ఉత్తరాఖండ్లో జన్మాష్టమి సందర్భంగా ప్రదర్శించిన ‘లవ్ జిహాద్’ నేపథ్యంలోని ఒక ప్రదర్శన రాజకీయ వివాదానికి దారితీసింది. భిన్న మతాల మధ్య సంబంధాల ద్వారా మత మార్పిడి జరుగుతోందన్న ఆరోపణలతో రాజకీయంగా చర్చనీయాంశమైన ‘లవ్ జిహాద్’ అంశంపై ఈ ప్రదర్శనను ఏర్పాటు చేసినందుకు, బీజేపీ కార్యకర్త రాజు రావత్పై పోలీసులు కేసు నమోదు చేయడంతో రామ్నగర్లో ఈ వివాదం మొదలైంది.
శనివారం అర్ధరాత్రి పెద్ద సంఖ్యలో బీజేపీ నాయకులు, కార్యకర్తలు రామ్నగర్ పోలీస్ స్టేషన్ వద్దకు చేరుకుని, పోలీసులకు వ్యతిరేకంగా నినాదాలు చేశారు. బీజేపీ నేతృత్వంలోని రాష్ట్ర, కేంద్ర ప్రభుత్వాల నాయకులు బహిరంగంగా తరచుగా ప్రస్తావించే అంశంపై ప్రదర్శన ఏర్పాటు చేసినందుకు పార్టీ కార్యకర్తపై కేసు నమోదు చేయడం ఏమిటని వారు ప్రశ్నించారు.
స్థానిక యంత్రాంగం ఆదేశించిన వెంటనే రావత్ ఆ ప్రదర్శనను తొలగించారని, ఆయన ఆదేశాలను పాటించినప్పటికీ కేసు నమోదు చేయడం “అర్థం చేసుకోవడానికి కష్టంగా ఉందని” వారు పేర్కొన్నారు. పోలీస్ స్టేషన్కు చేరుకున్న వారిలో బీజేపీ నగర విభాగం అధ్యక్షుడు భూపేంద్ర ఖాతి, గ్రామీణ విభాగం అధ్యక్షుడు ఘన్శ్యామ్ శర్మ, రైతు కమిషన్ సభ్యుడు సంజయ్ డోర్వి, మాజీ అధ్యక్షురాలు భావనా భట్, రాష్ట్ర మంత్రి స్థాయి హోదా కలిగిన మాజీ నేత దినేష్ మెహ్రా ఉన్నారు.
“పార్టీ తన కార్యకర్తకు అండగా నిలుస్తుంది,” అని ఖాతి స్పష్టం చేశారు. ప్రదర్శనలోని ఏదైనా అంశం అభ్యంతరకరంగా అనిపిస్తే, దానిని తొలగించడంతోనే తక్షణ సమస్య పరిష్కారమై ఉండేదని పేర్కొంటూ, పోలీసులు ఈ వ్యవహారాన్ని నిర్వహించిన తీరును ఖాతి ప్రశ్నించారు. పోలీసుల చర్యపై విచారణ జరపాలని బీజేపీ నగర ప్రధాన కార్యదర్శి నవీన్ కర్గేటి కూడా డిమాండ్ చేశారు. అలాంటప్పుడు, రాత్రికి రాత్రే కేసు నమోదు చేయాల్సిన అవసరం ఏముంది? దీనిపై విచారణ జరగాలని స్పష్టం చేశారు. ఈ ఆరోపణలు, నమోదు చేసిన సెక్షన్లు లేదా ప్రదర్శనకు సంబంధించిన ఫిర్యాదు స్వభావంపై పోలీసులు ఇంకా వివరణాత్మక అధికారిక ప్రకటన చేయలేదు.
More Stories
నర్మదా తీరంలో ‘జాతీయ చలనచిత్ర అవార్డుల’ వేడుక
ఛత్తీస్గఢ్లో 14 మావోయిస్టుల డంప్లు గుర్తింపు
పీజీ హాస్టళ్లలో భద్రత, కనీస సౌకర్యాలపై ఢిల్లీ హైకోర్టు సీరియస్