బంగ్లాలో రోహింగ్యా శరణార్థుల సహాయాన్ని తగ్గించిన ఐరాస 

బంగ్లాదేశ్‌లోని రోహింగ్యా శరణార్థులు తీవ్రమైన ఆహార సంక్షోభాన్ని ఎదుర్కొనున్నారు. నిధుల కొరత కారణంగా ఐక్యరాజ్య సమితి ప్రపంచ ఆహార కార్యక్రమం శరణార్థులకు అందించే రేషన్‌ను సగానికి తగ్గిస్తున్నట్లు ప్రకటించింది. దాదాపు పది లక్షల మంది రోహింగ్యా శరణార్థులు  బంగ్లాదేశ్‌లోని  శిబిరాలలో  నివసిస్తున్నారు. 

వీరిలో చాలా మంది 2017లో మయన్మార్ సైనిక దాడుల కారణంగా బంగ్లాదేశ్‌కు తరలివచ్చారు. రోహింగ్యాలు ప్రధానంగా ఆహార సహాయంపై ఆధారపడి ఉన్నారు. ఉపాధి అవకాశాలేమీ లేకపోవడంతో పోషకాహార లోపం తీవ్రమవుతోంది. నిధుల కొరత కారణంగా ప్రతి వ్యక్తికి అందించే నెలవారీ ఆహార వోచర్ 12.50డాలర్ల నుండి 6 డాలర్లకు తగ్గించనున్నారు. 

ఈ కోత తీవ్ర పోషకాహార సంక్షోభానికి దారితీయవచ్చని నిపుణులు హెచ్చరిస్తున్నారు. బంగ్లాదేశ్ శరణార్థి సంస్థ కమ్యూనిటీ నాయకులతో చర్చలు జరపనుంది. దేశం ఇప్పటికే శరణార్థుల నిర్వహణలో తీవ్ర కష్టాలు ఎదుర్కొంటోంది. 7,50,000 మంది రోహింగ్యాలు మయన్మార్ సైనిక దాడుల కారణంగా బంగ్లాదేశ్‌కు తరలివచ్చారు.

వారికి హత్యలు, అత్యాచారాలు, ఇళ్లు దహనం చేయడం వంటి అమానుష ఘటనలు ఎదురయ్యాయి. ఐరాస ఈ దాడులను మారణహోమంగా గుర్తించి దర్యాప్తు కొనసాగిస్తోంది. మయన్మార్ పాలకులు ఇప్పటికీ రోహింగ్యాల హక్కులను తిరస్కరిస్తున్నారు.

మయన్మార్‌లో పరిస్థితి మెరుగుపడకపోవడం వల్ల రోహింగ్యాల తిరుగు ప్రయాణం సాధ్యం కాకపోవచ్చు. బంగ్లాదేశ్ ప్రభుత్వం ఇతర దేశాల్లో పునరావాసం కల్పించాల్సిన అవసరం ఉందని సూచిస్తుంది. జనవరిలో ఇండోనేషియాకు 250 మంది రోహింగ్యాలు ప్రమాదకరమైన సముద్ర ప్రయాణం ద్వారా చేరుకున్నారు. 

శిబిరాలలో జీవిత స్థితిగతులు దారుణంగా మారడంతో రోహింగ్యాలు ఇతర దేశాలకు వెళ్లేందుకు ప్రాణాల మీదకు తెచ్చుకుంటున్నారు. రోహింగ్యా శరణార్థుల సంక్షోభం మరింత తీవ్రతరం అవుతుంది.  ఐరాస ఆహార సహాయ కోతలు శరణార్థుల జీవన ప్రమాణాలను మరింత దిగజార్చే ప్రమాదం ఉంది. జాతీయ, అంతర్జాతీయ మద్దతు లేకపోతే రోహింగ్యాల పరిస్థితి మరింత విషమించవచ్చు.