జర్మనీలోని డ్యూయిస్బర్గ్ నగరంలో ఒక గురుద్వారా లోపల, సిక్కు భక్తుల బృందం మధ్య జరిగిన రక్తపాత ఘర్షణలో హింసాత్మక గందరగోళం చెలరేగింది. ఈ దాడిలో కిర్పాన్లు, కత్తులు, తుపాకులను ఉపయోగించారు. ఈ ఘర్షణలో కనీసం 11 మంది గాయపడ్డారు. ఆరాధనా స్థలం లోపలే రెండు వర్గాలకు చెందిన సభ్యులు ఒకరిపై ఒకరు దాడి చేసుకుంటున్న దృశ్యాలున్న క్లిప్లు ఆన్లైన్లో వెలుగులోకి వచ్చాయి.
ఈ ఫుటేజ్లో కలవరపరిచే దృశ్యాలు ఉన్నాయి. ఘర్షణ సమయంలో వ్యక్తులు కత్తులు, కిర్పాన్ల వంటి పదునైన ఆయుధాలను ఉపయోగిస్తున్నట్లు కనిపిస్తోంది. బిల్డ్ పత్రిక కథనం ప్రకారం, ఈ ఘర్షణలో సుమారు 40 మంది పాల్గొనడంతో, ప్రత్యేక వ్యూహాత్మక బృందాలను మోహరించడంతో పాటు, పోలీసులు పెద్ద ఎత్తున స్పందించారు. మతపరమైన ప్రాంగణంలో పదునైన ఆయుధాలతో పాటు, పెప్పర్ స్ప్రే, తుపాకీని కూడా ఉపయోగించారని ప్రత్యక్ష సాక్షులు తెలిపారు.
ఈ హింసకు కచ్చితమైన కారణంపై విచారణ కొనసాగుతోంది. అయితే, కొత్త బోర్డ్ ఆఫ్ డైరెక్టర్ల ఎన్నికతో ఈ వివాదానికి సంబంధం ఉండవచ్చని పోలీసుల ప్రాథమిక విచారణలో తేలింది. గురుద్వారా నిధులపై పలు వర్గాలు నియంత్రణ కోసం వాదించడంతో, ఈ ఘర్షణకు ఆ నిధులపై ఉన్న విభేదాలు కూడా కారణమని భావిస్తున్నారు.
సోమవారం ఈ ఘటనను ప్రత్యక్షంగా చూసిన 56 ఏళ్ల భక్తుడు బిల్డ్ పత్రికతో మాట్లాడుతూ, “ఇది ఖచ్చితంగా ముందే ప్రణాళిక వేసుకుని జరిగి ఉండాలి. ప్రార్థనలు ప్రారంభం కావడానికి కొద్దిసేపటి ముందు, దాడి చేసినవారు అకస్మాత్తుగా తమ ప్రత్యర్థులపై పెప్పర్ స్ప్రే ఉపయోగించారు. ఆ తర్వాత వారిలో ఒకరు పిస్టల్తో కాల్పులు జరిపారు. నేను కత్తులను కూడా చూశాను” అని చెప్పారు.
ఆలయంలో నిధులు, అధికారంపై నియంత్రణకు సంబంధించి మాజీ, ప్రస్తుత బోర్డు సభ్యుల మధ్య కాలక్రమేణా ఉద్రిక్తతలు పెరుగుతూ వచ్చాయని సాక్షి తెలిపారు. “దాడి ప్రారంభమైనప్పుడు, చాలా మంది భయంతో పారిపోయారు, పరిస్థితి ఇంకా దారుణంగా ఉండేది. అదృష్టవశాత్తు, ఎవరి ప్రాణాలకు ప్రమాదం లేదు.” నివేదిక ప్రకారం, ఈ ఘర్షణలో 11 మంది గాయపడ్డారు.
More Stories
అమెరికా, ఇరాన్ రెండో దశ చర్చలపై అనిశ్చితి
దళితులకు నేపాల్ ప్రభుత్వం పక్షం రోజుల్లో `క్షమాపణలు’
హోర్ముజ్లో భారత నౌకలపై కాల్పులు.. విచారణ చేస్తున్న ఇరాన్