చైనాను ఓడించి 44 ఏళ్ల తర్వాత హాకీలో బంగారు పతకం

* ఒకే రోజు భారత్ కు 6 స్వర్ణాలతో సహా 10 పతకాలు

ఐచి-నగోయాలో జరిగిన ఆసియా క్రీడల్లో, భారత మహిళల హాకీ జట్టు శుక్రవారం చారిత్రాత్మక ప్రదర్శన కనబరిచింది. ప్రస్తుత ఆసియా ఛాంపియన్ అయిన చైనాను 1-0 తేడాతో ఓడించి స్వర్ణ పతకాన్ని కైవసం చేసుకుంది. తద్వారా 44 ఏళ్ల తర్వాత పతకం కోసం ఎదురుచూస్తున్న జట్టుకు ఇది ముగింపు పలికింది. ప్రపంచ ర్యాంకింగ్‌లో 8వ స్థానంలో ఉన్న భారత్, హోరాహోరీగా జరిగిన ఫైనల్‌లో ప్రపంచ నంబర్ 4 జట్టు అయిన చైనాకు షాక్ ఇచ్చింది.

ఈ మ్యాచ్‌లో 10వ నిమిషంలో భారత్ తరఫున లాల్‌రెమ్సియామి నిర్ణయాత్మక గోల్ సాధించగా, గోల్ కీపర్ సవిత పునియా చైనా పెనాల్టీ స్ట్రోక్‌ను అడ్డుకుని విజయంలో కీలక పాత్ర పోషించింది. 1982లో భారత జట్టు చివరిసారిగా పతకం సాధించిన తర్వాత, ఆసియా క్రీడల్లో మహిళల హాకీ జట్టుకు ఇదే తొలి పతకం. ఐచి-నగోయా ఆసియా క్రీడల్లో భారత్‌కు ఇది 76వ పతకం. ఈ స్వర్ణ పతకం భారత జట్టుకు మరో ముఖ్యమైన ప్రతిఫలాన్ని కూడా తెచ్చిపెట్టింది.

ఎందుకంటే ఈ విజయంతో లాస్ ఏంజిల్స్‌లో జరిగే 2028 ఒలింపిక్ క్రీడలకు భారత్ నేరుగా అర్హత సాధించింది. టోక్యో 2020 ఒలింపిక్స్‌లో అద్భుతమైన నాలుగో స్థానంలో నిలిచినప్పటికీ, పారిస్ 2024 ఒలింపిక్స్‌కు అర్హత సాధించడంలో స్వల్ప తేడాతో విఫలమైన భారత మహిళల హాకీ జట్టుకు, ఒక కష్టతరమైన ఒలింపిక్ చక్రం తర్వాత ఈ విజయం లభించింది.

13వ రోజు శుక్రవారం భారత్‌కు బంగారు శోభను తీసుకొచ్చింది. వివిధ క్రీడా విభాగాల్లో భారత అథ్లెట్లు అసాధారణ ప్రదర్శనతో విరుచుకుపడి 6 స్వర్ణాలు, 2 రజతాలు, 2 కాంస్యాలతో మొత్తం 10 పతకాలను భారత్ ఖాతాలో వేశారు. ఈ విజయాలతో ఆసియా క్రీడల్లో భారత్ మొత్తం స్వర్ణ పతకాల సంఖ్య 16కు చేరింది. హాకీ, బాక్సింగ్, ఆర్చరీ, కుస్తీ(రెజ్లింగ్) క్రీడల్లో భారత క్రీడాకారులు అద్భుత ప్రతిభను చాటారు.

ఆర్చరీలో చారిత్రాత్మక తొలి స్వర్ణం

భారత్‌కు పతకాల పండగ ఆర్చరీతో ప్రారంభమైంది. మహిళల రికర్వ్ టీమ్ ఫైనల్లో అంకితా భకత్, కీర్తి శర్మ, 17 ఏళ్ల కుమ్‌కుమ్ మోహోడ్‌లతో కూడిన భారత త్రయం 10 సార్లు ఒలింపిక్ ఛాంపియన్ అయిన దక్షిణ కొరియాను 5-3 తేడాతో ఓడించి ఆసియా గేమ్స్ ఆర్చరీ చరిత్రలోనే తొలిసారిగా గోల్డ్ మెడల్ సాధించింది. తీవ్రమైన ఈదురు గాలుల ఒత్తిడిని అధిగమించి భారత ఆర్చర్లు ఈ ఘనత సాధించారు. కాగా సెమీఫైనల్లో భారత్ 5-1తో చైనాను ఓడించగా.. మిక్స్‌డ్ రికర్వ్ విభాగంలో కుమ్‌కుమ్-ధీరజ్ బొమ్మదేవర జంట రజత పతకాన్ని గెలుచుకుంది.

బాక్సింగ్‌లో మూడు స్వర్ణాల రికార్డు

బాక్సింగ్‌లో భారత బాక్సర్లు ప్రత్యర్థులపై విరుచుకుపడ్డారు. 75 కేజీల ఫైనల్లో స్టార్ బాక్సర్ లవ్లీనా బోర్గోహెయిన్ 5-0తో చైనాకు చెందిన జియీ బాఓను చిత్తు చేసిన తన పుట్టినరోజున బంగారు పతకాన్ని బహుమతిగా పొందింది. ఆసియా క్రీడల్లో స్వర్ణం గెలిచిన రెండో భారత మహిళా బాక్సర్‌గా లవ్లీనా నిలిచింది. అలాగే 65 కేజీల విభాగంలో పర్వీన్ హుడా 3-2తో చైనీస్ తైపీకి చెందిన నియెన్-చిన్ చెన్ ను ఓడించి స్వర్ణం గెలిచింది. పురుషుల విభాగంలో అంకుష్ పంఘల్ కూడా స్వర్ణం సాధించడంతో ఒక్కరోజే బాక్సింగ్‌లో భారత్‌కు మూడు గోల్డ్ మెడల్స్ దక్కాయి.

రెజ్లింగ్‌లో సుజీత్ అద్భుత తిరుగుబాటు

రెజ్లింగ్‌లో సుజీత్ కల్కల్ అద్భుతంగా పోరాడాడు. 65 కేజీల ఫ్రీ స్టైల్ ఫైనల్లో తజికిస్తాన్‌కు చెందిన అబ్దుల్మజీద్ కుడీవ్‌తో జరిగిన పోరులో ఒక దశలో సుజీత్ 2-9 తేడాకో వెనుకబడ్డాడు. కానీ ఒత్తిడిలోనూ నిలకడ కోల్పోకుండా వరుసగా 8 పాయింట్లు సాధించి 10-9తో సంచలన విజయాన్ని నమోదు చేసి పసిడి పతకాన్ని గెలుచుకున్నాడు. అంతకు ముందు సెమీఫైనల్లో ఆయన జపాన్‌కు చెందిన ఒలింపిక్ ఛాంపియన్ కొటారో కియోకాను ఓడించడం విశేషం.