అత్యాచార వీడియోల వ్యాప్తి కట్టడిపై `సుప్రీం’ సంతృప్తి

సామాజిక మాధ్యమాల్లో చిన్నారులకు సంబంధించిన అశ్లీల దృశ్యాలు, అత్యాచార వీడియోల వ్యాప్తిని నియంత్రించాలంటూ దాఖలైన ప్రజా ప్రయోజన వ్యాజ్యంపై విచారణను సుప్రీం కోర్టు మూసివేసింది. ఈ అంశంలో సుప్రీం కోర్టు నియమించిన నిపుణుల కమిటీ ఇచ్చిన నివేదికను పరిశీలించిన న్యాయస్థానం వీడియోల వ్యాప్తి కట్టడి చర్యల్లో గణనీయమైన పురోగతి సాధించినట్టు గుర్తించింది.

ఈ క్రమం లోనే ఈ కేసులో విచారణను ముగిస్తున్నట్టు తెలిపింది. వాట్సప్ సహా ఇతర సామాజిక మాధ్యమాల్లో ఛైల్డ్ పోర్నోగ్రఫీ, అత్యాచార ఘటనల వీడియోలు విచ్చల విడిగా వ్యాప్తి చెందుతుండటంపై “ప్రజ్వల” అనే స్వచ్ఛంద సంస్థ 2015 లో అప్పటి సీజేఐ హెచ్‌ఎల్ దత్తుకు లేఖ రాసింది.  ఈ లేఖ ఆధారంగా సర్వోన్నత న్యాయస్థానం సుమోటోగా పిల్ దాఖలు చేసి విచారణ చేపట్టింది.

ఈ క్రమంలోనే వీడియోల వ్యాప్తిని కట్టడిచేసేలా తగిన చర్యలు తీసుకునేందుకు సుప్రీంకోర్టు ఓ నిపుణుల కమిటీని కూడా ఏర్పాటు చేసింది. ఆ కమిటీ చర్యలను ఎప్పటికప్పుడు న్యాయస్థానం పరిశీలించింది. ఈ కమిటీలో ఫేస్‌బుక్, వాట్సప్ సహా సామాజిక మాధ్యమాల ప్రతినిధులు, ఎలక్ట్రానిక్స్, ఐటీ మంత్రిత్వశాఖ అదనపు కార్యదర్శి, కంప్యూటర్ ఎమర్జెన్సీ రెస్పాన్స్ టీం డైరెక్టర్ జనరల్, సుప్రీం కోర్టు నియమించిన అమికస్ క్యూరీ తదితరులు సభ్యులుగా ఉన్నారు. 

ఈ కమిటీ ఇటీవల తమ నివేదికను కోర్టుకు సమర్పించింది. దీన్ని పరిశీలించిన జస్టిస్ బిఆర్ గవాయ్, జస్టిస్ విక్రమ్ నాథ్‌తో కూడిన డివిజన్ బెంచ్, ఈ విస్తృతమైన అంశంపై ఏకాభిప్రాయానికి వచ్చినట్టు తెలిపింది. వీడియోల వ్యాప్తి కట్టడికి తీసుకుంటున్న చర్యల్లో గణనీయమైన పురోగతి ఉందని పేర్కొంది. 

ఇక చర్యల అమలుకు సంబంధించిన సాంకేతిక అంశాలను మాత్రమే పరిశీలించాల్సి ఉందని, అది కేంద్ర ప్రభుత్వ బాధ్యత అని వెల్లడించింది. ఇక ఈ అంశాన్ని కోర్టు పరిశీలించిన అవసరం లేదని పేర్కొన్న ధర్మాసనం, పిల్ విచారణను మూసివేస్తున్నట్టు తెలిపింది. ఒకవేళ చర్యల అమలు తర్వాత కూడా పరిష్కారం కాకపోతే అప్పుడు మళ్లీ కోర్టును ఆశ్రయించవచ్చని సూచించింది.