రాష్ట్రీయ స్వయంసేవక్ సంఘ్ (ఆర్ఎస్ఎస్)ను భారతదేశ అమర సంస్కృతికి చిహ్నంగా పేర్కొంటూ ఆధునిక ‘అక్షయ వట వృక్షం’ అని ప్రధాని నరేంద్ర మోదీ అభివర్ణించారు. దేశంలోని వివిధ రంగాలు, ప్రాంతాలలో ఆర్ఎస్ఎస్ స్వచ్ఛంద సేవకులు చేస్తున్న నిస్వార్థ సేవను ఆయన ప్రశంసించారు. దేశ నిర్మాణం, సామాజిక సేవ, సాంస్కృతిక పరిరక్షణలో వారి పాత్రను కొనియాడారు.
నాగ్‌పూర్‌లో మాధవ్ నేత్రాలయ ప్రీమియం సెంటర్ శంకుస్థాపన సందర్భంగా ప్రధానమంత్రి మోదీ మాట్లాడుతూ, “…వంద సంవత్సరాల క్రితం నాటబడిన ఆలోచనలు నేడు ప్రపంచం ముందు ‘వట వృక్షం’ లాగా ఉన్నాయి. సూత్రాలు, సిద్ధాంతాలు దానికి ఔన్నత్యాన్ని ఇస్తాయి. లక్షలాది మంది స్వయంసేవకులు దాని శాఖలు. ఇది సాధారణ ‘వట వృక్షం’ కాదు, కానీ ఆర్ఎస్ఎస్ భారతదేశ అమర సంస్కృతికి ఆధునిక ‘అక్షయ వట వృక్షం’..” అని స్పష్టం చేశారు.
గుడి పద్వా సందర్భంగా ప్రజలకు ఆయన శుభాకాంక్షలు తెలుపుతూ “చాలా శుభప్రదమైన పండుగలు ప్రారంభమవుతున్నాయి. భారతదేశంలోని వివిధ ప్రాంతాలలో గుడి పడ్వా, ఉగాది, నవ్రేహ్ పండుగలు జరుపుకుంటున్నారు. ఈ సంవత్సరం ఆర్ఎస్ఎస్ శతాబ్ది సంవత్సరం. స్మృతి మందిర్‌లో నివాళులర్పించే అవకాశం నాకు లభించింది” అని తెలిపారు.
“ఇటీవలే భారత స్వాతంత్ర్యం 75వ వార్షికోత్సవాలను కూడా జరుపుకున్నాము. వచ్చే నెలలో బిఆర్ అంబేద్కర్ జయంతి ఉంది. నేను దీక్షభూమిలో గుర్తుచేసుకుని ఆశీస్సులు తీసుకున్నాను. నవరాత్రి, ఇతర పండుగలకు ప్రజలకు శుభాకాంక్షలు తెలియజేయాలనుకుంటున్నాను” అని ఆయన చెప్పారు.
పేదలలోని పేదలకు ఉత్తమ వైద్య చికిత్సను నిర్ధారించడం ప్రభుత్వ విధానం అని ఆయన స్పష్టం చేశారు. సమాజంలోని వెనుకబడిన వర్గాలకు నాణ్యమైన వైద్య సౌకర్యాలను అందించే లక్ష్యంతో వివిధ కార్యక్రమాలను చేపడుతున్నట్లు తెలుపుతూ, సరసమైన ఆరోగ్య సంరక్షణకు ప్రభుత్వం కట్టుబడి ఉందని ఆయన పునరుద్ఘాటించారు. ఆయుష్మాన్ భారత్ పథకం కారణంగా కోట్లాది మంది ఉచిత వైద్య చికిత్స పొందుతున్నారని ప్రధాని మోదీ పేర్కొన్నారు.
“దేశంలోని పౌరులందరికీ మెరుగైన ఆరోగ్య సౌకర్యాలు అందించడం మా ప్రాధాన్యత. నేడు, ఆయుష్మాన్ భారత్ కారణంగా, కోట్లాది మందికి ఉచిత చికిత్స సౌకర్యం లభిస్తుంది. వేలాది జన ఔషధి కేంద్రాలు దేశంలోని పేద, మధ్యతరగతి కుటుంబాలకు చౌకగా మందులు అందిస్తున్నాయి. దీనివల్ల దేశవాసులకు వేల కోట్ల రూపాయలు ఆదా అవుతోంది” అని ప్రధాని తెలిపారు.
“గత 10 సంవత్సరాలలో, లక్షలాది ఆయుష్మాన్ ఆరోగ్య మందిరాలు గ్రామాల్లో నిర్మించబడ్డాయి. ఇక్కడ ప్రజలు ప్రాథమిక చికిత్స పొందుతున్నారు” అని ప్రధాని మోదీ చెప్పారు. “మేము వైద్య కళాశాలల సంఖ్యను రెట్టింపు చేయడమే కాకుండా దేశంలో పనిచేస్తున్న ఎయిమ్స్ (ఆల్ ఇండియా ఇన్స్టిట్యూట్ ఆఫ్ మెడికల్ సైన్సెస్) సంఖ్యను కూడా మూడు రెట్లు పెంచాము. అదనంగా, వైద్య సీట్ల సంఖ్యను కూడా రెట్టింపు చేసాము” అని వివరించారు.
అర్హత కలిగిన వైద్యులు ప్రజలకు అందుబాటులో ఉండేలా చూడటం ద్వారా సమాజానికి సేవ చేయడమే తమ ప్రభుత్వ లక్ష్యం అని చెప్పారు. విద్యార్థుల మాతృభాషలో వైద్య విద్యను అందించాలని తాము సాహసోపేతమైన నిర్ణయం తీసుకున్నామని పేర్కొంటూ, ఇది వెనుకబడిన నేపథ్యాల పిల్లలు కూడా వైద్య వృత్తిని కొనసాగించగలదని నిర్ధారి స్తుందని తెలిపారు.
నాగ్‌పూర్‌లోని మాధవ్ నేత్రాలయ ఐ ఇన్స్టిట్యూట్ & రీసెర్చ్ సెంటర్ కొత్త విస్తరణ భవనమైన మాధవ్ నేత్రాలయ ప్రీమియం సెంటర్‌కు ప్రధాని మోదీ శంకుస్థాపన చేశారు. ఈ కార్యక్రమంలో ఆర్ఎస్ఎస్ సర్ సంఘచాలక్ డా. మోహన్ భగవత్ పాల్గొన్నారు. ఈ పర్యటనలో మహారాష్ట్ర ముఖ్యమంత్రి దేవేంద్ర ఫడ్నవీస్, కేంద్ర మంత్రి నితిన్ గడ్కరీ కూడా పాల్గొన్నారు.
2014లో స్థాపించిన ఈ కేంద్రం నాగ్‌పూర్‌లో ఉన్న ఒక ప్రముఖ సూపర్-స్పెషాలిటీ ఆప్తాల్మిక్ కేర్ సౌకర్యంను దివంగత ఆర్ఎస్ఎస్ సర్ సంఘచాలక్ మాధవ్‌రావు సదాశివరావు గోల్వాల్కర్ (గురూజీ) జ్ఞాపకార్థం నెలకొల్పారు. ఈ ప్రాజెక్టులో ప్రజలకు సరసమైన, ప్రపంచ స్థాయి కంటి సంరక్షణ సేవలను అందించే లక్ష్యంతో 250 పడకల ఆసుపత్రి, 14 అవుట్ పేషెంట్ విభాగాలు, 14 మాడ్యులర్ ఆపరేషన్ థియేటర్లు ఉంటాయి.
More Stories
కోల్‌కతాలో భారీ వర్షం… విద్యుత్ షాక్ లకు 9 మంది మృతి
మల్లోజుల వేణుగోపాల్‌ ద్రోహి.. మావోయిస్టు కేంద్ర కమిటీ ప్రకటన
ప్రకృతితో సమతుల్యతతో జీవించడమే ఆయుర్వేదం