రష్యా నౌకపై ఉక్రెయిన్‌ డ్రోన్ల దాడి?

ఉక్రెయిన్‌ యుద్ధ ప్రభావం ఫిన్‌లాండ్‌ సమీప ప్రాంతాలకూ విస్తరిస్తోందని ఆ దేశ ప్రధాని పెటెరి ఓర్పో ఆందోళన వ్యక్తం చేశారు. గల్ఫ్‌ ఆఫ్‌ ఫిన్లాండ్‌లో రష్యాకు చెందిన వాణిజ్య నౌకపై డ్రోన్‌ దాడి జరిగిన నేపథ్యంలో ఆయన ఈ వ్యాఖ్యలు చేశారు. రష్యా దురాక్రమణకు వ్యతిరేకంగా పోరాడే హక్కు ఉక్రెయిన్‌కు ఉందని స్పష్టం చేశారు.

గల్ఫ్‌ ఆఫ్‌ ఫిన్లాండ్‌లో రష్యా వాణిజ్య నౌకపై డ్రోన్‌ దాడి జరిగిన ఘటనను అక్కడి అధికారులు పర్యవేక్షిస్తున్నారని తెలిపారు. ఉక్రెయిన్‌ ప్రయోగించినట్లు అనుమానిస్తున్న డ్రోన్లు రష్యా నౌకను లక్ష్యంగా చేసుకున్నట్లు సమాచారం. దాడికి గురైన నౌకలోని సిబ్బందిని సమీపంలోని మరో సరకు రవాణా నౌకలోకి తరలించారు. వారిని నేరుగా రష్యాకు పంపించనున్నట్లు ఓ మీడియా వెల్లడించింది.

రష్యా సాయుధ దళాలతో సంబంధాలున్నట్లు భావిస్తున్న ‘స్పార్టా-2’ నౌక ప్రస్తుతం ఫిన్‌లాండ్‌లోని దక్షిణ ప్రాంత పట్టణమైన లోవీసా తీరానికి సమీపంలో లంగరు వేసి ఉంది. సముద్రంలోనే మంటలను అదుపు చేసే చర్యలు కొనసాగుతున్నాయి. ఫిన్‌లాండ్‌ బోర్డర్‌ గార్డ్‌ అభ్యర్థన మేరకు రష్యాకు చెందిన ‘ముర్మాన్‌’ రక్షణ నౌక కూడా సహాయక చర్యల్లో పాల్గొంటోందని అధికారులు వెల్లడించారు.

శనివారం ఉదయం అంతర్జాతీయ జలాల్లో రష్యా నౌకను లక్ష్యంగా చేసుకుని డ్రోన్‌ దాడి జరిగినట్లు తమ బలగాలు గుర్తించాయని ఫిన్‌లాండ్‌ రక్షణ శాఖ ప్రకటించింది. ప్రాథమిక సమాచారం ప్రకారం నౌక దెబ్బతిన్నట్లు తెలిపింది. ఘటన నేపథ్యంలో ఫిన్‌లాండ్‌ బోర్డర్‌ గార్డ్‌ బృందాలను అక్కడికి పంపించారు. ఫిన్‌లాండ్‌ గస్తీ విమానం తీసిన చిత్రాల్లో నౌక వెనుక భాగం నుంచి మంటలు, దట్టమైన పొగ వెలువడుతున్నట్లు కనిపించిందని సమాచారం. 

ఫిన్‌లాండ్‌ తీరంలోని లోవీసా ప్రాంతానికి సమీపంలో, గోగ్‌లాండ్‌ ద్వీపానికి పశ్చిమాన ఈ దాడి జరిగినట్లు అధికారులు గుర్తించారు. దీంతో గల్ఫ్‌ ఆఫ్‌ ఫిన్లాండ్‌ తూర్పు ప్రాంతంలో గగనతల, సముద్ర రవాణాపై తాత్కాలిక ఆంక్షలు విధించారు. రష్యా నౌక ‘స్పార్టా-2’పై జరిగిన ఘటనను ఫిన్‌లాండ్‌ అధ్యక్షుడు అలెగ్జాండర్‌ స్టబ్‌ తీవ్రంగా పరిగణిస్తున్నట్లు తెలిపారు.

 పరిణామాలపై దేశ విదేశాంగ, భద్రతా విధానాల ఉన్నతాధికారులు, రక్షణ దళాలు, బోర్డర్‌ గార్డ్‌ విభాగాలతో నిరంతరం సంప్రదింపులు జరుపుతున్నట్లు వెల్లడించారు. ఈ ఘటన గురించి తమ కీలక భాగస్వామ్య దేశాలు, మిత్రదేశాలకు సమాచారం అందించినట్లు ఎక్స్‌లో పేర్కొన్నారు. అధికారులు వేగంగా, వృత్తిపరంగా స్పందించారని ప్రశంసించారు. దేశ భద్రతకు ఎలాంటి ముప్పు కలగకుండా అవసరమైన చర్యలు తీసుకుంటున్నామని భరోసా ఇచ్చారు.

About The Author