ట్రంప్ హత్యకు కుట్రలో దోషిగా పాకిస్థానీ వ్యక్తి

అమెరికా అధ్యక్షుడు డొనాల్డ్ ట్రంప్​ను హత్య చేయడానికి కుట్ర పన్నిన కేసులో పాకిస్థాన్​కు చెందిన వ్యక్తిని అమెరికా కోర్టు దోషిగా తేల్చింది. ఇరాన్‌తో సంబంధాలున్న పాకిస్థానీ వ్యక్తి ఆసిఫ్ రజా మర్చంట్ (48) అమెరికా నేతలను హత్య చేయాలని ప్రయత్నించినట్లు కోర్టు నిర్ధారించింది. న్యూయార్క్‌లోని బ్రూక్లిన్ ఫెడరల్ కోర్టులో జ్యూరీ విచారణ అనంతరం ఈ తీర్పు వెలువడింది.

అమెరికా న్యాయశాఖ తెలిపిన వివరాల ప్రకారం, ఆసిఫ్ రజా మర్చంట్ ఇరాన్‌కు చెందిన ఐఆర్జిసి అనే సాయుధ విభాగంతో సంబంధాలు కలిగి ఉన్నాడు. అమెరికా చర్యలకు ప్రతీకారం తీర్చుకునే ఉద్దేశంతో అమెరికా నాయకులను హత్య చేయాలని అతనికి ఆదేశాలు ఇచ్చినట్లు విచారణలో వెల్లడైంది.  2020లో అమెరికా దాడిలో మరణించిన ఇరాన్ కుద్స్ ఫోర్స్ కమాండర్ కస్సేమ్ సోలైమని హత్యకు ప్రతీకారంగా ఈ కుట్ర పన్నినట్లు అధికారులు తెలిపారు.

ఆ సమయంలో అమెరికా అధ్యక్షుడిగా ఉన్న డొనాల్డ్ ట్రంప్​ ఆపరేషన్‌కు ఆదేశాలు ఇచ్చిన విషయం తెలిసిందే. కోర్టులో సమర్పించిన ఆధారాల ప్రకారం ఆసిఫ్ రజా మర్చంట్ 2024 ఏప్రిల్‌లో అమెరికాకు వచ్చాడు. అమెరికాలోని రాజకీయ నాయకులను హత్య చేయడానికి కాంట్రాక్ట్ కిల్లర్లను నియమించడం అతడి బాధ్యతగా ఇచ్చారు. విచారణలో మర్చంట్ వెల్లడించిన వివరాల ప్రకారం, మొదటగా హత్య చేయాల్సిన వ్యక్తి పేరును స్పష్టంగా చెప్పలేదని తెలిపాడు. 

అయితే తరువాత మూడు పేర్లు చెప్పారని పేర్కొన్నాడు. ఆ జాబితాలో అమెరికా అధ్యక్షుడు డొనాల్డ్ ట్రంప్, మాజీ అధ్యక్షుడు జో బైడెన్, ఐక్యరాజ్యసమితిలో అమెరికా మాజీ రాయబారి నిక్కీ హెలీ పేర్లు ఉన్నట్లు కోర్టులో వెల్లడించాడు. మర్చంట్ తనపై ఇరాన్ ఇంటెలిజెన్స్ అధికారులు ఒత్తిడి తెచ్చారని కూడా చెప్పాడు. తన కుటుంబ సభ్యులను బెదిరించడంతో ఈ కుట్రలో పాల్గొనాల్సి వచ్చిందని జ్యూరీకి వివరించాడు.

న్యూయార్క్‌లో మర్చంట్ తన పరిచయ వ్యక్తిని సంప్రదించి హత్య చేయగల వ్యక్తులను ఏర్పాటు చేయాలని కోరాడు. అయితే ఆ వ్యక్తి వెంటనే పోలీసులకు సమాచారం ఇచ్చాడు. అనంతరం అతను అమెరికా దర్యాప్తు సంస్థలకు సహకరించే గోప్య సమాచార వనరుగా మారాడు. అతని సహాయంతో మర్చంట్ ఇద్దరు కాంట్రాక్ట్ కిల్లర్లను కలిసినట్లు భావించాడు. కానీ వారు నిజానికి అమెరికా చట్ట అమలు సంస్థలకు చెందిన అండర్‌కవర్ అధికారులు. 

హత్యను తన అమెరికా ప్రయాణం ముగిసిన తర్వాత అమలు చేయాలని, విదేశాల నుంచి కోడ్ పదాలతో సూచనలు ఇస్తానని చెప్పినట్లు కోర్టులో పేర్కొన్నారు. ఈ కుట్ర కొనసాగుతున్న సమయంలోనే అమెరికా దర్యాప్తు సంస్థలు అతనిపై నిఘా పెట్టాయి. జూలై 2024లో అమెరికా నుంచి వెళ్లేందుకు విమాన టికెట్లు బుక్ చేసుకున్న సమయంలో అతడిని అరెస్ట్ చేశారు.