లెబనాన్లో దేశం తన సైనిక చర్యలను కొనసాగిస్తుండగా, ప్రధానమంత్రి బెంజమిన్ నెతన్యాహు మరోసారి పదవిలో కొనసాగాలని చూస్తుండగా, అక్టోబర్ 27న సార్వత్రిక ఎన్నికలు జరుగుతాయని ఇజ్రాయెల్ ఆదివారం ప్రకటించింది. పూర్తి నాలుగేళ్ల పదవీకాలం తర్వాత ఇజ్రాయెల్లో ఎన్నికలు జరగడం 1988 తర్వాత ఇదే మొదటిసారి. అంతేగాక గత 50 ఏండ్లలో నాలుగేండ్లు పాలించిన సర్కార్గా నెతన్యాహు ప్రభుత్వం నిలిచింది.
ప్రస్తుత క్నెసెట్ తన పూర్తి నాలుగేళ్ల పదవీకాలాన్ని జూలై 17న పూర్తి చేసుకుంటుందని పేర్కొన్న క్నెసెట్ హౌస్ కమిటీ చైర్మన్, లికుడ్ ఎంకే ఒఫిర్ కాట్జ్ ఈ నిర్ణయాన్ని ప్రకటించారు. క్నెసెట్ పదవీకాలాన్ని తగ్గించే ఉద్దేశం నెతన్యాహు సంకీర్ణ ప్రభుత్వానికి లేదని, ఈసారి ‘రద్దు చట్టం’ అవసరం లేదని క్నెసెట్ న్యాయ సలహాదారు సాగిత్ అఫిక్ కూడా పునరుద్ఘాటించారు.
ఇజ్రాయెల్ పార్లమెంట్ లేదా క్నెసెట్లో 120 సీట్లు ఉంటాయి. ప్రభుత్వాన్ని ఏర్పాటు చేయడానికి ఒక పార్టీ లేదా సంకీర్ణానికి 61 సీట్లు అవసరం. ప్రస్తుతం, ఇజ్రాయెల్లో నెతన్యాహు నేతృత్వంలోని ఐదు పార్టీల మితవాద సంకీర్ణం అధికారంలో ఉంది. ఈ కూటమిలో నెతన్యాహుకు చెందిన లికుడ్, ఆర్యే డెరికి చెందిన షాస్, యునైటెడ్ టోరా జుడాయిజం, బెజాలెల్ స్మోట్రిచ్కు చెందిన రిలిజియస్ జియోనిజం , ఇటామర్ బెన్-గ్విర్కు చెందిన ఓట్జ్మా యెహుదిత్ పార్టీలు ఉన్నాయి.
నెతన్యాహు ఇజ్రాయెల్ ప్రధానమంత్రిగా ఆరుసార్లు పనిచేశారు. ఆయన దేశంలో అత్యధిక కాలం పనిచేసిన ప్రధానమంత్రిగా కొనసాగుతున్నారు. ఏడవసారి కూడా పదవిపై కన్నేశారు. అయితే, పార్లమెంటులో అధికార కూటమికి సాధారణ మెజారిటీకి కొద్దిగా తక్కువ పడొచ్చని ఇటీవలి ఒక సర్వే సూచించింది. ‘ది ఎకనామిస్ట్’ ప్రచురించిన ఈ సర్వే ప్రకారం, ప్రస్తుత ప్రభుత్వం సుమారు 54 సీట్లు గెలుచుకోవచ్చు, అందులో లికుడ్ ఒక్కటే 25 సీట్లు దక్కించుకుంటుంది.
అలాగే, షాస్కు తొమ్మిది, రిలిజియస్ జియోనిజంకు ఐదు, యునైటెడ్ టోరా జుడాయిజం, ఓట్జ్మా యెహుదిత్లకు చెరో ఎనిమిది సీట్లు వస్తాయని అంచనా వేసింది. ప్రతిపక్ష పార్టీలు 65 సీట్లు గెలుచుకోవచ్చని సర్వే అంచనా వేసినప్పటికీ, అధికార కూటమి విజయంపై ధీమాతో ఉంది.
ఇదిలా ఉండగా, గాజా, లెబనాన్లలో సైనిక చర్యలతో సహా ప్రధానమంత్రి అనేక విధానాలను విమర్శిస్తూ, నెతన్యాహు తక్షణమే రాజీనామా చేయాలని ప్రతిపక్షం పిలుపునిచ్చింది. రాబోయే ఎన్నికలలో నెతన్యాహు అధికారాన్ని కోల్పోయి, కొత్త ప్రభుత్వం ఏర్పడుతుందని అది భావిస్తోంది.
More Stories
ఎర్ర సముద్రంలో భారత నౌకపై క్షిపణి దాడి
పిఓపిఓకెలో ఎన్నికలు “పూర్తి ప్రహసనం”… అణచివేతను కప్పిపుచ్చలేవు
పీఓకె అణచివేతపై వార్తలిచ్చిన అల్ జజీరాపై పాక్ వేటు