టైగర్ ష్రాఫ్పై కాల్పులు.. మరో నలుగురు అరెస్ట్

ముంబైలోని జుహూ ప్రాంతంలో నటుడు టైగర్ ష్రాఫ్ కారుపై జరిగిన కాల్పుల ఘటనకు సంబంధించి, ఇద్దరు మహిళలతో సహా నలుగురిని ఢిల్లీ పోలీస్ స్పెషల్ సెల్ అరెస్టు చేసింది. ఈ కేసులో ఒక మైనర్ బాలికను కూడా అదుపులోకి తీసుకున్నట్లు పోలీసు వర్గాలు మంగళవారం తెలిపాయి. నిందితులు నలుగురిని కునాల్ (21), సుమిత్ (19), రాధ (23), బబిత (23)గా గుర్తించారు.

వీరిని స్పెషల్ సెల్ న్యూ ఢిల్లీ రేంజ్ (ఎన్డిఆర్) యూనిట్ అదుపులోకి తీసుకుని, తదుపరి విచారణ కోసం ముంబై పోలీసులకు అప్పగించింది. ఇదే ఘటనకు సంబంధించి రాజస్థాన్‌లోని కోటాలో మరో ముగ్గురు అనుమానితులను అరెస్టు చేసిన ఒక రోజు తర్వాత ఈ అరెస్టులు జరిగాయి. అక్టోబర్ 18న జుహూలో ఈ కాల్పుల ఘటన జరిగింది. ఇద్దరు దుండగులు ష్రాఫ్ కారుపై కాల్పులు జరిపినట్లు ఆరోపణలు ఉన్నాయి. ఈ ఘటనలో నటుడు సురక్షితంగా బయటపడగా, అతని డ్రైవర్, మరో వ్యక్తి గాయపడ్డారు.

పోలీసు వర్గాల ప్రకారం, నిందితులు ఢిల్లీ, హర్యానాలోని సోనిపట్‌కు చెందినవారు. ఆ ఇద్దరు వ్యక్తులు ఆయుధాలను సేకరించి, వాటిని మహిళలకు అప్పగించారని, వారు వాటిని తమ సిండికేట్ సభ్యులకు అందించడానికి ముంబైకి ప్రయాణించారని దర్యాప్తు అధికారులు అనుమానిస్తున్నారు. ఇటీవలే బెయిల్‌పై జైలు నుండి విడుదలైన కునాల్‌ను, హర్సానా గ్రామానికి చెందిన ఒక స్నేహితుడు అనిల్ పండిట్‌కు పరిచయం చేశాడని పోలీసులు తెలిపారు.

ఆ తర్వాత వారిద్దరూ ఒక ఎన్‌క్రిప్టెడ్ మెసేజింగ్ అప్లికేషన్ ద్వారా సంభాషించుకున్నారు. పండిట్ ఆదేశాల మేరకు, కునాల్ అమృత్‌సర్ నుండి ఒక పిస్టల్ మరియు 20 రౌండ్ల మందుగుండు సామగ్రిని సేకరించినట్లు ఆరోపణలు ఉన్నాయి. సుమారు రెండు నెలల క్రితం, అతను రాధను కలిసి, తన కార్యకలాపాల గురించి ఆమెకు తెలియజేసి, ఆమెతో సంబంధం ఏర్పరచుకున్న తర్వాత ఆయుధంతో ముంబైకి ప్రయాణించేలా ఒప్పించాడు.

మొదట నిందితులను ఢిల్లీ కోర్టులో ప్రవేశపెట్టి, ముంబయి క్రైమ్ ఇన్వెస్టిగేషన్ డిపార్ట్‌మెంట్ (సీఐడీ) అధికారులు వారిని అరెస్ట్ చేసేందుకు, విచారించేందుకు అనుమతి కోరారు. కోర్టు ఇందుకు అంగీకరించింది. నిందితులను ముంబయికి తీసుకెళ్లి విచారించేందుకు మూడు రోజుల ట్రాన్సిట్ రిమాండ్ మంజూరు చేసింది.

కాగా, ముగ్గురు షూటర్లు మొదట మరో ప్రముఖ బాలీవుడ్ నటుడిని లక్ష్యంగా చేసుకున్నట్లు ఆరోపణలు ఉన్నాయి. అయితే ఆ నటుడికి గట్టి భద్రత ఉండటంతో వారి ప్రయత్నం సాధ్యం కాకపోవడంతో, టైగర్ ష్రాఫ్‌ను సులభంగా లక్ష్యంగా చేసుకోవచ్చని భావించి ఆయన కారుపై కాల్పులు జరిపినట్లు క్రైమ్ బ్రాంచ్ పేర్కొంది. అయితే ఆ ప్రముఖ నటుడు ఎవరనే విషయాన్ని అధికారులు వెల్లడించలేదు.