బీజేపీ నేతృత్వంలోని పశ్చిమ బెంగాల్ ప్రభుత్వం రాష్ట్ర వ్యాప్తంగా మదర్సాలపై సమీక్షను ప్రారంభించింది. ఈ సంస్థలపై సవివరమైన అంచనా వేసి, జూలై 5లోగా రాష్ట్ర సచివాలయానికి సమగ్ర నివేదికలను సమర్పించాలని ముఖ్యమంత్రి సువేందు అధికారి జిల్లా యంత్రాంగాలను ఆదేశించారు. మైనారిటీ వ్యవహారాలు, మదర్సా విద్యా శాఖ ద్వారా ప్రారంభించిన ఈ ప్రక్రియను, రాష్ట్రవ్యాప్తంగా పనిచేస్తున్న మదర్సాలపై తాజా సమాచారాన్ని సంకలనం చేసే లక్ష్యంతో చేపట్టిన పరిపాలనా సమీక్షగా పిలుస్తున్నారు.
జారీ చేసిన ఆదేశాల ప్రకారం, తమ పరిధిలోని మదర్సాలకు సంబంధించిన విస్తృతమైన డేటాను సేకరించాలని జిల్లా మేజిస్ట్రేట్లను కోరారు. కోరిన సమాచారంలో ప్రతి సంస్థ స్థాపించిన సంవత్సరం, మైనారిటీ వ్యవహారాలు, మదర్సా విద్యా శాఖలో నమోదు వివరాలు, విద్యార్థుల నమోదు సంఖ్యలు, బోధన, బోధనేతర సిబ్బంది వివరాలు ఉన్నాయి. ఆ సంస్థ నివాస సౌకర్యంతో నడుస్తోందా? ప్రైవేటు సహాయం పొందుతోందా? లేదా మరేదైనా ఇతర వర్గం కింద పనిచేస్తోందా? అనే విషయాన్ని కూడా స్పష్టం చేయాలని అధికారులకు సూచించారు.
ప్రతి మదర్సా అందిస్తున్న కోర్సులు, పాఠ్యప్రణాళికకు సంబంధించిన సమాచారాన్ని కూడా కోరింది. అధికారుల ప్రకారం, ఈ సమీక్ష ముఖ్య ఉద్దేశ్యం ఒక సమీకృత డేటాబేస్ను రూపొందించడం. ఇది విధాన రూపకర్తలకు విద్యా అవసరాలను అంచనా వేయడానికి, అలాగే ఈ సంస్థలలో చదువుతున్న విద్యార్థుల కోసం మెరుగుదలలు లేదా సహాయక చర్యలు అవసరమయ్యే రంగాలను గుర్తించడానికి సహాయపడుతుంది.
ప్రభుత్వ వర్గాల ప్రకారం, ఈ సమీక్ష కేవలం విద్యా, పరిపాలనా సమాచారాన్ని సేకరించడానికే పరిమితం కాదు. ఏవైనా అవకతవకలు లేదా అనధికార కార్యకలాపాలు ఏ సంస్థతోనైనా ముడిపడి ఉన్నాయేమో? అని కూడా అధికారులు పరిశీలించాలనుకుంటున్నారు. జిల్లా స్థాయి నివేదికల ద్వారా సేకరించిన సమాచారం, నిర్దిష్ట కేసులలో మరింత పరిశీలన అవసరమా? కాదా? అని నిర్ధారించడానికి ప్రభుత్వానికి వీలు కల్పిస్తుందని అధికారులు తెలిపారు.
అవకతవకలు గుర్తించిన చోటల్లా తగిన చర్యలు తీసుకుంటామని నొక్కి చెబుతూనే, సమాచారాన్ని సేకరించి పర్యవేక్షణను మెరుగుపరచడమే దీని లక్ష్యమని ఒక సీనియర్ అధికారి స్పష్టం చేశారు. ఈ ప్రక్రియ జరుగుతున్నప్పుడు విద్యా కార్యకలాపాలు నిరాటంకంగా కొనసాగుతాయని ఆయన తెలిపారు. ఈ సమీక్ష విద్యా కార్యకలాపాలకు అంతరాయం కలిగించడం కంటే ప్రణాళిక, పరిపాలనను బలోపేతం చేయడానికి ఉద్దేశించబడింది.
సంస్థల వారీగా సమాచారాన్ని సేకరించే బాధ్యతను ఇప్పుడు జిల్లా యంత్రాంగాలకు అప్పగించడంతో, జూలై ఆరంభం నాటికి ప్రభుత్వం మొదటి సమీకృత మదింపును అందుకుంటుందని భావిస్తున్నారు. ఈ నివేదికలు పశ్చిమ బెంగాల్ వ్యాప్తంగా మదర్సా విద్య, సంస్థాగత పర్యవేక్షణ, విద్యార్థి సంక్షేమ కార్యక్రమాలకు సంబంధించిన భవిష్యత్ నిర్ణయాలకు ప్రాతిపదికగా ఉంటాయి.
More Stories
పూణే ఆలయం వద్ద పాకిస్థాన్ లో తయారైన దుప్పటి!
మణిపూర్లో దంపతులు సహా ముగ్గురు కుకీలు మృతి
మెయిల్, ఎక్స్ప్రెస్ రైళ్ల గరిష్ట వేగం గరిష్టం 130 కిలోమీటర్లకు పెంపు