యుద్ధం ముగింపుకు ఇరాన్ మూడు షరతులు

“హర్మూజ్ జలసంధి గుండా నౌకలు సురక్షితంగా ప్రయాణించాలంటే ఇరాన్ అనుమతి ఉండాలి. ఈ విషయాన్ని ఎక్స్‌ప్రెస్ రోమ్, మయూరీ నరీ అనే నౌకల సిబ్బందిని అడగాలి. వారు ఎవరో ఇచ్చిన హామీలను నమ్మి మా హెచ్చరికలను విస్మరించారు. హర్మూజ్ జలసంధిని దాటాలని అనుకున్నారు. కానీ మాకు దొరికిపోయారు. జలసంధి దాటాలనుకునే ఏ నౌక అయినా ఇరాన్ నుంచి పర్మిషన్ పొందాల్సిందే. ” అని అలిరేజా టాంగ్సిరి హెచ్చరించారు.

తమపై యూఎస్-ఇజ్రాయెల్ దాడుల నేపథ్యంలో ఇరాన్ హర్మూజ్ జలసంధి గుండా నౌకల ప్రయాణంపై ఆంక్షలను మరింత తీవ్రతరం చేసింది. అమెరికా, ఇజ్రాయెల్‌కు సహకరించని నౌకలు సురక్షితంగా హర్మూజ్ జలసంధి గుండా ప్రయాణించవచ్చని ఇరాన్ చెబుతోంది. 20 మిలియన్ బ్యారెళ్లకు పైగా ముడి చమురు ప్రతిరోజూ ఇరాన్ తీరాన్ని ఒమన్ నుంచి వేరు చేసే ఇరుకైన ఛానల్ గుండా వెళ్తుంది. 

ఆ పరిమాణం ప్రపంచ చమురు వినియోగంలో దాదాపు ఐదో వంతు. మొత్తం సముద్రమార్గ చమురు వాణిజ్యంలో దాదాపు పావు వంతు ఉంటుంది. ఇరాన్ ప్రభుత్వం మీడియా ప్రకారం  అమెరికా, ఇజ్రాయెల్ కలిసి ఇరాన్‌లోని 16,000కి పైగా నివాస యూనిట్లపై దాడులు చేశాయి. అలాగే 19,734 సైనికేతర భవనాలపై దాడులు చేపట్టాయి. ఈ దాడులు జరిగిన వాటిలో 77 వైద్య కేంద్రాలు, 16 రెడ్ క్రెసెంట్ సౌకర్యాలు ఉన్నాయి.

మరోవైపు, శత్రుదేశాల్లోని పలు ప్రాంతాలపై నిర్ణయాత్మక దాడులను ప్రారంభించామని ఇస్లామిక్‌ రెవల్యూషనరీ గార్డ్స్‌ కార్ప్స్ (ఐఆర్ జిసి) తెలిపింది. ఈ క్రమంలో ఖాదర్, ఎమాద్, ఖైబార్ షెకాన్, ఫట్టా వంటి క్షిపణులను ప్రయోగించామని పేర్కొంది. లెబనాన్‌లోని హెజ్‌బొల్లాతో కలిసి సంయుక్తంగా ఈ దాడులు చేపట్టినట్లు స్పష్టం చేసింది. 

జియోనిస్ట్ (ఇజ్రాయెల్) మీడియా వర్గాలు ధ్రువీకరించినట్లుగా గత 24 గంటల్లో ఇజ్రాయెల్‌పై క్షిపణుల దాడులు గణనీయంగా పెరిగాయని వెల్లడించింది. దీంతో ఇజ్రాయెల్‌లో చాలా మంది ప్రాణాలు కోల్పోయినట్లు పేర్కొంది. ఇస్లామిక్‌ రెవల్యూషనరీ గార్డ్స్‌ కార్ప్స్ జోర్డాన్‌లోని అల్ అజ్రాక్, సౌదీ అరేబియాలోని అల్ ఖార్జ్ ప్రాంతాల్లో అమెరికా స్థావరాలపై విరుచుకుపడ్డాయి. ఇది అబద్ధాలాడిన అమెరికా అధ్యక్షుడు డొనాల్డ్ ట్రంప్, దురుద్దేశపూరిత ఇజ్రాయెల్ ప్రధాన మంత్రి బెంజమిన్ నెతన్యాహు తీసుకువచ్చిన యుద్ధ ఫలితమని పేర్కొంది.