* హిందువులకు కొత్త ప్రవర్తనా నియమావళి!

300 పేజీలున్న ఈ నియమావళిలోని అంశాలను విశ్వహిందూ పరిషత్‌ ఆధ్వర్యంలో శనివారం నుంచి జరిగే సమావేశంలో రుషులు, స్వాములు, మతపెద్దలతో చర్చిస్తారు. సాధువులు సహా శంకరాచార్యులు ధ్రువీకరించిన తర్వాత వేలాదిగా ముద్రించిన ప్రతులను మహాకుంభమేళాలో భక్తులకు పంపిణీ చేస్తారు. గత 15 ఏళ్లుగా దేశవ్యాప్తంగా సాధువులు, వైదిక పండితులతో సమాలోచనలు జరిపిన అనంతరం తయారు చేశారు.

అందులోని అంశాలను ఇంకా ప్రకటించినప్పటికీ  సనాతన ధర్మ అనుచరులు తమ సామాజిక, ఆధ్యాత్మిక జీవితాలలో ఏ విధంగా వ్యవహరించాలో వివరిస్తుందని అఖిల భారత సంత్ సమితి ప్రధాన కార్యదర్శి జితేంద్రనంద సరస్వతి తెలిపారు.

కొత్త హిందూ ప్రవర్తనా నియమావళి రాత్రిపూట జరిగే వివాహాల కన్నా సూర్యుని సమక్షంలో పగటిపూట పెండ్లిండ్లు చేసుకోవాలని సూచిస్తుందని, అలాగే ఆడ శిశు హత్యలను, మహిళల నుంచి కట్నం స్వీకరించడాన్ని వ్యతిరేకిస్తుందని తెలిపారు. పురుషులతో సమానంగా మహిళలను గౌరవించాలని, వారు యజ్ఞ, యాగాదులు వంటివి చేయడానికి అర్హులేనని, అంటరానితనాన్ని వ్యతిరేకిస్తుందని, అన్ని కులాల వారికి ఆలయ ప్రవేశం కల్పించాలని కోరుతుందని ఆయన చెప్పారు.

కాగా, పది రోజులుగా కొనసాగుతున్న మహా కుంభమేళాలో త్రివేణి సంగమంలో పవిత్ర స్నానాలు ఆచరించిన భక్తుల సంఖ్య గురువారం మధ్యాహ్నానికి 10 కోట్లు దాటిందని యూపీ ప్రభుత్వం ప్రకటించింది. కాగా, కుంభమేళ జరుగుతున్న ప్రాంతం నుంచి దాదాపు 300 అక్రమ వంట గ్యాస్‌ సిలిండర్లను అగ్నిమాపక శాఖ గురువారం స్వాధీనం చేసుకుంది.