21 మంది పోలీస్ అధికారులపై 1100 ప్రశ్నలను సంధించిన ఎబివి 

తన తరఫున తానే వాదించుకుని సాక్షులను ప్రశ్నలడిగారు. ఆదివారం చివరి రోజు విచారణ ముగిసిన అనంతరం ఆయన వెలగపూడి సచివాలయం వద్ద విలేకరులతో మాట్లాడారు. 14 రోజులుగా కొనసాగిన విచారణ పూర్తయిందని.. తాను కూడా సాక్ష్యం ఇచ్చానని తెలిపారు. తనపై వచ్చిన అభియోగాలపై తానే వాదించుకున్నానని.. తన వాదన మొత్తం కమిషనర్‌ సావధానంగా విన్నారని వెల్లడించారు. సాక్షులను తానే క్రాస్‌ ఎగ్జామినేషన్‌ చేశానని.. కొందరు సంతృప్తిగా సమాధానం చెప్పారని.. ఇంకొందరు వారికి నచ్చినట్లుగా చెప్పారని తెలిపారు.

వివరాలు, వాస్తవాలు అన్నీ రికార్డు అయ్యాయని.. కమిషనర్‌ వాస్తవాలను పరిశీలించి త్వరలోనే తన నిర్ణయం చెబుతారని పేర్కొన్నారు. తన కేసులో కొన్ని కృత్రిమ డాక్యుమెంట్లు, ఫోర్జరీ మెయిల్స్‌ సృష్టించారని, వీటన్నింటిపైనా అవసరమైతే రాష్ట్ర ప్రభుత్వానికి లేఖ రాస్తానని ఏబీ తెలిపారు. ఇంతకూ ఈ కేసులో మీరేం చెప్పదలచుకున్నారని ప్రశ్నించగా.. ఆయన కొద్దిసేపు మౌనంగా ఉండిపోయారు. కళ్లలో కన్నీటి జీర కనిపించింది.

‘నా వాదనకు ఇంత అవకాశమిచ్చిన సుప్రీంకోర్టుకు రుణపడి ఉంటాను. సుప్రీంకోర్టుకు కూడా వెళ్లి వాదనలు వినిపించుకునే అవకాశమిచ్చిన రాష్ట్ర ప్రభుత్వానికీ కృతజ్ఞతలు’ అని తెలిపారు. నిఘా పరికరాల కొనుగోలు వ్యవహారమంతా డీజీపీ కార్యాలయానికి.. ప్రత్యేకించి ఆ కార్యాలయంలోని పీఅండ్‌ఎల్‌ విభాగానికి సంబంధించిందని పేర్కొన్నారు.

‘ ఏసీబీ చేసిన విచారణలో సాక్షుల్ని బెదిరించారు. తప్పుడు సమాచారంతో నివేదికలు పంపించారు. తప్పుడు సాక్ష్యాలు సృష్టించాలని విఫల యత్నం చేశారు. దీంతో సంబంధం లేని వ్యక్తుల వ్యవహారాల్లోకి కూడా అక్రమంగా చొరబడ్డారు. మీడియాలో ప్రభుత్వ విభాగాలే తప్పుడు ప్రచారం చేశాయి. తప్పుడు సాక్ష్యాన్ని సృష్టించేందుకు ఒక ఈ-ఫైల్‌ను విచారణ సందర్భంగా తయారుచేసేశారు’ అంటూ ఆరోపించారు.