పరిశోధన రంగంలో భారత్ దూసుకుపోతున్నదని ప్రధాని నరేంద్ర మోదీ తెలిపారు. ప్రపంచంలో ఏదైనా సాధించే సత్తా భారత్‌కు ఉందని చెప్పారు. మన్ కీ బాత్‌ 128వ ఎపిసోడ్‌లో ప్రసంగించిన ప్రధాని మన యువత అసమాన శక్తి, బలమైన సంకల్పంతో దేశాన్ని అభివృద్ధి పథంలో నడిపిస్తోందని పేర్కొన్నారు.
ఇస్రో నిర్వహించిన డ్రోన్ కాంపిటీషన్‌‌కు సంబంధించిన ఒక వీడియోను తాను ఇటీవలే సోషల్ మీడియాలో చూసినట్లు ప్రధాని మోదీ పేర్కొన్నారు. మార్స్ తరహా వాతావరణంలోకి పుణె యువజనుల టీమ్ వదిలిన డ్రోన్ చాలాసార్లు పడిపోయిందని, అయినా వాళ్లు పట్టు విడవకుండా ప్రయత్నించి కొంతసమయం పాటు డ్రోన్ ఎగిరేలా చేయగలిగారని మోదీ తెలిపారు.
“హైదరాబాదీ స్టార్టప్ స్కైరూట్ ఏరోస్పేస్‌కు చెందిన ఇన్ఫినిటీ క్యాంపస్‌ వల్ల భారతదేశ అంతరిక్ష రంగానికి ప్రయోజనం కలుగుతుంది. భారత యువత ఆలోచనలో వచ్చిన మార్పుకు, యువశక్తి పెరిగిన తీరుకు ఈ మార్పులు నిదర్శనాలు” అని ప్రధాని తెలిపారు.
“శాటిలైట్లు, జీపీఎస్, నావిగేషన్ సౌకర్యాలు లేని కాలాన్ని ఒక్కసారి ఊహించుకోండి. ఆ టైంలోనూ నావికులు భారీ నౌకలతో సముద్ర మార్గాల్లో రాకపోకలు సాగించేవారు. అత్యంత కచ్చితత్వంతో గమ్యస్థానాలకు చేరుకునేవారు. ఇప్పుడు ప్రపంచ పరిస్థితులు మారాయి. అయినప్పటికీ ఇంకా కొన్ని సవాళ్లు, ప్రశ్నలు మిగిలే ఉన్నాయి’ అని ప్రధాని మోదీ చెప్పుకొచ్చారు.
జాతీయ గేయం వందేమాతరం 150వ వార్షికోత్సవాలు, పార్లమెంటు సెంట్రల్ హాల్‌లో జరిగిన రాజ్యాంగ దినోత్సవం, అయోధ్య రామ మందిరంలో జరిగిన ధర్మ ధ్వజారోహణ కార్యక్రమం గురించి కూడా ‘మన్ కీ బాత్‌’లో మోదీ ప్రస్తావించారు. దేశ స్వాతంత్య్ర పోరాటంలో ‘వందేమాతరం’ గేయం పోషించిన కీలక పాత్రను ఆయన వివరించారు. ఆ గేయం దేశభక్తుల్లో ఆత్మగౌరవాన్ని, స్వాతంత్య్ర కాంక్షను రగిల్చిందని తెలిపారు.
More Stories
పార్లమెంట్‌లో 14 బిల్లులు ప్రవేశపెట్టనున్న కేంద్రం
గిరిజనులు గుర్తింపు, ఉనికి రెండింటినీ పరిరక్షించుకోవాలి!
అల్ ఫలాహ్‌లోని డా. షహీద్ గదిలో రూ.18 లక్షల నగదు లభ్యం