71 శాతం మంది ఇండో అమెరికన్లలో ట్రంప్ పై వ్యతిరేకత

ఈ సర్వేలో 71 శాతం ఇండో అమెరికన్లు ట్రంప్‌ పాలన పట్ల పూర్తి అసంతృప్తి వ్యక్తం చేస్తూ, తమకు ఆయన పాలన ఎంతమాత్రం ఆమోద యోగ్యంగా లేదని స్పష్టం చేశారు. వెయ్యి మంది ఇండో అమెరికన్లను సర్వేలో ప్రశ్నించగా 29 శాతం మంది మాత్రమే అధ్యక్షుడిగా ట్రంప్‌ పాలన సంతృప్తికరంగానే ఉందని తెలిపారు. మిగతా 71 శాతం మాత్రం ఆయన పాలనపై పెదవి విరిచారు. గత డిసెంబర్‌ నుంచి నిర్వహించిన ఈ సర్వేలో మొత్తం అమెరికన్ల కంటే భారతీయులే ట్రంప్‌కు ఎక్కువగా విమర్శించారు.

64 శాతం మంది ఆయన ఇమిగ్రేషన్‌ విధానాన్ని విమర్శించారు. 68 శాతం దేశ ఆర్థిక వ్యవస్థను నిర్వహిస్తున్న తీరుపై అసంతృప్తి వ్యక్తం చేశారు. ఇక 70 శాతం మంది ట్రంప్‌ అంతర్జాతీయ ఆర్థిక విధానాలు ముఖ్యంగా వాణిజ్యం, సుంకాలు తదితర విషయాలపై అ దేశ విపక్షాల కన్నా తీవ్రంగా విరుచుకుపడ్డారు. ద్వైపాక్షిక సంబంధాల విషయంలో ట్రంప్‌ విధానాలను 55 శాతం మంది వ్యతిరేకించారు.

ముఖ్యంగా అమెరికా-భారత్‌ సంబంధాల్లో ఉద్రిక్తతలు, దేశీయ విధాన మార్పులు, ఒక సమాజాన్ని లక్ష్యంగా చేసుకుని ఆన్‌లైన్‌లో పెరుగుతున్న ద్వేషపూరిత ప్రసంగాలను ఈ సందర్భంగా పలువురు భారతీయులు ప్రస్తావించినట్టు నివేదిక పేర్కొంది. యూఎస్‌లో తాము వివక్షను ఎదుర్కొన్నామని 27 శాతం మంది తెలిపారు.