ఓటములను జీర్ణించుకోలేక వ్యవస్థలను కించపరుస్తున్న కాంగ్రెస్

ఎస్ఐఆర్ ప్రక్రియపై కాంగ్రెస్ పార్టీ పనిగట్టుకుని అవాస్తవాలను ప్రచారం చేస్తోందని ఆయన స్పష్టం చేశారు. దేశంలో 1952 నుంచి ఇప్పటివరకు 11 సార్లు ఎలక్టోరల్ రోల్స్ రివిజన్ జరిగిందని, చివరిసారిగా 2004లో జరిగితే గత 20 ఏళ్లుగా ఈ ప్రక్రియ జరగలేదని గుర్తుచేశారు. బదిలీ అయినవారు, మరణించినవారు, నకిలీ ఓటర్లు, అక్రమ వలసదారుల పేర్లను తొలగించడం ఎన్నికల సంఘం బాధ్యతని పేర్కొన్నారు. గతంలో కేంద్ర హోంమంత్రిగా పనిచేసిన ఇంద్రజిత్ గుప్తా స్వయంగా దేశంలో కోటి 20 లక్షల మంది అక్రమ చొరబాటుదారులు ఉన్నారని పార్లమెంట్‌లో వెల్లడించారని తెలిపారు. 

తెలంగాణలో కాంగ్రెస్ పార్టీ వైఫల్యాలు, ప్రజావ్యతిరేక విధానాలు, అవినీతి, తప్పుడు ప్రచారాలను క్షేత్రస్థాయిలో ఎండగడతామని  రామ్ మాధవ్ స్పష్టం చేశారు. ఇటీవల భాగ్యనగరంలో అమిత్ షా పాల్గొన్న పాదయాత్రకు, అలాగే నిర్మల్ మహాపాదయాత్రకు వేలాదిగా ప్రజలు తరలివచ్చి మద్దతు ప్రకటించారని తెలిపారు. 1990ల నుంచే సుష్మా స్వరాజ్ నాయకత్వంలో తెలంగాణ ఏర్పాటు కోసం పోరాడి తీర్మానం చేసిన ఘనత బీజేపీకే దక్కుతుందని చెప్పారు.

తెలంగాణలో ప్రధాన ప్రతిపక్షంగా చెప్పుకుంటున్న పార్టీ అధినేత రాజకీయంగా ‘ఐరన్ లెగ్’గా మారారని  రామ్ మాధవ్ ఎద్దేవా చేశారు. గతంలో దేశమంతా తిరిగి థర్డ్ ఫ్రంట్ ఏర్పాటు చేస్తానంటూ  ఎవరినైతే కలిశారో-బెంగాల్‌లో మమతా బెనర్జీ, ఒడిశాలో నవీన్ పట్నాయక్, చివరకు ఏపీలో జగన్ మోహన్ రెడ్డి లాంటి నేతలంతా ఓటమి చవిచూశారని, ఆ జాబితాలో చివరకు స్వయంగా ఆయన కూడా అధికారం కోల్పోయి ప్రజల చేతిలో ఔట్ అయ్యారని ఎద్దేవా చేశారు.