లచిత్ బర్ఫుకాన్ అత్యున్నత అంకితభావం భారత్ ఆత్మ

“లచిత్ బర్ఫుకాన్ అత్యున్నత అంకితభావం ప్రాథమికంగా దేశపు ఆత్మ విజయం. నేను అహోం వంశానికి చెందినవాడిని కాబట్టి, ఈ విషయం లోతైన వ్యక్తిగత ప్రాముఖ్యతను కలిగి ఉంది” అని కేంద్ర విదేశాంగ శాఖ సహాయ మంత్రి పబిత్ర మార్గెరిటా తెలిపారు.  ఢిల్లీ కేశవ్ కుంజ్‌లోని విచార్-వినిమయ్ ఆడిటోరియంలో “లచిత్ బర్ఫుకాన్: ఔరంగజేబు సైన్యాన్ని ఓడించిన గొప్ప యోధుడు” అనే స్మారక పుస్తక ఆవిష్కరణ కార్యక్రమంలో ఆయన ముఖ్య అతిథిగా ప్రసంగించారు. 

ఈ కార్యక్రమాన్ని ఈశాన్య రాష్ట్రాల అధ్యయన కేంద్రం, ఫోన్ ఫౌండేషన్,  ప్రభాత్ ప్రకాశన్ సంయుక్తంగా నిర్వహించాయి. ఈ పుస్తకం పరాక్రమవంతుడైన అహోం జనరల్, జాతీయ గర్వానికి అంతిమ చిహ్నం అయిన లచిత్ బర్ఫుకాన్ జీవితం, అసమానమైన సైనిక వ్యూహం, శాశ్వత జాతీయ సహకారానికి నిజమైన నిదర్శనంగా నిలుస్తుంది. ఆయన ధైర్యం అస్సామీ చరిత్రలను మించిపోతుందని కేంద్ర మంత్రి చెబుతూ ; ఇది మొత్తం భారతదేశపు శౌర్య గాథ పునరుద్ధరణను సూచిస్తుందని తెలిపారు. అతని విజయం కేవలం ఒక సైన్యంపై కాదు, ఎప్పటికీ అణచివేయబడని అజేయమైన జాతీయ స్ఫూర్తికి నిదర్శనం అని తెలిపారు.

ఐసిఎస్ఎస్ఆర్ కార్యదర్శి ప్రొఫెసర్ ధనంజయ్ సింగ్ మాట్లాడుతూ, “లచిత్ బర్ఫుకాన్ కేవలం సైనిక కమాండర్ కంటే ఎక్కువ; ఆయన ధైర్యం, విధి నిర్వహణ,  అచంచలమైన దేశభక్తికి శాశ్వతమైన ప్రతిరూపం అని తెలిపారు. నిజమైన బలం ఆయుధాలలో కాదు, ఒకరి మాతృభూమి, సాంస్కృతిక వారసత్వం పట్ల లోతైన, విడదీయరాని ప్రేమలో ఉందని ఆయన జీవితం మనకు బోధిస్తుందని ఆయన పేర్కొన్నారు. 

“అస్సాం కేవలం ఒక ప్రాంతీయ రాష్ట్రం కాదు, కానీ భారతదేశపు తూర్పు నాగరికత ద్వారం, శతాబ్దాలుగా భక్తి, సంస్కృతి, జ్ఞానం ప్రవహించిన మూలం” అని ఆయన స్పష్టం చేశారు. పుస్తక రచయిత, జె ఎన్ యు అసోసియేట్ ప్రొఫెసర్ డాక్టర్ రక్తిం పటార్ మాట్లాడుతూ భారత్‌లోని చారిత్రక కథనాలు తరచుగా ఈశాన్య ప్రాంతాన్ని విస్మరిస్తూ ఉంటాయని, అటువంటి ధోరణిని ఓ సవాల్ గా ఈ పుస్తకం వచ్చిందని చెప్పారు.

ఈ ప్రాంతం ఎల్లప్పుడూ భారతీయ నాగరికతకు కీలకమైన కేంద్రం అని ఆయన స్పష్టం చేశారు. హిందీలో దీని ప్రచురణ ఈ అద్భుతమైన చరిత్రను విస్తృత జాతీయ ప్రేక్షకులకు అందుబాటులోకి తీసుకురావడానికి అంకితమైన అడుగు అని ఆయన భావించారు. ఈశాన్య అధ్యయన కేంద్రం అధ్యక్షుడు సురేంద్ర ఘోంగ్‌క్రోక్తా, అధ్యక్షుడు, కేంద్రం అధిపతి డాక్టర్ వాలెంటినా బ్రహ్మ కూడా మాట్లాడారు.