పాక్ స్పై నెట్‌వర్క్‌ కేసులో మరో ఇద్దరి అరెస్టు !

భారత నౌకాదళం, రక్షణ సంస్థలకు సంబంధించిన కీలక సమాచారాన్ని సేకరించేందుకు పాకిస్థాన్‌ నిఘా వర్గాలు ప్రయత్నించాయన్న కేసులో ఆంధ్రప్రదేశ్‌ పోలీసులు మరో ఇద్దరిని అరెస్టు చేశారు. భారత సిమ్‌ కార్డులకు వచ్చే వన్‌ టైమ్‌ పాస్‌వర్డ్‌లను (ఓటీపీలు) ఉపయోగించి వాట్సాప్‌ ఖాతాలను యాక్టివేట్‌ చేయడంలో వీరు సహకరించినట్లు ఆరోపణలు ఉన్నాయి. 

బిహార్‌లోని రక్సౌల్‌కు చెందిన రాజ్‌కుమార్‌, ఆదిత్య కుమార్‌ అలియాస్‌ ఆదిత్య కుమార్‌ పాండేలను ఏపీ కౌంటర్‌ ఇంటెలిజెన్స్‌ సెల్‌ అధికారులు అదుపులోకి తీసుకున్నారు. ‘ఆపరేషన్‌ ఫైర్‌వాల్‌–2026’ రెండో దశలో భాగంగా ఈ అరెస్టులు చేసినట్లు బుధవారం విడుదల చేసిన ప్రకటనలో పోలీసులు వెల్లడించారు. పోలీసుల ప్రకటన ప్రకారం రాజ్‌కుమార్‌ పలు భారతీయ మొబైల్‌ నంబర్లకు అనుసంధానమైన వాట్సాప్‌ ఖాతాలను యాక్టివేట్‌ చేసేందుకు అవసరమైన ఓటీపీలను సేకరించి, నేపాల్‌లో ఉన్న మధ్యవర్తుల ద్వారా పాకిస్థాన్‌ నిఘా వర్గాలకు చేరవేసినట్లు ఆరోపణలు ఉన్నాయి. 

సిమ్‌ కార్డుల ఓటీపీల కోసం చెల్లింపులు స్వీకరించేందుకు మరో వ్యక్తి పేరుతో మొబైల్‌ పేమెంట్స్‌ బ్యాంకు ఖాతాను కూడా తెరిచినట్లు దర్యాప్తులో గుర్తించామని పోలీసులు తెలిపారు. ఆ ఖాతాలో గణనీయమైన మొత్తం జమ అయినట్లు పేర్కొన్నారు. ఆదిత్య కుమార్‌ కూడా రాజ్‌కుమార్‌తో పాటు ఇతరులతో కలిసి ఈ కార్యకలాపాల్లో పాల్గొన్నట్లు ఆరోపణలు ఉన్నాయి.

భారత సిమ్‌ కార్డులకు వచ్చే ఓటీపీలతో వాట్సాప్‌ ఖాతాలను యాక్టివేట్‌ చేయడంలో సహకరించడంతో పాటు, వసీం, సుల్తాన్‌, నయీమ్‌ పేర్లతో గుర్తించిన పాకిస్థానీ ఏజెంట్లతో ఎన్‌క్రిప్టెడ్‌ కమ్యూనికేషన్‌ వేదికల ద్వారా సంప్రదింపులు జరిపినట్లు పోలీసులు పేర్కొన్నారు. విశాఖపట్నంలోని తూర్పు నౌకాదళ కమాండ్‌కు చెందిన యుద్ధనౌకలు, జలాంతర్గాములకు సంబంధించిన రహస్య సమాచారాన్ని సేకరించేందుకు పాకిస్థాన్‌ నిఘా కార్యకర్తలు ప్రయత్నించినట్లు ఈ కేసు దర్యాప్తులో వెల్లడైంది.

 ‘సోనీ’, ‘సోనీ క్వీన్‌’ అనే పేర్లతో వ్యవహరించినట్లు ఆరోపణలు ఎదుర్కొంటున్న ఓ వ్యక్తి.. నౌకాదళ అధికారులతో పనిచేసే కాంట్రాక్టు డ్రైవర్‌ అన్నం సాయి వరప్రసాద్‌ ద్వారా సమాచారం పొందేందుకు ప్రయత్నించినట్లు పోలీసులు తెలిపారు. ‘జోషితా పల్‌’ అనే పేరుతో గుర్తించిన మరో నిఘా కార్యకర్త కూడా విశాఖపట్నంలోని సిబ్బందికి డబ్బు ఆశ చూపి రహస్య సమాచారాన్ని సేకరించేందుకు ప్రయత్నించినట్లు ఆరోపణలు ఉన్నాయి. 

ఈ వ్యవహారంలో ఇప్పటికే విశాఖపట్నంలో అన్నం సాయి వరప్రసాద్‌ను అక్టోబర్‌ 1న, విశాఖ నౌకాదళ స్థావరంలో పనిచేసే ఉద్యోగి ప్రదీప్‌ ముఖర్జీని అక్టోబర్‌ 3న అరెస్టు చేశారు. వీరిద్దరూ ప్రస్తుతం విజయవాడ జిల్లా జైలులో ఉన్నట్లు పోలీసులు వెల్లడించారు. నౌకాదళ, రక్షణ సంస్థలను లక్ష్యంగా చేసుకుని గూఢచర్యం జరుగుతోందన్న సమాచారంతో ఏపీ కౌంటర్‌ ఇంటెలిజెన్స్‌ సెల్‌ సెప్టెంబర్‌ 2న కేసు నమోదు చేసింది. 

భారతీయ న్యాయ సంహిత, చట్టవిరుద్ధ కార్యకలాపాల నిరోధక చట్టం (యూఏపీఏ), అధికారిక రహస్యాల చట్టం–1923లోని సంబంధిత నిబంధనల కింద దర్యాప్తు కొనసాగుతోంది. తాజాగా అరెస్టయిన రాజ్‌కుమార్‌, ఆదిత్య కుమార్‌లను విజయవాడలోని సంబంధిత న్యాయస్థానంలో హాజరుపరచగా నవంబర్‌ 10 వరకు జ్యుడీషియల్‌ కస్టడీకి పంపినట్లు పోలీసులు తెలిపారు. ఈ నెట్‌వర్క్‌లో మరెవరైనా ఉన్నారా? ఓటీపీల ద్వారా ఎన్ని ఖాతాలను యాక్టివేట్‌ చేశారు? వాటిని ఏ కార్యకలాపాలకు ఉపయోగించారు? అనే అంశాలపై దర్యాప్తు కొనసాగుతోంది.