వచ్చే ఏడాది జరిగే అసెంబ్లీ ఎన్నికల్లో బీజేపీ అధికారంలోకి వస్తే, 2029 డిసెంబర్ 31 నాటికి పంజాబ్‌ను మాదకద్రవ్య రహిత రాష్ట్రంగా మారుస్తామని హోం మంత్రి అమిత్ షా మంగళవారం హామీ ఇచ్చారు. అదే సమయంలో ఆమ్ ఆద్మీ పార్టీ ప్రభుత్వం, దాని నాయకత్వంపై ఆయన తీవ్ర స్థాయిలో విమర్శలు గుప్పించారు.
బీజేపీ ‘నషా ముక్త్ పంజాబ్ యాత్ర’లో భాగంగా జలంధర్‌లో జరిగిన బహిరంగ సభలో షా మాట్లాడుతూ, రాబోయే పంజాబ్ అసెంబ్లీ ఎన్నికల ప్రచారంలో మాదకద్రవ్యాల నిర్మూలనను తమ పార్టీ ప్రధానాంశంగా చేసుకుంటుందని తెలిపారు. “ఆప్ ప్రభుత్వం సింథటిక్ డ్రగ్స్ వ్యాపారాన్ని బహిరంగంగా వృద్ధి చెందడానికి అనుమతించింది,” అని షా ఆరోపించారు. రైతులు, పరిశ్రమలు, శాంతిభద్రతలు, మహిళల భద్రతతో సహా పంజాబ్ అనేక సమస్యలను ఎదుర్కొంటోందని విమర్శించారు.
“మీరు కమలం గుర్తుకు ఓటు వేస్తే, 2029 డిసెంబర్ 31 నాటికి పంజాబ్‌ను సింథటిక్ డ్రగ్స్ వ్యాపారం నుండి విముక్తి చేస్తాము,” అని షా పేర్కొన్నారు. “పంజాబ్ తల్లులకు, యువతకు నేను చేసే విజ్ఞప్తి ఏమిటంటే, ఈ ఎన్నికలలో బీజేపీకి మద్దతు ఇవ్వండి, అప్పుడు 2029 డిసెంబర్ 31 నాటికి పంజాబ్ ‘చిట్టా’ అనే మహమ్మారి నుండి విముక్తి పొందుతుంది” అంటూ హామీ ఇచ్చారు.
మిగతా పార్టీలన్నీ విఫలమయ్యాయని, పంజాబ్‌ను మాదకద్రవ్యాల నుంచి కేవలం బీజేపీ మాత్రమే విముక్తి చేయగలదని ఆయన పునరుద్ఘాటించారు. ఆయన ఇంకా ఇలా తెలిపారు: “దేశంలో పంజాబ్ రెండు విషయాలకు ప్రసిద్ధి చెందింది — ఒకటి, రైతులు నిండుగా ఉంచే ఆహార నిల్వల గోదాములు, రెండవది, మాతృభూమి కోసం ప్రాణత్యాగం చేయడానికి ఎల్లప్పుడూ సిద్ధంగా ఉండే పంజాబ్ జవాన్లు. కానీ ‘నషా ముక్త్ పంజాబ్’ అవసరం ఎందుకు వచ్చింది? ఆప్ చిట్టాను స్వేచ్ఛగా చలామణి చేయడానికి అనుమతించింది”.
బీజేపీ ‘నషా ముక్త్ పంజాబ్ యాత్ర’ను ప్రస్తావిస్తూ, ఈ ప్రచారం పఠాన్‌కోట్ నుండి ప్రారంభమైందని, 13 రోజుల్లో 117 అసెంబ్లీ నియోజకవర్గాలన్నింటినీ సందర్శిస్తూ సుమారు 4,000 కిలోమీటర్లు ప్రయాణించి జలంధర్‌లో ముగిసిందని షా తెలిపారు. ఆప్ జాతీయ కన్వీనర్ అరవింద్ కేజ్రీవాల్, ఇతర పార్టీ నాయకులపై విమర్శలు చేస్తూ, బీజేపీ హామీకి ప్రతిస్పందనగా “కేజ్రీవాల్ అండ్ కంపెనీ” ఏమి చెబుతారో తనకు తెలుసని షా ఎద్దేవా చేశారు.
ఉగ్రవాదం, నక్సలిజం, తిరుగుబాటును ఎదుర్కోవడంలో ప్రధానమంత్రి నరేంద్ర మోదీ ప్రభుత్వం సాధించిన గొప్ప విజయాలకు ఆయన ఘనత ఇస్తూ, “మేము మా హామీలను ఎల్లప్పుడూ నెరవేర్చాము,” అని స్పష్టం చేశారు. “ప్రధాని మోదీ నాయకత్వంలో బీజేపీ కాశ్మీర్‌ను ఉగ్రవాదం నుంచి విముక్తి చేసింది. 50 ఏళ్ల నాటి నక్సల్ సమస్యకు ముగింపు పలికింది. ఈశాన్యంలో తిరుగుబాటును నిర్మూలించింది. ఇప్పుడు, సింథటిక్ డ్రగ్స్ లేని పంజాబ్ కోసం సమయం ఆసన్నమైంది,” అని షా తెలిపారు.
ముఖ్యమంత్రి భగవంత్ మాన్ పేరును నేరుగా ప్రస్తావించకుండా, మత్తుపదార్థాలు సేవిస్తూ ‘గురువులను అవమానించే’ వ్యక్తి పంజాబ్‌ను డ్రగ్స్ నుంచి విముక్తి చేయలేరని షా విమర్శించారు. “మత్తులో మునిగిపోయి గురువులను అవమానించే వారు పంజాబ్‌ను మాదకద్రవ్యాల సమస్య నుండి విముక్తి చేయలేరు. వారు పంజాబ్‌కు విముక్తిని ప్రసాదించలేరు. కేవలం బీజేపీ మాత్రమే పంజాబ్‌ను మాదకద్రవ్యాల బారి నుండి కాపాడగలదు,” అని ఆయన భరోసా ఇచ్చారు.
మాదకద్రవ్యాలపై తాము కఠిన చర్యలు తీసుకున్నామన్న బీజేపీ వాదనను బలపరిచేందుకు, గత ప్రభుత్వాల హయాంలో జరిగిన మాదకద్రవ్యాల స్వాధీన వివరాలను కూడా కేంద్ర హోం మంత్రి ప్రస్తావించారు. షా వెల్లడించిన గణాంకాల ప్రకారం, 2004 మరియు 2014 మధ్య కాంగ్రెస్ నేతృత్వంలోని ప్రభుత్వం దేశవ్యాప్తంగా 26 లక్షల కిలోగ్రాముల మాదకద్రవ్యాలను స్వాధీనం చేసుకుంది. అదే సమయంలో, 2014 నుండి 2024 మధ్య మోదీ ప్రభుత్వం సుమారు 1.2 కోట్ల కిలోగ్రాముల మాదకద్రవ్యాలను స్వాధీనం చేసుకుందని ఆయన పేర్కొన్నారు.
కాంగ్రెస్ హయాంలో సుమారు రూ. 40,000 కోట్ల విలువైన మాదకద్రవ్యాలను స్వాధీనం చేసుకోగా, బీజేపీ ప్రభుత్వ హయాంలో సుమారు రూ. 1.90 లక్షల కోట్ల విలువైన మాదకద్రవ్యాలను స్వాధీనం చేసుకున్నారని షా తెలిపారు. 2027 ప్రారంభంలో జరగనున్న అసెంబ్లీ ఎన్నికల్లో ఆప్ ప్రభుత్వానికి వ్యతిరేకంగా సాగించే పోరాటంలో, మాదకద్రవ్యాల వ్యతిరేక ప్రచారాన్ని బీజేపీ ఒక కీలక అంశంగా మలుస్తుంది.
రాష్ట్ర ముఖ్యమంత్రిని లక్ష్యంగా చేసుకుని ఆయన మాట్లాడుతూ, “పంజాబ్ కుంభకోణాలతో నిండిపోయింది. స్మార్ట్ సిటీ కుంభకోణాలు, బర్నాలా భూ కుంభకోణం, పంచాయతీ, అంగన్‌వాడీ కుంభకోణాలు, ప్రకటనలపై ఏటా రూ. 700 కోట్లు ఖర్చు చేస్తున్నారు” అని ధ్వజమెత్తారు.
“భగవంత్ మాన్, నేను అడుగుతున్నాను — 26 లక్షల ఉద్యోగాలు, 16,000 ఆప్ క్లినిక్‌లు, వైద్య కళాశాలలు, వితంతు పింఛను, మైనింగ్ ఆదాయం, కనీస మద్దతు ధరపై మీరు చేసిన వాగ్దానాలకు ఏమైంది? ఆ వాగ్దానాలలో ఏ ఒక్కటీ నెరవేర్చలేదు. మీరు కనీసం ‘నషా ముక్తి’ వాగ్దానాన్ని నెరవేర్చినా ప్రజలు క్షమించేవారు. కానీ మీరు రాష్ట్రంలో డ్రగ్స్ వ్యాపారం వృద్ధి చెందడానికి కారణమయ్యారు” అంటూ విమర్శలు గుప్పించారు.
About The Author
More Stories
సంఘ్ జేష్ఠ కార్యకర్త దోనేపూడి వెంకయ్య మృతి
దేశవ్యాప్త జాతీయ పౌర రిజిస్టర్ కోసం ఆర్‌ఎస్‌ఎస్ పిలుపు
డబుల్ సెంచరీతో గిల్ విధ్వంసం.. భారత్ సంచలన విజయం