ఏపీ రూ.4,872 కోట్ల అప్పు చేసినట్లు కేంద్రం వెల్లడించింది.