స్పీకర్‌పై ఎమ్మెల్సీ తాత మధు అనుచిత వ్యాఖ్యలపై దుమారం

శాసనసభాపతిపై బీఆర్ఎస్ ఎమ్మెల్సీ తాతా మధు చేసిన అనుచిత వ్యాఖ్యలను బీజేపీ తీవ్రంగా ఖండిస్తోందని బీజేఎల్పీ నేత ఏలేటి మహేశ్వర్ రెడ్డి స్పష్టం చేశారు. సభాపతి స్థానాన్ని కించపరిచేలా వ్యవహరించిన తాతా మధును తక్షణమే పదవి నుంచి బర్తరఫ్ చేయాలని డిమాండ్ చేశారు. ఈ వ్యవహారంలో ప్రతిపక్ష నాయకుడు కేసీఆర్ కూడా ప్రజలకు, సభకు బహిరంగ క్షమాపణలు చెప్పాలని పేర్కొన్నారు.

తాతా మధు వాడిన భాషను బీజేపీ ఎమ్మెల్యేలందరం ముక్తకంఠంతో ఖండిస్తున్నామని ఏలేటి తెలిపారు. “తాతా మధు కావాలని అలా మాట్లాడారా? లేక వెనుక ఎవరైనా ఉండి ఆయనతో అలా మాట్లాడించారా? అన్నది తేలాలి” అని ఆయన ప్రశ్నించారు. రాజ్యాంగబద్ధమైన స్పీకర్ స్థానాన్ని అవమానించే సంస్కృతిని ఉపేక్షించేది లేదని స్పష్టం చేశారు. స్పీకర్ గడ్డం ప్రసాద్ కుమార్‌పై అనుచిత వ్యాఖ్యలు చేసిన తాత మధుపై చర్యలు తీసుకోవాలని ఎంపీ మల్లు రవి డిమాండ్ చేశారు. ఎస్సీ స్పీకర్‌పై మధు అనుచిత వ్యాఖ్యలు చేశారని మండిపడ్డారు.