ప్రముఖ బాలీవుడ్ నటుడు సల్మాన్ ఖాన్‌‌పై గత కొద్ది రోజులుగా పాకిస్తాన్ నేతలు తీవ్ర విమర్శలు చేస్తున్నారు. ఇప్పుడు మరో అడుగు ముందుకేసి సల్మాన్‌‌ను ఉగ్రవాదిగా ప్రకటించినట్లు పాక్ మీడియాలో కథనాలు వస్తున్నాయి. దాని ప్రకారం. ఆయనను ఒక ఉగ్రవాదిగా ముద్రవేశారు. 1997లోని 4వ షెడ్యూల్ కింద ఆయన పేరును చేర్చినట్లు మీడియా కథనాల సారాంశం.
ఉగ్రవాదులతో సంబంధాలున్నట్లు అనుమానించబడిన వ్యక్తులను చేర్చే బ్లాక్‌లిస్ట్‌లో సల్మాన్ పేరును చేర్చారు. ఇలా బ్లాక్‌లిస్ట్‌లో ఉన్న వ్యక్తుల కదలికలపై పాకిస్తాన్ చట్టాల ప్రకారం నిఘా పెడతారు. వారిపై ఆంక్షలు విధిస్తారు. అవసరమైతే చట్టరీత్యా చర్యలు తీసుకుంటారు. సల్మాన్ ఖాన్ ఇటీవల సౌదీ వేదికగా జరిగిన జాయ్ ఫోరమ్ 2025 కార్యక్రమంలో పాల్గొన్నారు. ఈ కార్యక్రమానికి ఆమిర్ ఖాన్, షారుక్ ఖాన్ కూడా హాజరయ్యారు.
ఈ సందర్భంగా సల్మాన్ ఖాన్ మాట్లాడుతూ బలూచిస్తాన్, పాకిస్థాన్ ను వేరుచేసి సంబోధించారు. ‘ప్రస్తుతం మీరు ఒక హిందీ ఫిల్మ్ తీసి అది సౌదీ అరేబియాలో విడుదల చేస్తే సూపర్‌హిట్ అవుతుంది. ఒక తమిళ్, తెలుగు లేదా మలయాళీ సినిమా తీసినా అది రూ. వందల కోట్ల వ్యాపారం చేస్తుంది. ఎందుకంటే వివిధ దేశాల నుంచి చాలా మంది సౌదీకి వచ్చారు. బలూచిస్తాన్ నుంచి వచ్చారు. ఆఫ్గానిస్తాన్ నుంచి, పాకిస్తాన్ నుంచి కూడా వచ్చిన ప్రజలు ఇక్కడ పని చేస్తున్నారు’ అని సల్మాన్ ఖాన్ పేర్కొన్నారు.
బలూచిస్తాన్‌ను ఒక దేశం అన్న అర్థంలో సంబోధించడంతో కొద్ది సేపటికే సోషల్ మీడియాలో ఆ క్లిప్ వైరల్ అయింది. తీవ్ర చర్చకు దారితీసిని సల్మాన్ ఖాన్ వ్యాఖ్యలు.. పాకిస్తాన్ ప్రభుత్వాన్ని అగ్గిమీద గుగ్గిలం చేశాయి. బలూచిస్తాన్, పాకిస్థాన్‌లను సల్మాన్‌ఖాన్‌ వేర్వేరుగా చెప్పడం ఏంటి అంటూ భగ్గుమంది. దాయాది. పాకిస్థాన్‌కు చెందిన బలూచిస్థాన్‌ను ఇలా వేరు చేసి మాట్లాడటం ఏంటి అంటూ అక్కడి మీడియా సల్మాన్‌పై తీవ్ర విమర్శలు చేసింది.
అయితే, బలూచిస్తాన్ వేర్పాటువాద నాయకులు మాత్రం సల్మాన్ చేసిన ప్రకటనను స్వాగతించారు. బలూచిస్తాన్ స్వాతంత్య్రం కోసం పోరాడుతున్న ప్రముఖ న్యాయవాది మీర్ యార్ బలూచ్ సల్మాన్ చేసిన వ్యాఖ్యలు ఆరు కోట్ల బలూచిస్తాన్ ప్రజలకు ఆనందాన్ని కలిగించాయని తెలుపుతూ సల్మాన్ ఖాన్‌కు కృతజ్ఞత తెలిపారు. ఇలా మాట్లాడేందుకు చాలా దేశాలు వెనకడుగు వేసిన వేళ సల్మాన్ మద్దతు ఇవ్వడం సంతోషకరమని పేర్కొన్నారు. బలూచిస్తాన్‌ను ప్రత్యేక దేశంగా ప్రపంచం గుర్తించేందుకు సల్మాన్ కామెంట్ దోహదం చేస్తుందని అభిప్రాయపడ్డారు.
More Stories
రష్యా అమ్ములపొదిలో అపరిమిత పరిధిలో ‘బూరెవెస్ట్‌నిక్‌’
పాకిస్తాన్ నే కాటేస్తున్న సీమాంతర ఉగ్రవాదం!
కంబోడియా-థాయ్‌ శాంతి ఒప్పందంతో అరుదైన ఖనిజాలపై ట్రంప్!