* నీట్ పేపర్ లీక్ పై ప్రతిపక్షాల ధోరణిపై బిజెపి నేతల మండిపాటు
పరీక్షా పత్రాల లీకేజీకి బాధ్యులైన వారిపై ఫాస్ట్-ట్రాక్ కోర్టులు, కఠినమైన చట్టాలతో సహా కఠిన చర్యలు తీసుకుంటామని ప్రధానమంత్రి నరేంద్ర మోదీ ఇచ్చిన హామీలను ప్రస్తావిస్తూ, నీట్ పేపర్ లీక్ అంశంపై విద్యార్థుల ఆందోళనలను ప్రతిపక్షాలు రాజకీయం చేయడానికి ప్రయత్నిస్తున్నాయని బీజేపీ శుక్రవారం ఆరోపించింది. పార్లమెంట్ ప్రాంగణంలో విలేకరులతో మాట్లాడుతూ, కొన్ని రాజకీయ పార్టీలు ఎన్నికల లబ్ధి కోసం విద్యార్థుల మనోభావాలను “రాజకీయంగా హైజాక్” చేయడానికి ప్రయత్నిస్తున్నాయని బీజేపీ ఎంపీ తరుణ్ చుగ్ ఆరోపించారు.
విద్యార్థుల ఆందోళనలను పరిష్కరించినందుకు ప్రధాని మోదీకి ధన్యవాదాలు తెలుపుతూ, ఫాస్ట్-ట్రాక్ కోర్టులు, వేగవంతమైన విచారణలు, పేపర్ లీక్ కేసులలో పాల్గొన్న వారికి కఠిన శిక్షలు విధించాలన్న ప్రకటన విద్యార్థుల ప్రయోజనాలను పరిరక్షించడంలో కేంద్రం నిబద్ధతను ప్రతిబింబిస్తుందని తెలిపారు. ఈ అంశంపై కేంద్ర మంత్రి జేపీ నడ్డా నిమగ్నమవ్వడం, సామాజిక కార్యకర్త సోనమ్ వాంగ్చుక్ తన నిరాహార దీక్షను విరమించుకోవాలని నిర్ణయించుకోవడం వంటివి సానుకూల పరిణామాలని ఆయన అభివర్ణించారు. దోషులపై కఠిన చర్యలు తీసుకునేందుకు ప్రభుత్వం కట్టుబడి ఉందని ఆయన స్పష్టం చేశారు.
కాంగ్రెస్పై దాడి చేస్తూ, 100 ఎన్నికలలో ఓడిపోయిన పార్టీని సీరియస్గా తీసుకోకూడదని బీజేపీ ఎంపీ నిషికాంత్ దుబే ధ్వజమెత్తారు. జార్ఖండ్ పబ్లిక్ సర్వీస్ కమిషన్ (జేపీఎస్సీ) ఛైర్మన్ నివాసంలో ఇటీవల జరిగిన సీఐడీ దాడులను ఆయన ఉటంకిస్తూ, నేరారోపణ పత్రాలు లభించాయని పేర్కొన్నారు. జార్ఖండ్లో అధికార కూటమిలో భాగమైన కాంగ్రెస్కు పేపర్ లీక్లపై కేంద్రాన్ని విమర్శించే నైతిక అధికారం లేదని ఆయన వాదించారు.
ప్రతిపక్ష నాయకుడు రాహుల్ గాంధీ, ఆప్ జాతీయ కన్వీనర్ అరవింద్ కేజ్రీవాల్, సమాజ్వాదీ పార్టీ అధ్యక్షుడు అఖిలేష్ యాదవ్లు ఈ విషయాన్ని “రాజకీయ ప్రదర్శన”గా మారుస్తున్నారని కేంద్ర మంత్రి గిరిరాజ్ సింగ్ ఆరోపించారు. పరీక్షకు హాజరైన 22 లక్షలకు పైగా విద్యార్థుల ఆందోళనలకు ప్రధాని మోదీ సున్నితంగా స్పందించారని సింగ్ చెప్పారు. కఠినమైన పేపర్ లీక్ నిరోధక చట్టాన్ని తీసుకురావడానికి, ఫాస్ట్-ట్రాక్ కోర్టులను ఏర్పాటు చేయడానికి ప్రభుత్వం కట్టుబడి ఉందని ఆయన పునరుద్ఘాటించారు.
రాజకీయ నిరసనల కోసం విద్యార్థులను ఉపయోగించుకోవడం ద్వారా కాంగ్రెస్ “గూండాయిజం అన్ని హద్దులు దాటిందని” ఆయన ఆరోపించారు. రాహుల్ గాంధీ బాధ్యత తీసుకోకుండా రాజకీయ సానుభూతిని పొందేందుకు ప్రయత్నిస్తున్నారని పేర్కొన్నారు. సోనమ్ వాంగ్చుక్ను “అన్నా పార్ట్ టూ”గా అభివర్ణిస్తూ, ఆయన ప్రభుత్వంతో “వ్యక్తిగత ఒప్పందం” కుదుర్చుకున్నారని ఆరోపిస్తూ కాంగ్రెస్ ఎంపీ ఇమ్రాన్ మసూద్ చేసిన వ్యాఖ్యలను బీజేపీ జాతీయ అధికార ప్రతినిధి షెహజాద్ పూనావాలా కూడా విమర్శించారు.
ఎక్స్ లో ఒక వీడియో సందేశంలో, ప్రభుత్వం నిరసనకారులతో సంప్రదింపులు జరిపి, పార్లమెంటులో చర్చకు వారి డిమాండ్ను అంగీకరించిన తర్వాత, కాంగ్రెస్ వాంగ్చుక్ను అవమానించిందని పూనావాలా ఆరోపించారు. వాంగ్చుక్ నిరసనపై గానీ, విద్యార్థుల సమస్యలపై గానీ రాహుల్ గాంధీ పెద్దగా ఆసక్తి చూపలేదని, ఇప్పుడు పార్లమెంటరీ చర్చను తప్పించుకుంటున్నారని ఆయన ధ్వజమెత్తారు.
More Stories
యువతకు ఆదేశాలు కాకుండా అర్ధవంతమైన చర్చ జరపాలి
ఫేషియల్ రికగ్నిషన్ తో ఢిల్లీలో 2,500 మంది దుండగుల గుర్తింపు
సృష్టి ఆరంభం నుంచి మాతృత్వం అనే పునాదిపైనే ప్రపంచం