అమెరికాలో ఉన్నట్టుండి నిలిచిపోయిన విమాన సర్వీసులు

2001 సెప్టెంబర్‌ 11 ఉగ్రదాడుల తర్వాత అమెరికాలో దేశవ్యాప్తంగా విమానాల బయలుదేరడాన్ని నిలిపివేయడం ఇది రెండోసారి. 2023 జనవరిలోనూ ఎఫ్‌ఏఏకు చెందిన పైలట్ల భద్రతా సమాచార వ్యవస్థలో సాంకేతిక లోపం తలెత్తడంతో దేశీయ విమానాల టేకాఫ్‌లను తాత్కాలికంగా నిలిపివేశారు. అప్పట్లో దాదాపు రెండు గంటలలోపే ఆంక్షలు ఎత్తివేశారు. 

తాజాగా మరోసారి కమ్యూనికేషన్‌ వ్యవస్థలో సమస్య తలెత్తడంతో దేశవ్యాప్తంగా  ఈసారి పరిస్థితి మరింత తీవ్రంగా కనిపించింది. విమానాల బయలుదేరడంపై ఆంక్షలు విధించే సమయానికి 4 వేలకుపైగా విమానాలు గాల్లోనే ఉన్నాయి. ఇప్పటికే ప్రయాణంలో ఉన్న విమానాల రాకపోకలు కొనసాగినప్పటికీ, విమానాశ్రయాల నుంచి బయలుదేరాల్సిన సర్వీసులు నిలిచిపోయాయి. 

దీంతో ప్రయాణికులు విమానాశ్రయాల్లో ఇబ్బందులు ఎదుర్కొన్నారు. అమెరికన్‌ ఎయిర్‌లైన్స్‌ కూడా విమాన సర్వీసులపై రోజంతా ప్రభావం ఉండవచ్చని హెచ్చరించింది. అమెరికా కాలమానం ప్రకారం సాయంత్రం 4 గంటల తర్వాత సుమారు 11 వేల విమానాలు బయలుదేరాల్సి ఉండగా, వాటిలో 15 లక్షల మందికిపైగా ప్రయాణికులు ప్రయాణించాల్సి ఉంది. దీంతో విమానాల రద్దు, ఆలస్యం, దారి మళ్లింపులు మరింత పెరిగే అవకాశం ఏర్పడింది.