షాహి మ‌సీదు భాగం తొల‌గింపు.. ఉజ్జ‌యినిలో పోలీసుల‌తో ఘ‌ర్ష‌ణ

మధ్యప్రదేశ్‌లోని ఉజ్జయినిలో సింహస్థ కుంభ్ 2028 కోసం చేపట్టిన రహదారి విస్తరణ ప్రాజెక్టులో భాగంగా, దాదాపు 600 ఏళ్ల నాటి ‘షాహీ మసీదు’ను పాక్షికంగా కూల్చివేయడాన్ని అడ్డుకునేందుకు పెద్ద సంఖ్యలో నిరసనకారులు గుమిగూడటంతో మధ్యప్రదేశ్ ఉజ్జయిని జిల్లాలో ఉద్రిక్తత నెలకొంది. ఓ వ‌ర్గానికి చెందిన ప్ర‌జ‌లు రాళ్లు రువ్వారు. వారిని చెద‌ర‌గొట్టేందుకు పోలీసులు టియ‌ర్ గ్యాస్‌ను ప్ర‌యోగించారు.

హిందూ యాత్రా సన్నాహాల కోసం షాహీ మసీదును పాక్షికంగా కూల్చివేయడానికి మధ్యప్రదేశ్ హైకోర్టు అనుమతి ఇవ్వడం, అలాగే కూల్చివేత నోటీసును సవాలు చేస్తూ దాఖలైన రెండు పిటిషన్లను కొట్టివేయడంతో ఈ సంఘటన మొదలైంది. ఇది “కఠిన వాస్తవం” అని పేర్కొంటూ, మసీదులోని కొంత భాగాన్ని కూల్చివేయాలంటూ ఉజ్జయిన్ మున్సిపల్ కార్పొరేషన్ జారీ చేసిన నోటీసుకు వ్యతిరేకంగా దాఖలైన రిట్ పిటిషన్లను జస్టిస్ సందీప్ ఎన్ భట్ కొట్టివేశారు. 

ఈ పరిపాలనా చర్య వర్తించే చట్టపరమైన నిబంధనల పరిధిలోకి వస్తుందని ఆయన గమనించారు. మసీదు ఉన్న ప్రదేశం, రాబోయే యాత్ర, అంచనా వేసిన భక్తుల సంఖ్య, మరియు ట్రాఫిక్ నియంత్రణ అవసరాన్ని పరిగణనలోకి తీసుకున్న కోర్టు, ఈ పౌర చర్య చట్టబద్ధమైనదేనని నిర్ధారించింది. అదే రహదారిపై పది ఆలయాలు, ఒక మసీదుకు చెందిన నిర్మాణాల భాగాలు ఇప్పటికే తొలగించినట్లు కోర్టు తన ఉత్తర్వుల్లో ప్రస్తావించింది. ఈ నేపథ్యంలో మసీదుకు మాత్రమే ప్రత్యేకంగా వివక్ష చూపుతున్నారన్న వాదనను కోర్టు అంగీకరించలేదు. 

ఈ మార్గంలో ఇప్ప‌టికే ఇలాంటి 60 నిర్మాణాల‌ను తొల‌గించిన‌ట్లు అధికారులు చెప్పారు.  సింహస్థ కుంభమేళా–2028 ఏర్పాట్లలో భాగంగా రోడ్డు విస్తరణ పనులు చేపట్టిన అధికారులు రహదారి పరిధిలోకి వస్తున్న మసీదు భాగాన్ని తొలగించే ప్రక్రియ ప్రారంభించారు.  దీనిని వ్యతిరేకిస్తూ స్థానికులు, ఆ మతానికి చెందిన వర్గాల ప్రతినిధులు అక్కడ నిరసనకు దిగడంతో సోమవారం పోలీసులు, ఆందోళనకారుల మధ్య ఘర్షణ చోటుచేసుకుంది.  

రోడ్డు విస్తరణలో భాగంగా మసీదు మొత్తాన్ని కూల్చివేయడం లేదని, ప్రతిపాదిత 15 మీటర్ల రహదారి అమరికలోకి వస్తున్న కొంత భాగాన్ని మాత్రమే తొలగిస్తున్నట్లు అధికారులు చెబుతున్నారు. కన్తాల్‌ చౌరాహా–గోపాల్‌ మందిర్‌ మధ్య రహదారి విస్తరణలో భాగంగా ఈ చర్య చేపడుతున్నారు. ఈ మార్గంలో ఇప్పటికే పలు మతపరమైన నిర్మాణాలకు సంబంధించిన భాగాలను తొలగించినట్లు అధికారులు పేర్కొంటున్నారు.

నిరసనకారులు పోలీసులపై రాళ్లు రువ్వడం, బారికేడ్లను తోయడంతో పరిస్థితి ఉద్రిక్తంగా మారింది. దీంతో గుంపును చెదరగొట్టడానికి పోలీసులు బాష్పవాయువు, లాఠీఛార్జ్ ప్రయోగించారు. రాళ్ల దాడిలో ఒక పోలీసు సిబ్బంది గాయపడగా, పరిస్థితిని అదుపులోకి తీసుకురావడానికి ఆర్ఏఎఫ్ సిబ్బందితో సహా అదనపు బలగాలను మోహరించారు. 

ఈ హింసాకాండ ఉజ్జయిన్‌లోని కొన్ని ప్రాంతాలను స్తంభింపజేసింది. ముందుజాగ్రత్తగా పలు ప్రాంతాల్లోని మార్కెట్లు మూతపడగా, కొన్ని పాఠశాలలు ముందుగానే మూసివేశారు. పోలీసులు ప్రభావిత ప్రాంతాలను నాలుగు సెక్టార్లుగా విభజించి భారీ బలగాలను మోహరించారు. అదే సమయంలో ఎఫ్ఐఆర్లు నమోదు చేసి పలువురిని అదుపులోకి తీసుకున్నారు లేదా అరెస్టు చేశారు. 

ఈ వివాదానికి సంబంధించి ఉజ్జయిన్‌కు ప్రయాణిస్తున్నట్లు సమాచారం ఉన్న ఏఐఎంఐఎం మధ్యప్రదేశ్ అధ్యక్షుడు మోసిన్ అలీ ఖాన్‌ను కూడా అదుపులోకి తీసుకున్నారు. తాజా పరిణామాలతో మసీదు పరిసరాల్లో భద్రతను మరింత పెంచారు. రోడ్డు విస్తరణ, మతపరమైన నిర్మాణాల తొలగింపు, కోర్టు ఆదేశాల నేపథ్యంలో ప్రస్తుతం ఉజ్జయినిలో పరిస్థితిని అధికారులు పర్యవేక్షిస్తున్నారు.

కాగా, షాహి మ‌సీదుతో పాటు ఖ‌డే హ‌నుమాన్ మందిర్‌ స‌మీపంలో ఉన్న మజ‌ర్ వ‌ల్ల రోడ్డు వెడ‌ల్పు కార్య‌క్ర‌మం నిలిచిపోయింది. షాహి మ‌సీదు శ‌తాబ్ధాల నాటి వ‌క్ఫ్ ప్రాప‌ర్టీ అని ఆ వ‌ర్గ ప్ర‌జ‌లు వాదిస్తున్నారు. అయితే ఆ మ‌సీదుకు చెందిన ప్రార్థ‌న హాల్‌, మినార్ ప్ర‌స్తుత విస్త‌ర‌ణ‌లో భాగంగా కూల్చ‌నున్నారు. ఆదివారం నుంచి అక్క‌డ 2 వేల మంది పోలీసుల్ని మోహ‌రించారు.