భార‌త్‌లో 1500% పెరిగిన బంగారం అక్రమ రవాణా!

అంతర్జాతీయంగా మారుతున్న పరిస్థితులు, దేశంలో పెరిగిన దిగుమతి సుంకాల నేపథ్యంలో భారత్‌లోకి బంగారం అక్రమ రవాణా (స్మగ్లింగ్) ఆందోళనకర రీతిలో పెరిగింది. ఈ ఏడాది జులై-సెప్టెంబర్ త్రైమాసికంలో దేశంలోకి ఏకంగా 50 మెట్రిక్ టన్నుల బంగారం స్మగ్లింగ్ ద్వారా వచ్చిందని ప్రపంచ స్వర్ణ మండలి (డబ్ల్యుజిసి) గణాంకాలు వెల్లడి చేస్తున్నాయి. గత ఏడాది ఇదే త్రైమాసికంలో కేవలం 3 టన్నుల బంగారం మాత్రమే అక్రమ మార్గంలో రాగా, ఈసారి ఏకంగా 1500 శాతం వృద్ధి నమోదు కావడం గమనార్హం.

2023 సంవత్సరం తర్వాత ఈ స్థాయి భారీ మొత్తంలో పసిడి అక్రమ రవాణా జరగడం ఇదే తొలిసారి అని నివేదిక స్పష్టం చేసింది. ప్రపంచంలో బంగారం వినియోగంలో భారత్ రెండవ స్థానంలో ఉందన్న సంగతి తెలిసిందే. పశ్చిమాసియా ఉద్రిక్తతల వల్ల రూపాయి విలువ బలహీనపడటంతో ఫారెక్స్ నిల్వలను కాపాడుకోవడానికి కేంద్ర ప్రభుత్వం దిగుమతి సుంకాలను పెంచింది. ఈ ఏడాది మే నెలలో 6 శాతంగా ఉన్న సుంకాన్ని ఏకంగా 15 శాతానికి పెంచింది.

అధిక సుంకాల వల్ల బంగారం ధర భారంగా మారడంతో, పన్నులు తప్పించుకోవడానికి స్మగ్లర్లు కస్టమ్స్ అధికారుల కళ్లుగప్పి అక్రమ మార్గాల్లో బంగారాన్ని దేశంలోకి తరలిస్తున్నారు. 2012 నుండి 2013 మధ్య కాలంలో బంగారంపై దిగుమతి సుంకాలను పలుమార్లు, ఒక్కోసారి 2 శాతం పాయింట్ల చొప్పున పెంచడంతో 10 శాతానికి చేరుకుంది.

సుమారు ఆరేళ్ల విరామం తర్వాత, 2019 జూలైలో ఈ సుంకాన్ని మరో 2.5 శాతం పాయింట్లు పెంచారు. అప్పటి నుండి, సుంకాల్లో మార్పులు మరింత తరచుగా జరిగాయి. ఇందులో భాగంగా 2021 నుండి 2024లలో సుంకాలను తగ్గించగా, 2022 నుండి 2026లలో గణనీయంగా పెంచారు.

మరోవైపు దేశంలో బంగారం అధికారిక డిమాండ్ గణనీయంగా తగ్గింది. డబ్ల్యుజిసి నివేదిక ప్రకారం .జులై-సెప్టెంబర్ త్రైమాసికంలో బంగారం డిమాండ్ 29 శాతం తగ్గి 162.5 టన్నులుగా నమోదైంది. (2025 ఇదే త్రైమాసికంలో ఇది 229.8 టన్నులుగా ఉండేది). దిగుమతి సుంకాలు, ధరల పెరుగుదలతో పాటు పసిడి కొనుగోళ్లను తగ్గించుకోవాలంటూ ప్రధాని నరేంద్ర మోదీ చేసిన పిలుపు ఇందుకు ప్రధాన కారణాలుగా భావిస్తున్నారు.

పరిమాణం తగ్గినా, రికార్డు ధరల కారణంగా డిమాండ్ విలువ మాత్రం గత ఏడాదితో పోలిస్తే 3 శాతం పెరిగింది. 2026 పూర్తి సంవత్సరానికి దేశంలో బంగారం డిమాండ్ 625 నుండి 675 టన్నుల మధ్య ఉండవచ్చని డబ్ల్యు జి సి అంచనా వేసింది.