అధికారంలోకి రాగానే హైదరాబాద్‌ పేరు మారుస్తాం

అధికారంలోకి రాగానే.. భాగ్యనగరం అని హైదరాబాద్‌ పేరు మారుస్తామని కేంద్ర మంత్రి, రాష్త్ర బిజెపి అధ్యక్షుడు జి. కిషన్ రెడ్డి వెల్లడించారు. మద్రాస్ చెన్నైగా, కలకత్తాను కోల్ కతాగా మార్చినపుడు, బాంబే పేరు ముంబైగా మార్చినపుడు  హైదరాబాద్ పేరు మార్చడంలో తప్పేముందని ఆయన ప్రశ్నించారు.

రాజ్ పథ్‌ను కర్తవ్యపథ్ గా మార్చామన చెబుతూ ఇది ఎవరికీ వ్యతిరేకం కాదన్నాని స్పష్టం చేశారు. బానిస మనస్తత్వానికి ప్రతీకలను తొలగించి ప్రజల ఆత్మగౌరవానికి అనుగుణంగా పేర్లు తీసుకురావడం తప్పేం లేదని తేల్చి చెప్పారు. ముస్లింలపై తమకు కోపం లేదని, వారి సంక్షేమం జరగాలనేదే తమ ఆలోచన అని తెలిపారు. 

అయితే, ముస్లింలను అడ్డుపెట్టుకుని రాజకీయాలు చేస్తున్న మజ్లిస్ పార్టీపైనే కోపం ఉందని పేర్కొన్నారు. కాగా,  రైతుబంధుపై కాంగ్రెస్, బీఆర్ఎస్ డ్రామాలాడుతున్నాయని  కిషన్ రెడ్డి ఆరోపించారు. వర్తమానంలో జరిగే ఏ సంక్షేమ కార్యక్రమాన్ని రద్దు చేయడం, చేయాలని బీజేపీ అడడదని స్పష్టం చేశారు. కిసాన్ సమ్మాన్ నిధిని విజయవంతంగా రైతుల ఖాతాల్లో వేశామని, అదే సమయంలో వివాదాలకు ఎక్కడా తావు ఇవ్వలేదని గుర్తు చేశారు.