మావోయిస్టు భావజాలం కలిగిన వ్యక్తులను ‘దిమాగీ నక్సల్స్’ (మేధోపరమైన నక్సల్స్)గా అభివర్ణిస్తూ, వారు అధికార కేంద్రాలలో పాతుకుపోయారని, దేశ అభివృద్ధిని కొనసాగించడానికి వారిని ఏకాకిని చేయాలని ప్రధాన మంత్రి నరేంద్ర మోదీ శనివారం పిలుపునిచ్చారు. ఢిల్లీలోని ఎర్రకోట ప్రాకారం నుండి స్వాతంత్ర్య దినోత్సవ వేడుకల సందర్భంగా దేశాన్ని ఉద్దేశించి ప్రసంగిస్తూ ఆయన దిమాగీ నక్సల్స్ పట్ల అప్రమత్తంగా ఉండాలని హెచ్చరించారు.
దిమాగీ నక్సల్స్ పదాన్ని ఆయన పూర్తిగా వివరించలేదు. దిమాగీ నక్సల్స్ ఓ కొత్త రకమైన శత్రువు అన్నట్లు ఆయన తెలిపారు. మావోయిస్టు మైండ్సెట్ ఉన్న వ్యక్తులు ఇప్పుడు దేశ రాజకీయాల్లో భాగస్వామ్యం అవుతున్నారని, కొందరు ప్రభుత్వ కమిటీల్లోనూ అడ్వైజర్లగా విధులు నిర్వర్తిస్తున్నారని, మావోయిస్టు ఐడియాలజీ దేశ విధానాలపై ప్రభావం చూపిందని ప్రధాని తెలిపారు.
దట్టమైన అడవుల్లో ఉండే నక్సల్స్ను అంతం చేశామని, ఆ సంక్షోభం నుంచి దేశాన్ని రక్షించామని పేర్కొంటూ అయితే సాయుధ నక్సలైట్లు అంతం అయినా, దిమాగీ నక్సల్స్ మాత్రం అలాగే ఉన్నారని ప్రధాని స్పష్టం చేశారు. ఆ నక్సల్స్ దేశంలో హింస, అల్లర్లు సృష్టిస్తున్నారని మోదీ ఆరోపించారు. సమాజాన్ని తమ తప్పుడు మార్గంలోకి తీసుకెళ్లేందుకు విభిన్న వ్యూహాలను అమలు చేస్తుంటారని ప్రధాని మోదీ తన ప్రసంగంలో పేర్కొన్నారు.
ఇటువంటి భావజాల నక్సలైట్లు అవకాశాల కోసం వేచి చూస్తున్నారని, దేశంలో మరోసారి అరాచక పరిస్థితులను సృష్టించడానికి ప్రయత్నిస్తున్నారని ఆయన చెప్పారు. నక్సలిజం అనేక మంది యువకుల భవిష్యత్తును నాశనం చేసిందని చెబుతూ మావోయిజంపై పోరాటంలో 3,500 మందికి పైగా భద్రతా సిబ్బంది ప్రాణాలు కోల్పోయారని (ఈ సంఖ్య యుద్ధాల్లో మరణించిన వారి సంఖ్య కంటే ఎక్కువని) ఆయన గుర్తుచేశారు.
“ఈ భావజాల నక్సలైట్లు అవకాశాల కోసం వేచి చూస్తున్నారు. వారు హింస, అరాచక మార్గాలను పునరుద్ధరించడానికి, సమాజాన్ని తప్పుదోవ పట్టించడానికి వివిధ ప్రయత్నాలు చేస్తున్నారు. మనం ఈ భావజాల నక్సలైట్లను గుర్తించి, వారిని ఏకాకిని చేయాలి,” అని ప్రధాని మోదీ స్పష్టం చేశారు.
భారతదేశాన్ని ‘వికసిత్’ (అభివృద్ధి చెందిన దేశం)గా మార్చడంలో యువతను ప్రధాన స్రవంతిలో ఉంచేందుకు మరిన్ని చర్యలు తీసుకోవాలని చెబుతూ అలాగే దేశ భద్రత అనేది అందరి సమిష్టి బాధ్యత అని పేర్కొన్నారు. తన ప్రసంగంలో, యుద్ధాలు కేవలం సరిహద్దులకే పరిమితం కాదని, ‘దిమాగీ నక్సల్స్’ రూపంలో దేశం అంతర్గత సవాళ్లను కూడా ఎదుర్కొంటోందని ప్రధాని మోదీ నొక్కి చెప్పారు.
అయితే, ఇటువంటి సవాళ్లన్నింటినీ ఎదుర్కోవడానికి దేశం సిద్ధంగా ఉందని ఆయన స్పష్టం చేశారు. “కొత్త తరహా యుద్ధతంత్రం ఉద్భవిస్తుంది,” అని ప్రధాని మోదీ వెల్లడించాయిరు. “రిఫైనరీ, బ్యాంకింగ్ రంగం లేదా డేటా సెంటర్లపై దాడులు జరగవచ్చు. మౌలిక సదుపాయాలను ధ్వంసం చేయవచ్చు. కర్మాగారాలను లక్ష్యంగా చేసుకోవచ్చు. మేము గత ఏడాది ‘మిషన్ సుదర్శనచక్ర’ను ప్రకటించాము, దానిపై పనులు వేగంగా జరుగుతున్నాయి.” అని తెలిపారు.
ఇలా ఉండగా, బీజేపీ నాయకులు చాలా సంవత్సరాలుగా వామపక్ష ఉద్యమకారులు, విద్యావేత్తలు, పాత్రికేయులు, ఇతర విమర్శకులను మావోయిస్టు తిరుగుబాటుకు సైద్ధాంతిక లేదా రాజకీయ ముఖభాగాలుగా చిత్రీకరిస్తూ, ‘అర్బన్ నక్సల్స్’ అనే పదాన్ని ఒక రాజకీయ ముద్రగా ఉపయోగిస్తున్నారు. 2018లో ఎల్గార్ పరిషద్ కేసుకు సంబంధించి కార్యకర్తల అరెస్టుల తర్వాత ఈ పదం ప్రాచుర్యం పొందింది. అప్పటి నుండి ప్రతిపక్ష పార్టీలు, విమర్శకులకు వ్యతిరేకంగా బీజేపీ నాయకులూ చేసే ప్రసంగాలలో ఇది తరచుగా వినిపిస్తోంది.
అయితే, 2020లో కేంద్ర హోం మంత్రిత్వ శాఖ పార్లమెంటుకు ‘అర్బన్ నక్సల్స్’ అనే పదాన్ని తాము ఉపయోగించలేదని చెప్పినప్పటికీ, మోదీ, ఇతర బీజేపీ నాయకులు దానిని ఉపయోగించడం కొనసాగిస్తున్నారు. ఈ ఏడాది జనవరిలో, మోదీ “అర్బన్ నక్సలిజం”ను ఒక “ప్రధాన సవాలు”గా అభివర్ణించారు. దాని పరిధి అంతర్జాతీయంగా మారుతోందని హెచ్చరించారు.
More Stories
ఎర్రకోటపై తొలిసారి ప్రతిధ్వనించిన వందేమాతర గీతం
ఇతర దేశాలపై ఆధారపడే పరిస్థితి నుంచి బయటపడాలి
రాహుల్కు సభా హక్కుల ఉల్లంఘన నోటీసు