జింబాబ్వేపై వన్డే సిరీస్ తొలి మ్యాచ్​లో భారత్‌ ఘన విజయం!

వడోదర వేదికగా జింబాబ్వేతో జరిగిన మొదటి వన్డేలో భారత మహిళా జట్టు 9 వికెట్ల తేడాతో ఘన విజయం సాధించింది. జింబాబ్వే నిర్దేశించిన 197 పరుగుల లక్ష్యాన్ని భారత్ 27.1 ఓవర్లలోనే కేవలం ఒక వికెట్ కోల్పోయి ఛేదించింది. ఓపెనర్ ప్రతీకా రావల్ సెంచరీ (100* పరుగులు)తో అదరగొట్టగా, షఫాలి వర్మ (64 పరుగులు, 33 బంతుల్లోనే) ధనాధన్ ఇన్నింగ్స్​తో చెలరేగింది. జింబాబ్వే బౌలర్లలో ఒలిందర్ చారే 1 వికెట్ దక్కించుకుంది. శతకంతో ఆకట్టుకున్న ప్రతీకకు ప్లేయర్ ఆఫ్ ది మ్యాచ్ అవార్డ్ లభించింది.

స్వల్ప ఛేదనను భారత్ ఘనంగా ఆరంభించింది. స్మృతి మంధాన (32 పరుగులు)- ప్రతీకా రావల్ జట్టుకు మెరుగైన ఆరంభం ఇచ్చారు. ఈ ఇద్దరు తొలి వికెట్​కు 94 పరుగులు జోడించారు. ఒలిందర్ బౌలింగ్​లో 15.3 ఓవర్​ వద్ద స్మృతి క్యాచౌట్​గా వెనుదిరిగింది. అయితే మ్యాచ్​లో జింబాబ్వే సంబరాలు చేసుకున్న ఏకైక మూమెంట్​ అదే. ఆ తర్వాత ప్రతీకకు జతకట్టిన షఫాలీ తొలి నుంచే దూకుడుగా ఆడింది. 

ధనాధన్ ఇన్నింగ్స్​తో స్కోర్ బోర్డును పరుగులు పెట్టించింది. దీంతో భారత్ విజయానికి దగ్గరైంది. ఐదు ఫోర్లు, నాలుగు సిక్స్​లతో 29 బంతుల్లోనే హాఫ్ సెంచరీ పూర్తి చేసింది. అనంతరం బౌండరీతో ప్రతీక సెంచరీ పూర్తి చేసుకుంది. ఆమె 96 బంతుల్లోనే 100 పరుగులు చేసింది. ఇందులో 15 ఫోర్లు ఉన్నాయి. వన్డేల్లో ప్రతీకకు ఇది రెండో సెంచరీ. ఆ తర్వాత ఓవర్ (27.1)​ తొలి బంతికే షఫాలీ ఫోర్ బాది జట్టుకు విజయం అందించింది. ఈ ఇద్దరు రెండో వికెట్​కు అజేయంగా 70 బంతుల్లోనే 106 పరుగులు జోడించారు.